ಕುಸಿವ ಹಂತದಲ್ಲಿ ಗುಡ್ಡಗಳು!

ಇನ್ನೇನು ಕೆಲವೇ ದಿನಗಳಲ್ಲಿ ಜಿಲ್ಲೆಗೆ ಮಳೆಗಾಲ ಪ್ರವೇಶಿಸಲಿದ್ದು, ರಾಷ್ಟ್ರೀಯ ಹೆದ್ದಾರಿ 169ರ ಚತುಷ್ಪಥ ವಿಸ್ತರಣೆ ಕಾಮಗಾರಿ ನಡೆದಿರುವ ಕುಡುಪು, ಕೆತ್ತಿಕಲ್, ನೂಯಿ, ಕೈಕಂಬ ಜಂಕ್ಷನ್, ಗಂಜಿಮಠ-ಎಡಪದವು ಪ್ರದೇಶದಲ್ಲಿ ದೊಡ್ಡಮಟ್ಟದ ಪ್ರಕೃತಿ ವಿಕೋಪ ಸಂಭವಿಸುವ ಸಾಧ್ಯತೆ ಇದೆ. ಇಲ್ಲೆಲ್ಲ ಗುಡ್ಡದ ನೀರು ಸರಾಗವಾಗಿ ಹರಿದಾಡಲು ಸೂಕ್ತ ಚರಂಡಿ ವ್ಯವಸ್ಥೆ ಇಲ್ಲದಿರುವುದು ಜನರ ಆತಂಕಕ್ಕೆ ಕಾರಣವಾಗಿದೆ.

ಕಳೆದ ಮೂರು ವರ್ಷಗಳಿಂದ ಕೆತ್ತಿಕಲ್ ಗುಡ್ಡ ಪ್ರದೇಶದಲ್ಲಿ ಹೆದ್ದಾರಿ ವಿಸ್ತರಣೆ ಕಾಮಗಾರಿ ನಡೆಯುತ್ತಲೇ ಇದೆ. ಗುಡ್ಡ ಕುಸಿತ ತಡೆಯಲು ಗ್ಯಾಬಿಯನ್ ವಾಲ್ ನಿರ್ಮಿಸಲಾಗಿದೆ. ಗುಡ್ಡದ ಮೇಲ್ಗಡೆ ವಸತಿ ಬಡಾವಣೆ ಹಾಗೂ ಸಂಪರ್ಕ ರಸ್ತೆಯೊಂದಿದೆ. ಎರಡು ವರ್ಷಗಳ ಹಿಂದೆ ಮಳೆಗಾಲದಲ್ಲಿ ಸಂಪರ್ಕ ರಸ್ತೆಯವರೆಗೆ ಗುಡ್ಡ ಕುಸಿದಿದ್ದು, 9 ಮನೆ ಖಾಲಿ ಮಾಡಿಸಲಾಗಿತ್ತು. ಆ ಕುಟುಂಬಗಳಿಗೆ ಇನ್ನೂ ಸೂಕ್ತ ಪರಿಹಾರ ಸಿಕ್ಕಿಲ್ಲ. ಕಳೆದ ವರ್ಷ ತಿರುವೈಲು ಶಾಲೆಯ ಬಳಿ ಹಾಗೂ ಪರಾರಿಗೆ ಹತ್ತಿರದಲ್ಲಿ ಕೆತ್ತಿಕಲ್ ಗುಡ್ಡ ಕುಸಿದಿತ್ತು. ಆ ವೇಳೆ ಗುಡ್ಡದ ರಕ್ಷಣೆಗೆ ಹಾಸಲಾದ ಅತ್ಯಾಧುನಿಕ ತಂತ್ರಜ್ಞಾನದ ಕಾಮಗಾರಿ ನೆಲಸಮಗೊಂಡಿತ್ತು. ಇಲ್ಲಿ ಈಗ ಚತುಷ್ಪಥದಲ್ಲಿ ದ್ವಿಪಥ ಕಾಮಗಾರಿ ಮುಗಿದಿದ್ದು, ಗ್ಯಾಬಿಯನ್ ವಾಲ್‌ಗೆ ಹತ್ತಿರದಲ್ಲಿ ಮತ್ತೊಂದು ದ್ವಿಪಥ ನಿರ್ಮಾಣ ಕಾರ್ಯ ಮುಂದುವರಿದಿದೆ. ಮಳೆಗಾಲಕ್ಕೆ ಮುಂಚೆ ಇಲ್ಲೆಲ್ಲ ಸೂಕ್ತ ರಕ್ಷಣಾ ಕಾಮಗಾರಿ ನಡೆಯದೆ ಹೋದಲ್ಲಿ ಪ್ರಕೃತಿ ವಿಕೋಪದ ದೃಷ್ಟಾಂತಗಳು ಹೆಚ್ಚು ದೂರದಲ್ಲಿಲ್ಲ.

