ಭರ್ತಿಯಾಗಿಲ್ಲ ದಾದಿಯರ ಹುದ್ದೆ!

ಕೋಟೆಕಾರ್‌ಪ್ರಾಥಮಿಕ ಕೇಂದ್ರ ವ್ಯಾಪ್ತಿಯಲ್ಲಿ ಏಳು ಉಪಕೇಂದ್ರಗಳಿದ್ದು ನಾಲ್ವರು ದಾದಿಯರು ಮಾತ್ರ ಕಾರ್ಯನಿರ್ವಹಿಸುತ್ತಿದ್ದಾರೆ. ಸೋಮೇಶ್ವರಕ್ಕಿದ್ದ ಮೂರು ಹುದ್ದೆಗಳೂ ಖಾಲಿಯಾಗಿದ್ದು, ಈ ಕುರಿತು ಜನಪ್ರತಿನಿಧಿಗಳು ಡಿಎಚ್‌ಒಗೆ ಮನವಿ ಮಾಡಬೇಕು ಎಂದು ಕೋಟೆಕಾರ್ ಪ್ರಾಥಮಿಕ ಆರೋಗ್ಯ ಕೇಂದ್ರ ವೈದ್ಯಾಧಿಕಾರಿ ಡಾ.ಸುನೀತಾ ವಿನಂತಿಸಿದರು.

ಸೋಮೇಶ್ವರ ಪುರಸಭೆಯಲ್ಲಿ ಮಂಗಳವಾರ ಸಾಮಾನ್ಯ ಸಭೆಯಲ್ಲಿ ಮಾತನಾಡಿ, ಗರ್ಭಕಂಠ ಕ್ಯಾನ್ಸರ್ ತಡೆ ಲಸಿಕೆಗೆ 482 ಬಾಲಕಿಯರನ್ನು ಗುರುತಿಸಲಾಗಿದ್ದರೂ 115 ಬಾಲಕಿಯರು ಮಾತ್ರ ಲಸಿಕೆ ಪಡೆದಿದ್ದಾರೆ. ಮಕ್ಕಳಲ್ಲಿ ಕಾಣಿಸುತ್ತಿರುವ ಕಾಲುಬಾಯಿ ಪ್ರಕರಣದ ಬಗ್ಗೆ ಶಾಲಾ ಮಟ್ಟದಲ್ಲೇ ಜಾಗೃತಿ ಮೂಡಿಸಲಾಗುತ್ತಿದ್ದು, ಸೋಮೇಶ್ವರದಲ್ಲಿ ಯಾವುದೇ ಪ್ರಕರಣ ಪತ್ತೆಯಾಗಿಲ್ಲ ಎಂದು ಮಾಹಿತಿ ನೀಡಿದರು.

ಮನೆಯಲ್ಲಿ ಮೃತರಾದರೆ ವೈದ್ಯರು, ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಕರೆ ಮಾಡಿದರೆ ವೈದ್ಯರು ಮಾತ್ರವಲ್ಲದೆ ದಾದಿಯರೂ ಬರುತ್ತಿಲ್ಲ ಎಂದು ಸದಸ್ಯ ದೀಪಕ್ ಪಿಲಾರ್ ದೂರಿದರು. ವೈದ್ಯರನ್ನು ಕರೆದುಕೊಂಡು ಹೋಗಬಹುದು, ಆದರೆ ಮನೆಗೆ ಹೋಗಿ ವ್ಯಕ್ತಿ ಮೃತಪಟ್ಟಿರುವ ಬಗ್ಗೆ ಘೋಷಿಸುವಂತಿಲ್ಲ, ದಾದಿಯರಿಗೆ ಆ ಅಧಿಕಾರವೇ ಇಲ್ಲ ಎಂದು ಡಾ.ಸುನೀತಾ ತಿಳಿಸಿದರು.

