ಕೆದಂಬಾಡಿ ಶಾಲೆ ಮೈದಾನವೇ ಡೇಂಜರ್

ಕೆದಂಬಾಡಿ ಗ್ರಾಮದ ಸನ್ಯಾಸಿಗುಡ್ಡೆಯಲ್ಲಿರುವ ಕೆದಂಬಾಡಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಆಟದ ಮೈದಾನ ವಿಸ್ತರಣೆಗಾಗಿ ಅವೈಜ್ಞಾನಿಕ ರೀತಿಯಲ್ಲಿ ರಾಶಿ ರಾಶಿ ಮಣ್ಣು ತುಂಬಿಸಿದ್ದು, ಅನಾಹುತಕ್ಕೆ ಆಹ್ವಾನ ನೀಡುತ್ತಿದೆ.

ಮಕ್ಕಳ ಕ್ರೀಡಾಕೂಟಕ್ಕೆ ಅನುಕೂಲವಾಗುಂತೆ ಟ್ರ್ಯಾಕ್ ರಚನೆ ಹಾಗೂ ಕೃಷಿ ತೋಟ ನಿರ್ವಾಣ ಉದ್ದೇಶ ಇಟ್ಟುಕೊಂಡು ಶಾಲಾ ಎಸ್‌ಡಿಎಂಸಿಯಲ್ಲಿ ನಿರ್ಣಯ ಕೈಗೊಂಡು ಆಟದ ಮೈದಾನದ ವಿಸ್ತರಣೆ ಮಾಡಲಾಗುತ್ತಿದೆ. ಖಾಸಗಿ ಜಮೀನಿನ ಮಣ್ಣನ್ನು ಸತತವಾಗಿ ತಂದು ಮೈದಾನದ ಬದಿಯ ಇಳಿಜಾರು ಭಾಗಕ್ಕೆ ಸುರಿಯಲಾಗಿದೆ. ಆದರೆ ನೀರು ಹರಿದುಹೋಗಲು ಸೂಕ್ತ ವ್ಯವಸ್ಥೆ ಹಾಗೂ ಮಣ್ಣು ಕೊಚ್ಚಿಹೋಗದಂತೆ ಕ್ರಮ ಕೈಗೊಳ್ಳದೆ ಅವೈಜ್ಞಾನಿಕವಾಗಿ ಕಾಮಗಾರಿ ನಡೆಸಿರುವುದು ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ.

ಮೈದಾನದಲ್ಲಿ 20 ಅಡಿಗಿಂತಲೂ ಹೆಚ್ಚು ಎತ್ತರಕ್ಕೆ ಮಣ್ಣು ತುಂಬಿಸಲಾಗಿದೆ. ಆದರೆ ಮಳೆ ನೀರಿನ ಹರಿವಿಗೆ ಕ್ರಮವಹಿಸಿಲ್ಲ. ಇತ್ತೀಚೆಗೆ ಸುರಿದ ಒಂದೆರಡು ಮಳೆಗಳಿಗೆ ಮಣ್ಣು ತುಂಬಿದ ಭಾಗದಲ್ಲಿ ಬಿರುಕು ಬಿಟ್ಟಿದ್ದು ಮಳೆ ನೀರಿನೊಂದಿಗೆ ಮಣ್ಣು ಕೊಚ್ಚಿಹೋಗಲು ಆರಂಭವಾಗಿದೆ.

ಮೈದಾನದ ಕೆಳಭಾಗದಲ್ಲಿ ಸ್ಥಳೀಯ ನಿವಾಸಿಗಳ ಕೃಷಿ ತೋಟಗಳಿದ್ದು ಮಣ್ಣು ಕುಸಿದರೆ ಲಕ್ಷಾಂತರ ರೂ. ಮೌಲ್ಯದ ಕೃಷಿ, ಆಸ್ತ್ತಿಗಳು ನಾಶವಾಗುವ ಭೀತಿ ಎದುರಾಗಿದೆ. ಜತೆಗೆ ಪಕ್ಕದಲ್ಲಿರುವ ಸಾರ್ವಜನಿಕ ಸಂಪರ್ಕ ರಸ್ತೆಗೆ ಮಣ್ಣು ಬಿದ್ದು ಸಂಪರ್ಕ ಕಡಿತಗೊಳ್ಳುವ ಸಾಧ್ಯತೆಯೂ ಎದುರಾಗಿದೆ.

