ಚವರ್ಕಾಡಿನಲ್ಲಿಲ್ಲ ಅಂಚೆ ಕಚೇರಿ

ಕೇರಳ-ಕರ್ನಾಟಕ ಗಡಿ ಪ್ರದೇಶ ಹೊಂದಿಕೊಂಡಿರುವ ಎಣ್ಮಕಜೆ ಪಂಚಾಯಿತಿಯ ಚವರ್ಕಾಡಿನಲ್ಲಿ ಅಂಚೆ ಕಚೇರಿ ಆರಂಭಿಸುವಂತೆ ಸ್ಥಳೀಯ ನಾಗರಿಕರು ಇಲಾಖೆ ಅಧಿಕಾರಿಗಳನ್ನು ಆಗ್ರಹಿಸಿದ್ದಾರೆ.

ಪಂಚಾಯಿತಿಯ ಒಂದು ಹಾಗೂ ಎರಡನೇ ವಾರ್ಡ್ ಒಳಗೊಂಡ ಈ ಪ್ರದೇಶ ಭೌಗೋಳಿಕವಾಗಿ ಕೇರಳದಲ್ಲಿ ಗುರುತಿಸಿಕೊಂಡಿದ್ದರೂ, ಇಲ್ಲಿನ ಜನತೆ ವ್ಯವಹಾರಗಳಿಗೆ ಕರ್ನಾಟಕವನ್ನೇ ಆಶ್ರಯಿಸುತ್ತಿದ್ದಾರೆ. ಅಡ್ಯನಡ್ಕ ಇಲ್ಲಿಗೆ ಸನಿಹದ ಪೇಟೆಯಾಗಿದ್ದು, ಪತ್ರ ವ್ಯವಹಾರಗಳಿಗೆ ಕರ್ನಾಟಕದಲ್ಲಿರುವ ಅಂಚೆ ಕಚೇರಿಯನ್ನೇ ಆಶ್ರಯಿಸಿಕೊಂಡಿರಬೇಕಾದ ಅನಿವಾರ್ಯತೆಯಿದೆ. ಇದರಿಂದ ಅಂಚೆ ಸೇವೆ ವಿಳಂಬವಾಗುತ್ತಿರುವುದಲ್ಲದೆ, ಕೆಲವೊಂದು ಸವಲತ್ತುಗಳೂ ಕೈತಪ್ಪಲು ಕಾರಣವಾಗುತ್ತಿದೆ.

ಭೌಗೋಳಿಕವಾಗಿಯೂ ಇಲ್ಲಿನ ಜನತೆ ಸಮಸ್ಯೆ ಎದುರಿಸುತ್ತಿದ್ದಾರೆ. ಪೆರ್ಲದಿಂದ ನಲ್ಕ-ಬಿರ್ಮೂಲೆ ಮೂಲಕ ಬಾಕಿಲಪದವು ಹೊಳೆ ದಾಟಿ ಆರೇಳು ಕಿ.ಮೀ. ಪ್ರಯಾಣದಲ್ಲಿ ಚವರ್ಕಾಡು ತಲುಪಬಹುದಾದ ದೂರವನ್ನು 15ಕಿ.ಮೀ ಗೂ ಹೆಚ್ಚು ಸುತ್ತುಬಳಸಿ ತಲುಪ ಬೇಕಾಗಿದೆ. ಬಾಕಿಲಪದವು ಹೊಳೆಗೆ ಸೇತುವೆ ನಿರ್ಮಾಣವಾದಲ್ಲಿ ಸಮಸ್ಯೆಗೆ ಪರಿಹಾರ ಲಭಿಸಬಹುದಾಗಿದ್ದರೂ, ಸೇತುವೆ ನಿರ್ಮಾಣ ಕಾರ್ಯ ಇನ್ನೂ ಅತಂತ್ರ ಸ್ಥಿತಿಯಲ್ಲಿದೆ. ಇನ್ನೊಂದೆಡೆ ಬಾಕಿಲಪದವಿಗೆ ಮಂಜೂರುಗೊಂಡಿರುವ ಸೇತುವೆ ಕಾಮಗಾರಿ ಶೀಘ್ರ ಆರಂಭಿಸುವಂತೆಯೂ ಜನತೆ ಆಗ್ರಹಿಸಿದ್ದಾರೆ.

