ಯುದ್ಧ ನಿಲ್ಲಲಿ; ಶಾಂತಿ ನೆಲೆಸಲಿ

ಮಧ್ಯ ಪ್ರಾಚ್ಯ ದೇಶಗಳಲ್ಲಿ ನಡೆಯುತ್ತಿರುವ ಯುದ್ಧ, ಹಿಂಸೆ ಖಂಡಿಸಿ ಉಡುಪಿಯಲ್ಲಿ ಮಹಾತ್ಮ ಗಾಂಧಿ ಪುತ್ಥಳಿ ಬಳಿ ಕಲಾವಿದ ರಾಮಾಂಜಿ ನಮ್ಮಭೂಮಿ ಮೌನ ಧರಣಿ ನಡೆಸಿದರು.

Published on:

11 Apr 2026, 12:56 pm

* ಜನಜಾಗೃತಿಗಾಗಿ ಕಲಾವಿದ ರಾಮಾಂಜಿ ಮೌನ ಧರಣಿ

ಉಡುಪಿ: ಇರಾನ್ ವಿರುದ್ಧ ಇಸ್ರೇಲ್&ಅಮೆರಿಕ ಜಂಟಿಯಾಗಿ ನಡೆಸುತ್ತಿರುವ ಯುದ್ಧ ವಿರೋಧಿಸಿ, ಮಾನವ ಜನಾಂಗದ ಮೇಲಿನ ಹಿಂಸೆ ಹಾಗೂ ಪ್ರಕೃತಿಯ ಮೇಲಿನ ದಬ್ಬಾಳಿಕೆ ಖಂಡಿಸಿ ಅಂತಾರಾಷ್ಟ್ರೀಯ ದುಡಿಯುವ ಮಕ್ಕಳ ಸಂಸ್ಥೆಯಾದ ಕುಂದಾಪುರದ 'ನಮ್ಮಭೂಮಿ'ಯ ರಾಯಭಾರಿ, ಮಕ್ಕಳ ಹಕ್ಕುಗಳ ಹೋರಾಟಗಾರ, ರಂಗಭೂಮಿ ಕಲಾವಿದ ಹಾಗೂ ಕನ್ನಡ ಉಪನ್ಯಾಸಕ ರಾಮಾಂಜಿ ನಮ್ಮಭೂಮಿ ಏಕಾಂಗಿಯಾಗಿ ಉಡುಪಿಯಲ್ಲಿ ಶನಿವಾರ (ಏ.11) ಪ್ರತಿಭಟಿಸಿದರು.

ಉಡುಪಿಯ ಸರ್ವೀಸ್ ಬಸ್ ನಿಲ್ದಾಣ ಸಮೀಪದ ಕ್ಲಾಕ್ ಟವರ್ ಮುಂಭಾಗದ ಮಹಾತ್ಮ ಗಾಂಧಿ ಪುತ್ಥಳಿಗೆ ಮಾಲಾರ್ಪಣೆ ಮಾಡಿ, ಪ್ರತಿಮೆಯ ಮುಂದೆ ಮೌನ ಧರಣಿ ನಡೆಸಿದರು. ಬೆಳಗ್ಗೆ 8:30ರಿಂದ ಸಂಜೆ 5:30ರ ವರೆಗೆ ಪ್ರತಿಮೆಯ ಬಳಿ ಕುಳಿತು ಪ್ರತಿಭಟಿಸಿದರು.

ವಿವಿಧ ಘೋಷಣಾ ಫಲಕ

ಮೌನ ಪ್ರತಿಭಟನೆ ಹಿನ್ನೆಲೆಯಲ್ಲಿ ಮಹಾತ್ಮರ ಘೋಷಣೆಯನ್ನೇ ಫಲಕವನ್ನಾಗಿ ಮಾಡಿಕೊಂಡು ಅಳವಡಿಸಿಕೊಂಡಿದ್ದರು. ರಂಜಾನ್ ದರ್ಗಾ ಅವರ 'ಬಂದೂಕಿನ ನಳಿಕೆಯಲ್ಲಿ ಗುಬ್ಬಚ್ಚಿ ಗೂಡು ಕಟ್ಟಲಿ', ಬಸಬಣ್ಣನ 'ದಯೆಯೇ ಧರ್ಮದ ಮೂಲವಯ್ಯ', ಮಹಾತ್ಮ ಗಾಂಧೀಜಿಯ ಆಶಯವಾದ 'ವಿಶ್ವ ಶಾಂತಿಗೆ ಪ್ರಾರ್ಥಿಸೋಣ' ಎಂಬಿತ್ಯಾದಿ ಘೊಷಣೆ, ಯುದ್ಧ ತೊಲಗಲಿ-ಶಾಂತಿ ನೆಲಸಲಿ, ಯುದ್ಧ ನಿಲ್ಲಿಸಿ-ಪರಿಸಿರ ಉಳಿಸಿ ಎಂಬ ಫಲಕಗಳು ಗಮನ ಸೆಳೆದವು.

ನಾನೂ ಸಹ ವಿಶ್ವದ ಓರ್ವ ಸಂವೇದನಾಶೀಲ ಪ್ರಜೆಯಾಗಿದ್ದೇನೆ. ಒಂದು ತಿಂಗಳಿನಿಂದ ಮಧ್ಯ ಪ್ರಾಚ್ಯ ರಾಷ್ಟ್ರಗಳಲ್ಲಿ ನಡೆಯುತ್ತಿರುವ ಯುದ್ಧ ಹಾಗೂ ಸಂಬಂಧಿತ ಘಟನೆಗಳಿಂದ ನೊಂದಿದ್ದೇನೆ. ಮಾನವ ಜನಾಂಗದ ಮೇಲೆ ನಡೆಯುತ್ತಿರುವ ಹಿಂಸೆಗಳಿಗೆ ಮತ್ತು ಪ್ರಕೃತಿಯ ಮೇಲೆ ಆಗುತ್ತಿರುವ ದಬ್ಬಾಳಿಕೆ ಖಂಡಿಸಿ ನೈತಿಕ ಪ್ರತಿಭಟನೆ ಮಾಡುತ್ತಿದ್ದೇನೆ. ಮಹಾತ್ಮ ಗಾಂಧಿ ಮಾದರಿಯಲ್ಲಿ ಮೌನ ಧರಣಿ ಹಮ್ಮಿಕೊಂಡಿದ್ದೇನೆ. ಜನಜಾಗೃತಿ ಮೂಡಿಸುವುದು ನನ್ನ ಉದ್ದೇಶ.

Protest