ಕಾಮಗಾರಿಗೆ ಸಂಬಂಧಿಸಿ ಇಂಜಿನಿಯರ್ ಅವರಿಂದ ಸೂಕ್ತ ರೀತಿಯಲ್ಲಿ ಅಂದಾಜುಪಟ್ಟಿ ತಯಾರಿಸಿಕೊಂಡು ಬಳಿಕ ಮಣ್ಣು ಸುರಿಯಬೇಕಿತ್ತು. ಆದರೆ ಶಾಲಾ ಮೈದಾನದಲ್ಲಿ ಅವೈಜ್ಞಾನಿಕವಾಗಿ ಮಣ್ಣು ಸುರಿಯಲಾಗಿದೆ. ಮುಂದಿನ ದಿನಗಳಲ್ಲಿ ಮೈದಾನದಲ್ಲಿ ಭಾರಿ ಅಪಾಯ ಎದುರಾಗುವ ಸಂಭವ ಇದ್ದು, ಮಕ್ಕಳು ಆಟಕ್ಕೆಂದು ಮೈದಾನಕ್ಕೆ ಇಳಿಯುವುದು ಅಪಾಯಕಾರಿಯಾಗಿದೆ. ಶಾಲಾ ಆಡಳಿತ ಮಂಡಳಿ, ಸಂಬಂಧಿತ ಇಲಾಖೆಯ ಅಧಿಕಾರಿಗಳು ಕೂಡಲೇ ಎಚ್ಚೆತ್ತುಕೊಂಡು ಪೂರ್ಣಪ್ರಮಾಣದ ಮಳೆಗಾಲ ಆರಂಭಕ್ಕೂ ಮೊದಲೇ ಮುಂಜಾಗ್ರತಾ ಕ್ರಮಕೈಗೊಳ್ಳಬೇಕು. ಮಳೆ ಸುರಿದಾಗ ಮಣ್ಣು ಕುಸಿಯದಂತೆ ವ್ಯವಸ್ಥೆ ಮಾಡುವುದರ ಜತೆಗೆ ನೀರು ಹರಿದು ಹೋಗಲು ಶಾಶ್ವತ ಕಾಲುವೆ ನಿರ್ಮಿಸಬೇಕು ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.

ಕೆದಂಬಾಡಿ ಸರ್ಕಾರಿ ಶಾಲೆಯ ಆಟದ ಮೈದಾನದ ವಿಸ್ತರಣೆಯ ಅವೈಜ್ಞಾನಿಕ ಕಾಮಗಾರಿ ಕುರಿತು ಸ್ಥಳೀಯರು ಗ್ರಾಮ ಪಂಚಾಯಿತಿಗೆ ದೂರು ನೀಡಿದ್ದು, ಸ್ಪಂದಿಸಿದ ಪಿಡಿಒ ಲಾವಣ್ಯ ಪಿ. ಹಾಗೂ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ. ಸಂಭಾವ್ಯ ಅಪಾಯ ತಪ್ಪಿಸುವುದಕ್ಕಾಗಿ ಪರಿಶೀಲಿಸಿ ಕ್ರಮಕೈಗೊಳ್ಳುವಂತೆ ಕೆದಂಬಾಡಿ ಗ್ರಾ.ಪಂ. ವತಿಯಿಂದ ತಾ.ಪಂ. ಕಾರ್ಯನಿರ್ವಹಣಾಧಿಕಾರಿಗೆ ಮನವಿ ಮಾಡಿದಾರೆ. ಜತೆಗೆ ಕ್ಷೇತ್ರ ಶಿಕ್ಷಣಾಧಿಕಾರಿಗೂ ಪತ್ರ ಸಲ್ಲಿಸಿದ್ದಾರೆ.

