ಯಮರೂಪಿ ಟಿಪ್ಪರ್‌ಗಳಿಗೆ ಬೇಕಿದೆ ಬ್ರೇಕ್!

ತಲ್ಲೂರು-ನೇರಳಕಟ್ಟೆ ಮಾರ್ಗದ ಶೆಟ್ರಕಟ್ಟೆ ತಿರುವಿನಲ್ಲಿ ಸೋಮವಾರ ಸಂಜೆ ಕೆಎಸ್‌ಆರ್‌ಟಿಸಿ ಬಸ್- ಟಿಪ್ಪರ್ ನಡುವೆ ಸಂಭವಿಸಿದ ಭೀಕರ ಅಪಘಾತ ಜನತೆಯನ್ನು ಬೆಚ್ಚಿ ಬೀಳಿಸಿದೆ. ಯಮರೂಪಿಯಾಗಿ ಬಂದ ಟಿಪ್ಪರ್ ಚಾಲಕನ ಅತಿವೇಗದ ಚಾಲನೆಯೇ ಅಪಘಾತಕ್ಕೆ ಕಾರಣವೆಂಬುದು ಮೇಲ್ನೋಟಕ್ಕೆ ಸ್ಪಷ್ಟವಾಗಿದೆ. ಇಂಥ ನೂರಾರು ಟಿಪ್ಪರ್‌ಗಳು ನಿತ್ಯ ಈ ಭಾಗದಲ್ಲಿ ಮರಳು, ಕಲ್ಲು, ಮಣ್ಣು ಹೊತ್ತು ಸಾಗಿಸುತ್ತವೆ. ಇವುಗಳ ವೇಗಕ್ಕೆ ಮಿತಿಯೇ ಇಲ್ಲ. ಪಾದಚಾರಿಗಳು, ದ್ವಿಚಕ್ರ ವಾಹನ ಚಾಲಕರು ಜೀವ ಕೈಯಲ್ಲಿಡಿದು ಹೋಗಬೇಕಿದೆ. ಟಿಪ್ಪರ್‌ಗಳ ವೇಗಕ್ಕೆ ಕಡಿವಾಣ ಹಾಕಬೇಕಾದ ಇಲಾಖೆ ಕಣ್ಮುಚ್ಚಿ ಕುಳಿತಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಶೆಟ್ರಕಟ್ಟೆ ಘಟನೆಗೆ ಟಿಪ್ಪರ್‌ನ ಅನಿಯಂತ್ರಿತ ಹಾಗೂ ಅತಿಯಾದ ವೇಗದ ಚಾಲನೆಯ ಜತೆಗೆ ರಸ್ತೆ ತಿರುವು ಕೂಡ ಕಾರಣ ಎನ್ನಲಾಗಿದೆ. ಹಿಂದೆಯೂ ಈ ರಸ್ತೆಯಲ್ಲಿ ಅನೇಕ ಅಪಘಾತಗಳು ನಡೆದಿವೆ ಎನ್ನುತ್ತಾರೆ ಸ್ಥಳೀಯರು. ಇಲ್ಲಿ ಬ್ಲಾಕ್ ಸ್ಪಾಟ್ ಗುರುತಿಸಿ ಸೂಕ್ತ ಮಾರ್ಪಾಟುಗಳನ್ನು ಮಾಡಬೇಕಾದ ಅಗತ್ಯವಿದೆ.

ಇಲಾಖೆ ಬಿಗು ಮಾಡಲಿ: ಕಳೆದ ಕೆಲವು ಸಮಯಗಳಿಂದ ಯಮರೂಪಿ ಟಿಪ್ಪರ್‌ಗಳು ಅನೇಕ ಅಪಘಾತಗಳಿಗೆ ಕಾರಣವಾಗುತ್ತಿದ್ದು ಮರಳು, ಮಣ್ಣು ಕಳ್ಳ ಸಾಗಾಟಕ್ಕೆ ಕೇರಳದ ಗುಜುರಿ ಟಿಪ್ಪರ್‌ಗಳು ಬಳಕೆಯಾಗುತ್ತಿದೆಯೇ ಎಂದು ಸಾರ್ವಜನಿಕರು ಸಂಶಯ ವ್ಯಕ್ತಪಡಿಸಿದ್ದಾರೆ. ದಾಖಲೆ ಇಲ್ಲದ, ವಾಯಿದೆ ದಾಟಿದ ವಿಮೆ, ಫಿಟ್‌ನೆಸ್ ಸರ್ಟಿಫಿಕೇಟ್ ಇಲ್ಲದ ಅನೇಕ ವಾಹನಗಳು, ಕೇರಳ ನೋಂದಣಿಯ ಕೆಲ ವಾಹನಗಳು ಕುಂದಾಪುರ ಭಾಗದಲ್ಲಿ ಓಡಾಡುತ್ತಿವೆ. ಸಾರ್ವಜನಿಕರು ಇವುಗಳ ನಂಬರ್ ಸಂಗ್ರಹಿಸಿ ಕೇಂದ್ರ ಸರ್ಕಾರದ ಎಂಪರಿವಾಹನ್ ಪೋರ್ಟಲ್ ಮೂಲಕ ಪರಿಶೀಲಿಸಿದಾಗ ಈ ವಾಹನಗಳ ವಾಯಿದೆ ಮುಗಿದಿರುವುದು ಕಂಡುಬಂದಿದೆ. ಸಂಬಂದಪಟ್ಟ ಇಲಾಖೆ ನಿಯಮಗಳನ್ನು ಬಿಗಿಗೊಳಿಸಿ ಇಂಥ ವಾಹನಗಳ ಮೇಲೆ ಕಟ್ಟುನಿಟ್ಟಿನ ಕ್ರಮಕೈಗೊಳ್ಳಬೇಕಿದೆ.