ಗಂಜಿಮಠದಿಂದ ಮುಂದೆ ಸಾಗಿದಾಗ ಎಡಪದವಿಗೆ ಹತ್ತಿರದ ಮುಚ್ಚೂರು ಕ್ರಾಸ್‌ನಲ್ಲಿ ಕಳೆದ ವರ್ಷ ಹಳೇ ರಸ್ತೆ ಬದಿಯಲ್ಲಿ ಗುಡ್ಡ ಕುಸಿತ ಸಂಭವಿಸಿತ್ತು. ಹಳೇ ರಸ್ತೆ ತೆರವುಗೊಳಿಸಿ, ಮುಚ್ಚೂರು ಕ್ರಾಸ್‌ನಲ್ಲಿ ಓವರ್‌ಪಾಸ್ ನಿರ್ಮಾಣದೊಂದಿಗೆ ಹೆದ್ದಾರಿ ಚತುಷ್ಪಥ ಕಾಮಗಾರಿ ನಡೆಯುತ್ತಿದೆ. ಗುಡ್ಡ ಪ್ರದೇಶವಾದ ಇಲ್ಲಿ ಕೆತ್ತಿಕಲ್‌ನಂತೆ ಎರಡೂ ಬದಿಯಲ್ಲಿ ಇಳಿಜಾರಾಗಿದ್ದು, ಮಳೆಗಾಲದ ಕುಸಿತ ಸಾಧ್ಯತೆ ಇದೆ. ಇಲ್ಲಿ ಗುಡ್ಡದ ನೀರು ಹರಿಯಲು ಚರಂಡಿ ವ್ಯವಸ್ಥೆಯಾಗಿಲ್ಲ. ಹಳೆಯ ರಸ್ತೆ ಬದಿಗೆ ರಕ್ಷಣಾ ಗೋಡೆ ನಿರ್ಮಿಸದೆ ಹೋದಲ್ಲಿ ಮೇಲ್ಭಾಗದ ಮನೆಗಳ ಸಹಿತ ಗುಡ್ಡದ ಮಣ್ಣು ಹೊಸ ರಸ್ತೆ ಮೇಲೆ ಬೀಳಲಿದೆ. ಇಲ್ಲಿ ಅತಿ ಆಳದಲ್ಲಿ ಹೆದ್ದಾರಿ ನಿರ್ಮಿಸಲಾಗಿದೆ.

ಚತುಷ್ಪಥ ಕಾಮಗಾರಿ ಮುಂದುವರಿದಿರುವ ಪೊಳಲಿ ದ್ವಾರಕ್ಕೆ ಹತ್ತಿರದ ನೂಯಿ ಗುಡ್ಡ ಪ್ರದೇಶ, ಕುಡುಪುವಿಗೆ ಹತ್ತಿರದ ಕಡಿದಾದ ಗುಡ್ಡ ಪ್ರದೇಶದ ಅಪೂರ್ಣ ಕಾಮಗಾರಿಯು ಅಪಾಯಕ್ಕೆ ಆಹ್ವಾನ ನೀಡುವಂತಿದೆ. ಗುಡ್ಡ ಪ್ರದೇಶದಲ್ಲೇ ಬಹುತೇಕ ಹೆದ್ದಾರಿ ಕಾಮಗಾರಿ ನಡೆದಿದೆ. ಹಾಗಾಗಿ ಸಹಜವೆಂಬಂತೆ ಪ್ರಕೃತಿ ಮುನಿಸು ಇದ್ದೇ ಇರುತ್ತದೆ. ಕೆಲವು ಭಾಗದಲ್ಲಿ ಅವೈಜ್ಞಾನಿಕ ರೀತಿಯಲ್ಲಿ ಗುಡ್ಡ ಅಗೆದು ಮಣ್ಣು ರಾಶಿ ಹಾಕಲಾಗಿದೆ. ಜನಸಾಮಾನ್ಯರು ಮಳೆ ನೀರಿನ ಅಪಾಯ ಅನುಭವಿಸಬೇಕಾಗುತ್ತದೆ.

ಗುರುಪುರ ಕೈಕಂಬದಲ್ಲಿ ಅಲ್ಲಲ್ಲಿ ಚರಂಡಿ ನಿರ್ಮಿಸಲಾಗುತ್ತಿದ್ದರೂ, ಅಗಲ ಕಿರಿದಾದ ಈ ಚರಂಡಿಯಲ್ಲಿ ಮಳೆ ನೀರು ಉಕ್ಕಿ ಹರಿಯಲಿದೆ. ಅಂತಹ ಸಂದರ್ಭಗಳಲ್ಲಿ ಕೈಕಂಬ ಜಂಕ್ಷನ್‌ನ ತಗ್ಗು ಪ್ರದೇಶದ ಅಂಗಡಿ ಮುಂಗಟ್ಟು ನೀರಲ್ಲಿ ಮುಳುಗಡೆಯಾಗಲಿವೆ. ಕೃತಕ ನೆರೆ ಎದುರಿಸಲು ಅಂಗಡಿಯವರು ಸಿದ್ಧತೆ ನಡೆಸಿದ್ದಾರೆ. ಹೆದ್ದಾರಿಯ ಅಲ್ಲಲ್ಲಿ ಕೃತಕ ನೆರೆಯಲ್ಲದೆ, ಚರಂಡಿರಹಿತ ಹೆದ್ದಾರಿಯಲ್ಲಿ ಮಳೆ ನೀರು ಹರಿಯಲಿದೆ. ಇದರಿಂದ ಸಾರ್ವಜನಿಕರು ತೀವ್ರ ತೊಂದರೆ ಎದುರಿಸಬೇಕಾಗುತ್ತದೆ.

