ಮಡ್ಯಾರ್ ರಸ್ತೆ ವಿಚಾರವೇ ಚರ್ಚೆ

ಕೋಟೆಕಾರ್ ಪಟ್ಟಣ ಪಂಚಾಯಿತಿ ಸಾಮಾನ್ಯ ಸಭೆ ಅಧ್ಯಕ್ಷೆ ದಿವ್ಯಾ ಶೆಟ್ಟಿ ಅಧ್ಯಕ್ಷತೆಯಲ್ಲಿ ಬುಧವಾರ ನಡೆಯಿತು. ಮಡ್ಯಾರ್ ರಸ್ತೆ ಕಾಮಗಾರಿ ವಿಚಾರದಲ್ಲಿ ಸ್ಥಳೀಯ ಸದಸ್ಯ ಹಾಗೂ ಅಧ್ಯಕ್ಷರ ನಡುವೆ ವಾಕ್ಸಮರ ನಡೆದಿದ್ದು, ಅಧ್ಯಕ್ಷರು ಹಠಕ್ಕೆ ಬಿದ್ದ ಹಿನ್ನೆಲೆಯಲ್ಲಿ ಸದಸ್ಯಧರಣಿ ನಡೆಸಿದ ಪ್ರಸಂಗ ನಡೆಯಿತು. ಇದೇ ವೇಳೆ ರಾಷ್ಟ್ರೀಯ ಹೆದ್ದಾರಿಯ ಸಮಸ್ಯೆಗಳ ಸದಸ್ಯರೊಬ್ಬರು ಪ್ರಸ್ತಾಪಿಸಿದರೂ ಈ ಬಗ್ಗೆ ಗಂಭೀರ ಚರ್ಚೆ ನಡೆಯಲೇ ಇಲ್ಲ!

ರಸ್ತೆಗೆ ಅಧ್ಯಕ್ಷರು ಅನುದಾನ ಇಟ್ಟರೂ ವಾರ್ಡ್ ಸದಸ್ಯರಿಗೆ ತಿಳಿಸಬೇಕು. ಆದರೆ ನೀವೇ ಹೋಗಿ ನಮಗೆ ಮಾಹಿತಿ ನೀಡದೆ ಕಾಮಗಾರಿ ಆರಂಭಿಸಿದ್ದೀರಿ. ವಾರ್ಡ್ ಅಭಿವೃದ್ಧಿ ಬಗ್ಗೆ ಸಂತೋಷ ಇದೆ. ಆದರೆ ನೀಡುವುದು ಬಿಟ್ಟು ಕಾಮಗಾರಿ ನಡೆಸಲು ಮುಂದಾಗಿ ಗೊಂದಲ ಸೃಷ್ಟಿಸಿದ್ದೀರಿ ಎಂದು ಪಕ್ಷೇತರ ಸದಸ್ಯ ಹರೀಶ್ ರಾವ್, 11ನೇ ವಾರ್ಡ್ ನಡಾರ್ ಮಡ್ಯಾರ್ ರಾಮಾಶ್ರಯ ರಸ್ತೆ ಕಾಮಗಾರಿ ಬಗ್ಗೆ ಪ್ರಸ್ತಾಪಿಸಿದರು. ಇದುವರೆಗೆ ವಾರ್ಡ್‌ನಲ್ಲಿ ಗುದ್ದಲಿಪೂಜೆ ನಡೆಸುವಾಗ ನನ್ನ ಗಮನಕ್ಕೂ ತಂದಿಲ್ಲ. ಕೆಲಸ ಆರಂಭಿಸಿದ ಮೂರು ದಿನಗಳ ಬಳಿಕ ಕಾಂಗ್ರೆಸ್ ಮುಖಂಡ ಆಲ್ವಿನ್ ಕರೆ ಮಾಡಿದ್ದಾರೆ. ಕ್ರೈಸ್ತರೊಬ್ಬರ ಮನೆ ಬಿಟ್ಟು ಕಾಮಗಾರಿ ಮಾಡುತ್ತಿದ್ದಾರೆಂದು ಸ್ಪೀಕರ್ ಕರೆ ಮಾಡಿದ್ದಾಗಿ ಇಂಜಿನಿಯರ್ ತಿಳಿಸಿದ್ದಾರೆ. ನಮಗೆ ಕರೆ ಮಾಡುವ ಬದಲು ಸ್ಪೀಕರ್ ಇತರರಿಗೆ ಕರೆ ಮಾಡಿ ಕೆಲಸ ನಿಲ್ಲಿಸುವ ಸಾಮರ್ಥ್ಯ ಆ ಮನೆಯವರಿಗೆ ಇದೆ ಎಂದಾದರೆ ಅವರೇ ಕಾಮಗಾರಿ ಮುಂದುವರಿಸಲಿ. ಇಲ್ಲವೇ ಯಾರೂ ಬೇಕಾದರೂ ಮಾಡಿಸಲಿ. ಅಲ್ಲಿ ಕೋಮು ಬಣ್ಣ ತಂದ ಬಳಿಕ ನನಗೆ ಎಷ್ಟು ಬೇಕೋ ಅಷ್ಟೇ ಕಾಮಗಾರಿ ಮಾಡಿಸುತ್ತೇನೆಂದು ಅಧ್ಯಕ್ಷೆ ದಿವ್ಯಾ ತಮ್ಮ ನಿಲುವು ತಿಳಿಸಿದರು.