ಕೆಲ ಸಮಯದ ಹಿಂದೆ ಕೋಟೇಶ್ವರ- ಹಾಲಾಡಿ ರಸ್ತೆಯಲ್ಲಿ ರಸ್ತೆ ಬದಿ ನಡೆದುಕೊಂಡು ಹೋಗುತ್ತಿದ್ದ ಕಾಲೇಜು ಮಕ್ಕಳ ಮೇಲೆ ಟಿಪ್ಪರ್ ಇದೇ ರೀತಿ ಯಮರೂಪಿಯಾಗಿ ನುಗ್ಗಿ ಓರ್ವ ಅಮಾಯಕ ವಿದ್ಯಾರ್ಥಿಯ ಸಾವಿಗೆ ಕಾರಣವಾಗಿತ್ತು. ಕುಂದಾಪುರದ ಸಣ್ಣಪುಟ್ಟ ಹಳ್ಳಿಗಳ ರಸ್ತೆಗಳಲ್ಲಿ ಟಿಪ್ಪರ್ ಚಾಲಕರು ಚಾಲನೆ ಮಾಡುವ ವೇಗ ನೋಡಿದರೆ ಮೈ ಜುಮ್ ಎನಿಸುತ್ತದೆ. ಗೋಳಿಯಂಗಡಿ ಹೆಂಗವಳ್ಳಿ ದಾರಿಯಲ್ಲಿ ಕೂಡಾ ಮರಳು ಸಾಗಾಟ ಟಿಪ್ಪರ್‌ಗಳು ಅತಿ ವೇಗವಾಗಿ ಸಂಚರಿಸುತ್ತವೆ ಎನ್ನುತ್ತಾರೆ ಸ್ಥಳೀಯರು.

ಟಿಪ್ಪರ್‌ಗಳ ಮಿತಿಮೀರಿದ ವೇಗ, ಕಲ್ಲು, ಮಣ್ಣು, ಮರಳು ಕೊಂಡೊಯ್ಯುವಾಗ ಯಾವುದೇ ರಕ್ಷಣಾ ಕ್ರಮ ಅಳವಡಿಸದಿರುವುದು ಕೂಡಾ ಸಾರ್ವಜನಿಕರ ಆಕ್ಷೇಪಕ್ಕೆ ಕಾರಣವಾಗಿದೆ. ಜತೆಗೆ ಹಸಿ ಮಣ್ಣು, ಮರಳನ್ನು ರಸ್ತೆಯಲ್ಲಿ ಚೆಲ್ಲಿಕೊಂಡು ಹೋಗುವುದರಿಂದಲೂ ದ್ವಿಚಕ್ರ ವಾಹನಗಳ ಸಂಚಾರಕ್ಕೆ ತೊಡಕಾಗುತ್ತಿದೆ. ರಸ್ತೆಗಳೆಲ್ಲ ಹೊಂಡ ಬಿದ್ದು ಹದಗೆಟ್ಟಿವೆ. ಟಿಪ್ಪರ್‌ಗಳಿಗೆ ಸ್ಪೀಡ್ ಬ್ರೇಕರ್ ಅಗತ್ಯವಾಗಿ ಬೇಕಿದ್ದು, ಮುಂದೆ ಇಂತಹ ಘಟನೆಗಳು ಸಂಭವಿಸದಂತೆ ಮುಂಜಾಗ್ರತಾ ಕ್ರಮಗಳನ್ನು ಇಲಾಖೆ ಕೈಗೊಳ್ಳಬೇಕಿದೆ.