ರಾಷ್ಟ್ರೀಯ ಹೆದ್ದಾರಿ ಕತ್ತಲೆಯ ಕೂಪ

ಬೀದಿದೀಪಗಳಿವೆ. ಉಳಿದ ಪ್ರದೇಶದಲ್ಲಿ ಹೆದ್ದಾರಿಗೆ ದೀಪದ ಬೆಳಕಿಲ್ಲ. ನಿತ್ಯ ಸಾವಿರಾರು ವಾಹನಗಳು ಸಂಚರಿಸುವ ಬಿ.ಸಿ. ರೋಡ್-ಮಂಗಳೂರು ಹೆದ್ದಾರಿಗೆ ಇನ್ನೂ ಬೆಳಕಿನ ವ್ಯವಸ್ಥೆ ನೀಡಲು ಹೆದ್ದಾರಿ ಇಲಾಖೆಗೆ ಸಾಧ್ಯವಾಗಿಲ್ಲ. ರಸ್ತೆಗಾಗಿ ಟೋಲ್ ಸಂಗ್ರಹಿತ್ತಿರುವ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರಕ್ಕೆ ಮೂಲ ಸೌಲಭ್ಯವಾದ ಬೀದಿದೀಪ ಒದಗಿಸಲು ಕ್ರಮಕೈಗೊಳ್ಳಲು ಸಾಧ್ಯವಾಗದಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಬಿ.ಸಿ.ರೋಡ್‌ನಿಂದ ಅಡ್ಡಹೊಳೆ ಹೊಸ ಹೆದ್ದಾರಿ ಕಾಮಗಾರಿ ಇತ್ತೀಚೆಗೆ ಬಹುತೇಕ ಮುಕ್ತಾಯವಾಗಿದ್ದು, ಹೆಚ್ಚಿನ ಕಡೆಯಲ್ಲಿ ಬೆಳಕಿನ ವ್ಯವಸ್ಥೆ ಇದೆ. ಜತೆಗೆ, ಬಿ.ಸಿರೋಡ್‌ನಿಂದ ಧರ್ಮಸ್ಥಳ ಕಡೆಗೆ ತೆರಳುವ ರಸ್ತೆಯಲ್ಲಿಯೂ ಬಹುತೇಕ ಕಡೆಯಲ್ಲಿ ಬೆಳಕಿನ ವ್ಯವಸ್ಥೆ ಇದೆ. ಆದರೆ, ಈ ಎರಡೂ ರಸ್ತೆಯಿಂದ ಬಂದವರು ಬಿ.ಸಿ.ರೋಡ್‌ನಿಂದ ಮಂಗಳೂರು ಸಂಚರಿಸಬೇಕಾದರೆ ತಮ್ಮದೇ ವಾಹನಗಳ ಬೆಳಕಿನಲ್ಲಿ ಸಂಚರಿಸುವ ಅನಿವಾರ್ಯತೆ ಇದೆ.

ಮಳೆಯ ಸಂದರ್ಭ ಹೆದ್ದಾರಿಯಲ್ಲಿ ಸಂಚಾರ ಬಹಳಷ್ಟು ಆತಂಕಕಾರಿ. ಬಹುತೇಕ ಕಡೆ ರಸ್ತೆಯಲ್ಲಿ ನೀರು ನಿಂತಿರುವುದರಿಂದ ಬೆಳಕು ಸರಿಯಾಗಿ ಇಲ್ಲದೆ ಸಂಚಾರ ಸಮಸ್ಯೆ ಬಹಳಷ್ಟು ಕಾಡುತ್ತಿದೆ. ಕಡಿದಾದ ರಸ್ತೆ ಇದಾಗಿರುವುದರಿಂದ ಕೊಂಚ ಎಚ್ಚರ ತಪ್ಪಿದರೂ ಅಪಾಯ ಕಟ್ಟಿಟ್ಟ ಬುತ್ತಿ.

ಈ ಹೆದ್ದಾರಿಯಲ್ಲಿ ಬೀದಿದೀಪಗಳಿಲ್ಲದ ಕಾರಣ ರಸ್ತೆ ದಾಟುವಾಗ ಬಹಳಷ್ಟು ಎಚ್ಚರ ವಹಿಸಬೇಕಾಗುತ್ತದೆ. ವಾಹನಗಳ ಹೆಡ್ ಲೈಟ್‌ನಲ್ಲಿ ಕೆಲವೊಮ್ಮೆ ಸ್ಪಷ್ಟವಾಗಿ ಕಾಣದ ಕಾರಣದಿಂದ ಅಪಾಯ ಸಾಧ್ಯತೆ ಜಾಸ್ತಿ ಇರುತ್ತದೆ. ಅವಸರವಾಗಿ ಹೆದ್ದಾರಿ ದಾಟಲು ಪ್ರಯತ್ನಿಸುವುದು ಜೀವಕ್ಕೆ ಸಂಚಕಾರ ತರಬಹುದು. ರಾತ್ರಿ ವೇಳೆ ರಸ್ತೆ ದಾಟುತ್ತಿದ್ದ ವೇಳೆ ಮಹಿಳೆಯೊಬ್ಬರು ಅಪಘಾತಕ್ಕೀಡಾಗಿ ಮೃತಪಟ್ಟ ಘಟನೆ ಇತ್ತೀಚೆಗೆ ಹತ್ತನೆ ಮೈಲು ಬಳಿ ನಡೆದಿತ್ತು.

ರಾಷ್ಟ್ರೀಯ ಹೆದ್ದಾರಿಯಲ್ಲಿ ಬೀದಿ ದೀಪಗಳು ಇಲ್ಲದೆ ಹೆದ್ದಾರಿ ಕತ್ತಲೆಯಿಂದ ಆವರಿಸಿದೆ. ಅವಧಿ ಮೀರಿದ ಬಳಿಕವೂ ಟೋಲ್ ಸಂಗ್ರಹಿಸುತ್ತಿರುವ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಈ ಬಗ್ಗೆ ಯಾಕೆ ಗಮನ ಹರಿಸುತ್ತಿಲ್ಲ?

— ನವಾಝ್ ರಾಮಲ್‌ಕಟ್ಟೆ