ಕುಸಿತದ ಹಂತದಲ್ಲಿರುವ ಕೆತ್ತಿಕಲ್ ಗುಡ್ಡದ ಮೇಲ್ಭಾಗದಲ್ಲಿರುವ ವಸತಿ ಬಡಾವಣೆ, ಸಂಪರ್ಕ ರಸ್ತೆ ಹಾಗೂ ಕೋಟ್ಯಂತರ ರೂ. ವ್ಯಯಿಸಿ ನಿರ್ಮಿಸಲಾದ ವೆಟ್‌ವೆಲ್ ಉಳಿಸಿಕೊಳ್ಳುವ ನಿಟ್ಟಿನಲ್ಲಿ ಈವರೆಗೆ ಸೂಕ್ತ ಕ್ರಮ ಕೈಗೊಂಡಿಲ್ಲ. ಗುಡ್ಡ ಕುಸಿದು ಗುಹೆಯಂತಾಗಿರುವ ಪ್ರದೇಶಕ್ಕೆ ಮಣ್ಣು ತುಂಬಿಸುವ ಕೆಲಸ ಮಾಡಿಲ್ಲ.

ಒಂದೊಮ್ಮೆ ಮೇಲ್ಗಡೆ ಗುಡ್ಡ ಕುಸಿದರೆ ಗ್ಯಾಬಿಯನ್ ವಾಲ್ ಸಹಿತ ಕೆಳಗಡೆಯ ದ್ವಿಪಥಕ್ಕೆ ಅಪಾಯ, ರಸ್ತೆ ಸಂಚಾರ ಸ್ಥಗಿತ ತಪ್ಪಿದ್ದಲ್ಲ. ಹೊಸ ದ್ವಿಪಥದ ಅಂಚಿಗೆ ಅಳವಡಿಸಲಾದ ಸಿಮೆಂಟ್ ಗೋಡೆ ತೀರ ಅಪಾಯಕಾರಿಯಾಗಿ ಕಾಣಿಸುತ್ತಿದೆ. ರಸ್ತೆಯ ರಕ್ಷಣಾ ಗೋಡೆಯ ಕೆಳಭಾಗದಲ್ಲಿ ಇಳಿಜಾರಾದ ಗುಡ್ಡ ಪ್ರದೇಶವಿದ್ದು, ಕೆತ್ತಿಕಲ್ ಗುಡ್ಡದೊಳಗೆ ನೀರಿನ ಒರತೆ ಹೆಚ್ಚಾದರೆ ಎಲ್ಲವೂ ನೀರಲ್ಲಿಟ್ಟ ಹೋಮದಂತಾಗಬಗಹುದು ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸಿದ್ದಾರೆ.

ಹೆದ್ದಾರಿ ಕಾಮಗಾರಿ ಆರಂಭಿಸುವಾಗ ಚರಂಡಿ ವ್ಯವಸ್ಥೆಗೆ ಮೊದಲ ಆದ್ಯತೆ ನೀಡಬೇಕು. ಕೆತ್ತಿಕಲ್‌ನಂತಹ ಗುಡ್ಡ ಅಗೆಯುವುದಕ್ಕಿಂತ ಮುಂಚೆ ಗುಡ್ಡದಲ್ಲಿ ನೀರಿನ ಒರತೆ ಬಗ್ಗೆ ಎಚ್ಚರಿಕೆ ವಹಿಸಬೇಕು. ಇಂತಹ ಜಾಗಗಳಲ್ಲಿ ಗುಡ್ಡ ಅಗೆದು ರಸ್ತೆ ವಿಸ್ತರಿಸುವ ಬದಲಾಗಿ ಮೇಲ್ಸೇತುವೆ ನಿರ್ಮಿಸುವುದು ಒಳಿತು. ಇಲ್ಲದೆ ಹೋದಲ್ಲಿ ಕೆತ್ತಿಕಲ್‌ನಂತೆ ಹೆದ್ದಾರಿ ವಿಸ್ತರಣೆಯ ಇತರ ಕಡೆಗಳಲ್ಲೂ ಅಪಾಯ ತಪ್ಪಿದ್ದಲ್ಲ.

— ಬಾಬು ಸಾಲ್ಯಾನ್, ತಿರುವೈಲ್ ನಿವಾಸಿ