ಶಾಲಾ ಆಟದ ಮೈದಾನ ವಿಸ್ತರಣೆಯ ಅವೈಜ್ಞಾನಿಕ ಕಾಮಗಾರಿ ಕುರಿತು ಸ್ಥಳೀಯ ಕೃಷಿಕರು ಸಹಾಯಕ ಕಮಿಷನರ್‌ಗೆ ದೂರು ನೀಡಿದ್ದಾರೆ. ಮುಂಜಾಗ್ರತಾ ಕ್ರಮ ಕೈಗೊಳ್ಳದೆ ಮೈದಾನದಲ್ಲಿ ಮಣ್ಣು ತುಂಬಿಸಿದ್ದರಿಂದ ಮಳೆಗಾಲದಲ್ಲಿ ನೀರು ಹರಿಯಲು ಜಾಗವಿಲ್ಲದೆ ಮಣ್ಣು ಕೃಷಿ ತೋಟಗಳಿಗೆ, ಸಾರ್ವಜನಿಕ ರಸ್ತೆಗೆ ಅಪಾಯ ತಂದೊಡ್ಡುವ ಸಾಧ್ಯತೆ ಇದೆ. ಸ್ಥಳ ಪರಿಶೀಲನೆ ನಡೆಸಿ ಸೂಕ್ತ ಕ್ರಮ ಕೈಗೊಳ್ಳಬೇಕು. ಕೃಷಿ ಹಾನಿ ಸಂಭವಿಸಿದರೆ ಪರಿಹಾರ ನೀಡಬೇಕು ಎಂದು ಮನವಿಯಲ್ಲಿ ಒತ್ತಾಯಿಸಿದ್ದಾರೆ. ರಾವ ಗೌಡ ಕೆರೆಮೂಲೆ, ಗಣಪತಿ ಭಟ್ ಸನ್ಯಾಸಿಗುಡ್ಡೆ, ರಾಜೀವ ರೈ ಕೋರಂಗ, ಪುಷ್ಪಾವತಿ ಶೀನಪ್ಪ ಗೌಡ, ದಿನಕರ ರೈ ವಾಣಿಪ್ಪಾಡಿ, ಕರುಣಾಕರ ರೈ ಕೋರಂಗ, ಸುರೇಶ್ ರೈವಾಣಿಪ್ಪಾಡಿ, ಕರುಣಾಕರ ರೈ ಅತ್ರೆಜಾಲು ಮೊದಲಾದ ಕೃಷಿಕರು ಮನವಿ ಸಲ್ಲಿಸಿದ್ದಾರೆ.

ಆಟದ ಮೈದಾನ ವಿಸ್ತರಣೆ, ಶಾಲಾ ಮಕ್ಕಳ ಕ್ರೀಡಾಕೂಟಕ್ಕೆ ಅನುಕೂಲವಾಗುಂತೆ ಟ್ರ್ಯಾಕ್ ರಚನೆ ಹಾಗೂ ಶಾಲಾ ಕೃಷಿ ತೋಟ ನಿರ್ವಾಣದ ಉದ್ದೇಶ ಇಟ್ಟುಕೊಂಡು ಎಸ್‌ಡಿಎಂಸಿ ಕೈಗೊಂಡ ನಿರ್ಣಯದಂತೆ ಮಣ್ಣು ಹಾಕಲಾಗಿದೆ. ಮುಂದಿನ ದಿನಗಳಲ್ಲಿ ಯಾರಿಗೂ ತೊಂದರೆಯಾಗದಂತೆ ಸೂಕ್ತ ವ್ಯವಸ್ಥೆ ಮಾಡಲಾಗುವುದು.

— ಕೃಷ್ಣ ಕುವಾರ್ ಇದ್ಯಪೆ, ಕೆದಂಬಾಡಿ ಶಾಲೆ ಎಸ್‌ಡಿಎಂಸಿ ಅಧ್ಯಕ್ಷ