ನೀವು ಹಿಂದೂ, ಕ್ರಿಶ್ಚಿಯನ್, ಮುಸ್ಲಿಂ ಎಂದು ಧರ್ಮ ಎಳೆದು ತಂದು ವಿಷಯ ತಿರುಗಿಸಬೇಡಿ. ಅಲ್ಲಿ ಕೋಮು ಬಣ್ಣ ನೀವೇ ತಂದಿದ್ದೀರಿ. ನೀವು ಕೊರಗಜ್ಜನ ಕಟ್ಟೆಯಲ್ಲೂ ರಾಜಕೀಯ ಮಾಡಿದ್ದರಿಂದ ಸಂಬಂಧಪಟ್ಟವರು ನಿಮ್ಮ ಅನುದಾನವೇ ಬೇಡ ಎಂದು ಪತ್ರ ಬರೆಯುವಂಥ ಪರಿಸ್ಥಿತಿ ಬಂದಿದೆ. ನಿಮ್ಮ ಸ್ವಂತ ಅಥವಾ ಪಕ್ಷದ ಹಣದಿಂದ ರಸ್ತೆ ಮಾಡುತ್ತಿಲ್ಲ. ಜನ ತೆರಿಗೆ ಪಾವತಿಸುತ್ತಾರೆ. ಎಲ್ಲಾ ಕಡೆ ರಾಜಕೀಯ ಮಾಡುತ್ತಾ ಹೋಗಬೇಡಿ ಎಂದು ಹರೀಶ್ ಆಕ್ರೋಶ ವ್ಯಕ್ತಪಡಿಸಿದರು.

ಸ್ಪೀಕರ್ ಕರೆ ಮಾಡಿ ಕಾಮಗಾರಿ ಪರಿಶೀಲಿಸುವಂತೆ ಸೂಚನೆ ನೀಡಿದ್ದಾಗಿ ಮುಖ್ಯಾಧಿಕಾರಿ ಮಾಲಿನಿ ಮಾಹಿತಿ ನೀಡಿದರು.

ರಸ್ತೆಗೆ ಅನುದಾನ ಇಟ್ಟು ಕಾಮಗಾರಿ ನಡೆಸುವಾಗ ತಾರತಮ್ಯ ಸರಿಯಲ್ಲ. ನೀವು ನಿಮ್ಮ ಸ್ಥಾನದ ಗೌರವ ಉಳಿಸಿಕೊಳ್ಳಬೇಕಿದೆ ಎಂದು ಕಾಂಗ್ರೆಸ್ ಸದಸ್ಯ ಅಹ್ಮದ್ ಅಜ್ಜಿನಡ್ಕ ತಿಳಿಹೇಳಿದಾಗಲೂ ಅಧ್ಯಕ್ಷರು ಹಠಕ್ಕೆ ಬಿದ್ದಾಗ ಆನೆ ನಡೆದದ್ದೇ ದಾರಿ ಎಂದಾದರೆ ಏನೂ ಮಾಡಲಾಗದು ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ಉಪಾಧ್ಯಕ್ಷ ಪ್ರವೀಣ್ ಬಗಂಬಿಲ, ಸ್ಥಾಯಿ ಸಮಿತಿ ಅಧ್ಯಕ್ಷ ಧೀರಜ್ ಕೊಂಡಾಣ, ಮುಖ್ಯಾಧಿಕಾರಿ ಮಾಲಿನಿ ಉಪಸ್ಥಿತರಿದ್ದರು.