ಎಲ್ಲ ಸಾಮಾನ್ಯ ಸಭೆಯಲ್ಲಿ ರಾಷ್ಟ್ರೀಯ ಹೆದ್ದಾರಿಗೆ ವಿದ್ಯುತ್ ದೀಪ ಅಳವಡಿಸುವ ಬಗ್ಗೆ ಚರ್ಚೆ ನಡೆಯುತ್ತಲೇ ಇದೆ. ಈ ಕುರಿತು 11 ಸಭೆಗಳಲ್ಲಿ ಪತ್ರ ನೀಡಲಾಗಿದೆ. ಆದರೆ ಯಾವುದೇ ಪ್ರಯೋಜನ ಆಗಿಲ್ಲ ಎಂದಾದರೆ ನಮ್ಮ ಸಭೆಗೆ ಬೆಲೆ ಇಲ್ಲವೇ? ಎಂದು ಸದಸ್ಯ ಹರೀಶ್ ಕುಂಪಲ ಹರಿಹಾಯ್ದರು.

ಗೃಹಜ್ಯೋತಿ ಸೌಲಭ್ಯಕ್ಕೆ ಮನೆಗಳಿಗೆ ಭೇಟಿ ನೀಡಿ ಸಮೀಕ್ಷೆ ನಡೆಸಲಾಗುತ್ತಿದೆ. ಆಧಾರ್ ಕಾರ್ಡ್, ಮತದಾರರ ಗುರುತು ಚೀಟಿ, ಪಡಿತರ ಚೀಟಿ, ಭಾವಚಿತ್ರ ಮತ್ತು ಬಾಡಿಗೆ ಮನೆಯ ಕರಾರುಪತ್ರಗಳ ದಾಖಲೆ ಅಗತ್ಯ ಎಂದು ಮೆಸ್ಕಾಂ ಕಿರಿಯ ಅಭಿಯಂತ ನಿತೇಶ್ ಹೊಸಗದ್ದೆ ಮಾಹಿತಿ ನೀಡಿದರು. ಹೊಸ ಸಂಪರ್ಕಕ್ಕೆ 2880 ಚ.ಅ.ಗೆ ಒ.ಸಿ. ಮತ್ತು ಸಿ.ಸಿ. ನೀಡುವುದು ಅಗತ್ಯ. ಆದರೆ ಆ.15ರವರೆಗೆ ಸರ್ಕಾರ ವಿನಾಯಿತಿ ನೀಡಿದೆ. 1200 ಚದರ ಅಡಿ ಜಾಗಕ್ಕೆ ಈ ದಾಖಲೆ ಬೇಡ. ವಿದ್ಯುತ್ ತಂತಿ ತುಂಡಾಗಿ ಬಿದ್ದರೆ ಮುಟ್ಟಲು ಹೋಗದೆ ನಮಗೆ ಕರೆ ಮಾಡಿ ಎಂದು ತಿಳಿಸಿದ್ದು, ಮೆಸ್ಕಾಂಗೆ ಕರೆ ಮಾಡಲು ಹೇಳಬೇಡಿ, ಅಲ್ಲಿ ಕರೆ ಸ್ವೀಕರಿಸುವುದಿಲ್ಲ ಎಂದು ಸದಸ್ಯ ಮನೋಜ್ ಕಟ್ಟೆಮನೆ ವ್ಯಂಗ್ಯವಾಡಿದರು. ಇದು ಗಂಭೀರ ವಿಚಾರವಾಗಿದ್ದು, ವಿದ್ಯುತ್ ವಿಚಾರದಲ್ಲಿ ಯಾರೂ ಅಧಿಕಪ್ರಸಂಗ ಮಾಡಲು ಹೋಗಬೇಡಿ ಎಂದು ಉಪಾಧ್ಯಕ್ಷ ರವಿಶಂಕರ್‌ತಿಳಿಹೇಳಿದರು.