ಕೇರಳ-ಕರ್ನಾಟಕ ಗಡಿ ಗ್ರಾಮವಾದ ಚವರ್ಕಾಡಿನಲ್ಲಿ ಹೊಸ ಅಂಚೆ ಕಚೇರಿ ಮಂಜೂರು ಮಾಡಬೇಕೆಂಬುದು ದೀರ್ಘ ಕಾಲದ ಬೇಡಿಕೆಯಾಗಿದೆ. ಎಣ್ಮಕಜೆ ಪಂಚಾಯಿತಿಯ 1 ಮತ್ತು 2ನೇ ವಾರ್ಡ್ ಒಳಗೊಂಡ ಪ್ರದೇಶದಲ್ಲಿ ಅಂಚೆ ಸೌಲಭ್ಯವಿಲ್ಲದೆ ನೂರಾರು ಜನ ಸಂಕಷ್ಟ ಅನುಭವಿಸುತ್ತಿದ್ದಾರೆ.

ಕರೊನಾ ಅವಧಿಯಲ್ಲಿ ಸಾಯ, ಚವರ್ಕಾಡು ಜನತೆ ಎದುರಿಸಿದ್ದ ಸಮಸ್ಯೆ ಅಷ್ಟಿಷ್ಟಲ್ಲ. ಇಲ್ಲಿನ ಜನತೆಗೆ ಮಳೆಗಾಲದಲ್ಲಿ ಬಾಕಿಲಪದವು ಹೊಳೆ ದಾಟಿ ತೆರಳಲಾಗದೆ, ಸಾರಡ್ಕ ಗೇಟ್ ಮೂಲಕ ಸಾಗಬೇಕಾದ ಅನಿವಾರ್ಯ ಪರಿಸ್ಥಿತಿ ಎದುರಾಗಿತ್ತು. ಅಂದು ಕೋವಿಡ್ ಹಿನ್ನೆಲೆ ಅಂತಾರಾಜ್ಯ ಗಡಿಪ್ರದೇಶ ಸಾರಡ್ಕ ಗೇಟನ್ನು ಸಂಪೂರ್ಣ ಬಂದ್ ಮಾಡಲಾಗಿತ್ತು. ಇದರಿಂದ ಚವರ್ಕಾಡು-ಸಾಯ ಪ್ರದೇಶದ ಜನತೆ ಪ್ರಾಯಶಃ ದ್ವೀಪಸದೃಶ ಜೀವನ ನಡೆಸುವಂತಾಗಿತ್ತು. ಇಲ್ಲಿನ ಜನತೆಗೆ ರೇಶನ್, ಅಂಚೆ, ಬ್ಯಾಂಕ್, ಪಂಚಾಯಿತಿ ಸೇರಿದಂತೆ ಪ್ರತಿಯೊಂದು ಸರ್ಕಾರಿ ಸವಲತ್ತಿಗೆ ಪೆರ್ಲ ಪೇಟೆಯನ್ನು ಆಶ್ರಯಿಸಬೇಕಾಗಿದ್ದು, ಕರೊನಾ ಕಾಲಘಟ್ಟದಲ್ಲಿ ಹೆಚ್ಚಿನ ಸಂಕಷ್ಟ ಅನುಭವಿಸಿದ್ದರು.

ಎಣ್ಮಕಜೆ ಪಂಚಾಯಿತಿಯ ಚವರ್ಕಾಡಿನಲ್ಲಿ ಅಂಚೆ ಕಚೇರಿ ಆರಂಭಿಸುವುದರಿಂದ ಇಲ್ಲಿನ ಜನತೆಯ ಬಹುದಿನಗಳ ಬೇಡಿಕೆ ಈಡೇರಲು ಸಾಧ್ಯ. ಈ ಪ್ರದೇಶದಲ್ಲಿ ಅಂಚೆ ಕಚೇರಿ ಸ್ಥಾಪಿಸುವ ನಿಟ್ಟಿನಲ್ಲಿ ಅಂಚೆ ಇಲಾಖೆ ಸಾಧ್ಯತಾ ಅಧ್ಯಯನ ನಡೆಸಿ ಅಗತ್ಯ ಕ್ರಮ ಕೈಗೊಳ್ಳಬೇಕು. ಈ ನಿಟ್ಟಿನಲ್ಲಿ ಇಲಾಖೆಗೆ ಮನವಿ ಸಲ್ಲಿಸಲಾಗಿದೆ. ಜನರ ಸಮಸ್ಯೆ ಮನಗಂಡು ಇಲಾಖೆ ಮುಂದುವರಿಯಬೇಕು.

— ಎಂ.ಎಚ್.ಆರಿಸ್, ಸಮಾಜಸೇವಕ