ಸಭೆಯಲ್ಲಿ ಸದಸ್ಯರು ರಾ.ಹೆ. ಸಮಸ್ಯೆ ಬಗ್ಗೆ ಪ್ರಸ್ತಾಪಿಸಿದರು. ಡಿಪಿಆರ್ ಆಗಿಲ್ಲ ಎದು ಸಹಾಯಕ ಹೆದ್ದಾರಿ ಅಭಿಯಂತ ವಿಘ್ನೇಶ್ ಉತ್ತರಿಸಿದರು. ತೊಕ್ಕೊಟ್ಟಿನಿಂದ ತಲಪಾಡಿವರೆಗೆ ಸರ್ವೀಸ್ ರಸ್ತೆ ಅಸಮರ್ಪಕವಾಗಿದೆ. ಬೈಪಾಸ್‌ನಲ್ಲಿ ಸಾಕಷ್ಟು ಅಪಘಾತಗಳು ಸಂಭವಿಸಿವೆ. ಡಿಪಿಆರ್‌ನಲ್ಲಿ ಸರ್ವೀಸ್ ರಸ್ತೆಯೂ ಬರುತ್ತದೆ, ಆದರೆ ಈಗ ಡಿಪಿಆರ್ ಆಗಿಲ್ಲ ಎಂದು ಹೇಳುತ್ತಿದ್ದೀರಿ. ಶೇ.100 ರಸ್ತೆ ಆಗದೆ ಟೋಲ್ ಯಾಕೆ ಸಂಗ್ರಹ ಮಾಡುತ್ತಿದ್ದೀರಿ. ರಾಷ್ಟ್ರೀಯ ಹೆದ್ದಾರಿಯಲ್ಲಿ ಮಳೆಗಾಲದಲ್ಲಿ ನೀರಿನ ಹರಿಯುವ. ಚರಂಡಿ ಸಮಸ್ಯೆ, ದಾರಿದೀಪ ಸಮಸ್ಯೆ ಇದ್ದು, ಈ ಬಗ್ಗೆ ಅಧಿಕಾರಿಗಳಿಗೆ ನೀಡಿದ ಮನವಿಗಳು ಏನಾಗಿದೆ ಎಂದು ಬಿಜೆಪಿಯ ಉಚ್ಛಾಟಿತ ಸದಸ್ಯ ಸುಜಿತ್ ಮಾಡೂರು ಪ್ರಶ್ನಿಸಿದರು. ಇದೊಂದು ಗಂಭೀರ ಸಮಸ್ಯೆಯಾಗಿದ್ದರೂ ಇತರ ಸದಸ್ಯರಿಂದ ನಿರೀಕ್ಷಿತ ಬೆಂಬಲ ಸಿಗದ ಕಾರಣ ಹೆಚ್ಚು ಚರ್ಚೆ ನಡೆಯಲಿಲ್ಲ.

ಪಂಚಾಯಿತಿ ಅಧಿಕಾರಿಯೇ ಆಗಿರುವ ಕಂದಾಯ ನಿರೀಕ್ಷಕರು ಒಂದೇ ಒಂದು ಸಭೆಗೂ ಬರುವುದಿಲ್ಲ ಎಂದರೆ ಹೇಗೆ? ಅವರನ್ನು ಕೇಳುವವರು ಯಾರೂ ಇಲ್ಲವೇ ಎಂದು ಸುಜಿತ್ ಪ್ರಶ್ನಿಸಿದರು. ಅಧಿಕಾರಿ ವಾರಕ್ಕೆರಡು ದಿನ ಪಂಚಾಯಿತಿಯಲ್ಲೇ ಇರುತ್ತಾರಲ್ವಾ? ಸಮಸ್ಯೆ ಇದ್ದರೆ ಅವರಲ್ಲಿ ಹೇಳಬಹುದಲ್ಲವೇ ಎಂದು ಆರ್.ಐ.ಗೈರಿನ ಬಗ್ಗೆ ಧೀರಜ್ ಸಮರ್ಥನೆ ನೀಡಿದರು. ಕೆರಳಿದ ಸುಜಿತ್, ನೀವು ಸ್ಥಾಯಿ ಸಮಿತಿಗೆ ಸಂಬಂಧಪಟ್ಟ ವಿಷಯದ ಬಗ್ಗೆ ಮಾತ್ರ ಉತ್ತರ ನೀಡಿ. ಎಲ್ಲಕ್ಕೂ ನೀವು ಉತ್ತರಿಸುವುದಾದರೆ ಅಧ್ಯಕ್ಷರು ಏಕೆ ಎಂದರು. ಆರ್.ಐ. ಸಭೆಯ ಮುಗಿಯುವ ಮೊದಲು ಬರುತ್ತಾರೆಂದು ಅಧ್ಯಕ್ಷರು ಸಮಜಾಯಿಷಿ ನೀಡಿದ ಬಳಿಕ ಚರ್ಚೆಗೆ ಅಂತ್ಯ ಹಾಡಲಾಯಿತು.