ಪುರಸಭಾ ವ್ಯಾಪ್ತಿಯಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಮೀಸಲಿಟ್ಟ ಜಾಗ ಬೀದಿನಾಯಿ ಸಂರಕ್ಷಣಾ ಕೇಂದ್ರಕ್ಕೆ ವರ್ಗಾಯಿಸಿರುವುದರ ವಿರುದ್ಧ ಧ್ವನಿ ಎತ್ತಿದ ಹರೀಶ್ ಕುಂಪಲ, ಬೀದಿ ನಾಯಿಗಳಿಗೆ ಸೋಮೇಶ್ವರ ಹೊರತು ಬೇರೆ ಜಾಗವೇ ಇಲ್ಲವೇ, ಈ ವಿಷಯದಲ್ಲಿ ನಮಗೇಕೆ ಇಷ್ಟೊಂದು ಆಸಕ್ತಿ ಎಂದು ಪ್ರಶ್ನಿಸಿದರು. ಇದಕ್ಕೆ ಸ್ಥಾಯಿ ಅಧ್ಯಕ್ಷ ಪುರುಷೋತ್ತಮ ಗಟ್ಟಿ, ಸದಸ್ಯ ಮೋಹನ್ ಶೆಟ್ಟಿ ಮತ್ತು ಮನೋಜ್ ಕಟ್ಟೆಮನೆ ಧ್ವನಿಗೂಡಿಸಿದರು. ಜಾಗ ಕಂದಾಯ ಇಲಾಖೆ ಗುರುತಿಸುವುದೇ ಹೊರತು ಪುರಸಭೆಯಲ್ಲ. ಸರ್ಕಾರ ಜಾಗ ಗುರುತಿಸಿದ್ದು, ಜಿಲ್ಲಾಧಿಕಾರಿ ಅವರ ಸೂಚನೆ ಮೇರೆಗೆ ಮೀಸಲಿಡಲಾಗಿದೆ. ಇದು ನಮಗೆ ಸಂಬಂಧಪಟ್ಟದ್ದಲ್ಲ. ಬೇರೆ ಜಾಗ ಇದ್ದರೆ ತೋರಿಸಿ ಎಂದು ಮತ್ತಡಿ ಪ್ರತಿಪಾದಿಸಿದರು. ಮಧ್ಯೆ ಪ್ರವೇಶಿಸಿದ ಉಪಾಧ್ಯಕ್ಷರು ಹಿಂದಿನಂತೆಯೇ ಜಾಗ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ಮೀಸಲಿಡುವಂತೆ ನಿರ್ಣಯ ಕೈಗೊಳ್ಳುವಂತೆ ಸೂಚಿಸಿದರು.

ಹಸಿಕಸ ಸಂಗ್ರಹ ವಾರದಲ್ಲಿ ಎರಡು ದಿನ ಆಗಿರುವುದರಿಂದ ಹುಳ ಆಗಿ ದುರ್ವಾಸನೆ ಬರುತ್ತದೆ. ಈ ಹಿನ್ನೆಲೆಯಲ್ಲಿ ಎರಡು ದಿನ ಬದಲು ಮೂರು ದಿನ ಮಾಡಬೇಕು, ನಮ್ಮಲ್ಲಿ ಸಣ್ಣ ಮನೆಗಳಿದ್ದು, ಜಾಗದ ಕೊರತೆಯಿಂದಾಗಿ ಫ್ರಿಡ್ಜ್‌ನಲ್ಲಿ ಇಡುತ್ತಿರುವುದರಿಂದ ಫ್ರಿಡ್ಜ್‌ಗಳು ಕಸದ ಕೊಂಪೆಯಾಗಿದೆ ಎಂದು ಸದಸ್ಯೆ ಸೋನಾ ಸುಭಾಷಿಣಿ ಗಮನ ಸೆಳೆದರು. ಇದಕ್ಕೆ ಉತ್ತರಿಸಿದ ಹಿರಿಯ ಆರೋಗ್ಯಾಧಿಕಾರಿ ಲಿಲ್ಲಿ ನಾಯರ್, ಈಗಿನ ವ್ಯವಸ್ಥೆಯಲ್ಲಿ ಮೂರು ದಿನ ಸಂಗ್ರಹ ಅಸಾಧ್ಯ ಎಂದು ಉತ್ತರಿಸಿದರು. ಟ್ಯಾಂಕ್ ನೀರು ಕಲುಷಿತಗೊಂಡಿದ್ದು ಶುದ್ಧೀಕರಣಗಕ್ಕಾಗಿ ಸದಸ್ಯ ಪುರುಷೋತ್ತಮ ಶೆಟ್ಟಿ ಪಿಲಾರ್ ಮನವಿ ಮಾಡಿದರು.