ಇನೋಳಿಗೆ ಬಾರದ ಸರ್ಕಾರಿ ಬಸ್!

2021ರಲ್ಲೇ ಕುಂಪಲಕ್ಕೆ ಬಂದಿರುವ ಸರ್ಕಾರಿ ಬಸ್.

Published on:

24 Jun 2026, 1:31 pm

ವಿಜಯವಾಣಿ ಸುದ್ದಿಜಾಲ ಉಳ್ಳಾಲ

ಸರ್ಕಾರಿ ಬಸ್ ಸೌಲಭ್ಯಕ್ಕಾಗಿ ಪಾವೂರು ಗ್ರಾಮದ ಇನೋಳಿಯ ಜನರು ನಡೆಸುತ್ತಿರುವ ಹೋರಾಟಕ್ಕೆ ಏಳು ವರ್ಷಗಳೇ ಕಳೆದಿದ್ದರೂ ನ್ಯಾಯ ಸಿಕ್ಕಿಲ್ಲ. ಸರ್ಕಾರಿ ಗೆಜೆಟ್‌ನಲ್ಲಿ ಪ್ರಕಟವಾಗಿ, ಸಮಯದ ನಿಗದಿಯೂ ಆಗಿ ಒಂದು ವರ್ಷ ಕಳೆದರೂ ಕೆಂಪು ಬಸ್ ಮಾತ್ರ ಗ್ರಾಮಕ್ಕೆ ಬಾರದ ಹಿನ್ನೆಲೆಯಲ್ಲಿ, ರೊಚ್ಚಿಗೆದ್ದಿರುವ ಗ್ರಾಮಸ್ಥರು ಇದೀಗ ಸಹಿ ಸಂಗ್ರಹ ಅಭಿಯಾನ ಆರಂಭಿಸಿದ್ದಾರೆ.

ಉಳ್ಳಾಲ ತಾಲೂಕಿನ ಬಹುತೇಕ ಗ್ರಾಮಗಳಲ್ಲಿ ಸರ್ಕಾರಿ ಬಸ್ ಸೇವೆ ಲಭ್ಯವಿದ್ದರೂ, ಇನೋಳಿಯನ್ನು ಮಾತ್ರ ವ್ಯವಸ್ಥಿತವಾಗಿ ಕಡೆಗಣಿಸಲಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಗ್ರಾಮಸಭೆಗಳು, ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳ ಭೇಟಿ ಹೀಗೆ ನಿರಂತರ ಮನವಿಗಳನ್ನು ಸಲ್ಲಿಸಿದರೂ, ಯಾರೋ ಪ್ರಭಾವಿಗಳ ಹಿತಾಸಕ್ತಿಗಾಗಿ ಈ ಸೇವೆಗೆ ಅಡ್ಡಿಪಡಿಸಲಾಗುತ್ತಿದೆ ಎಂಬ ಶಂಕೆ ಗ್ರಾಮಸ್ಥರದ್ದು.

2019ರ ಸರ್ಕಾರಿ ಗೆಜೆಟ್‌ನಲ್ಲೇ ಮಂಗಳೂರು- ಕುಂಪಲ ಹಾಗೂ ಮಂಗಳೂರು- ಇನೋಳಿ ನಡುವೆ ಬಸ್ ಸಂಚಾರಕ್ಕೆ ಅನುಮೋದನೆ ನೀಡಲಾಗಿತ್ತು. ಅದರಂತೆ, ಕುಂಪಲಕ್ಕೆ 2021ರ ಜುಲೈನಲ್ಲಿ ಸರ್ಕಾರಿ ಬಸ್ ಸೇವೆ ಆರಂಭವಾಯಿತು. ಆದರೆ, ಇನೋಳಿಯ ವಿಷಯದಲ್ಲಿ ಮಾತ್ರ ಆಮೆಗತಿಯ ಪ್ರಕ್ರಿಯೆ ಮುಂದುವರಿದಿದೆ. ಕೆಎಸ್‌ಆರ್‌ಟಿಸಿಯಿಂದ ಬಸ್ ಸಂಚಾರದ ಸಮಯದ ನಿಗದಿಪಡಿಸಿ ಕಳೆದ ವರ್ಷ ಮೇ ತಿಂಗಳಲ್ಲೇ ಆರ್‌ಟಿಒಗೆ ಪ್ರಸ್ತಾವನೆ ಕಳುಹಿಸಲಾಗಿದ್ದು, ಮೇ 6ಕ್ಕೆ ಒಂದು ವರ್ಷ ಪೂರೈಸಿದರೂ ಇದುವರೆಗೆ ಬಸ್ ಸಂಚಾರ ಆರಂಭವಾಗಿಲ್ಲ.

ಶಕ್ತಿ ಯೋಜನೆಯೂ ಮರೀಚಿಕೆ

ಇನೋಳಿಗೆ ನಿಗದಿಯಾಗಿರುವ 8 ಟ್ರಿಪ್‌ಗಳು ವಿದ್ಯಾರ್ಥಿಗಳು ಮತ್ತು ದೈನಂದಿನ ಪ್ರಯಾಣಿಕರಿಗೆ ಅತ್ಯಂತ ಅನುಕೂಲಕರವಾಗಿದೆ. ಆದರೆ, ಬಸ್ ಇಲ್ಲದ ಕಾರಣ ಈ ಭಾಗದ ಮಹಿಳೆಯರು ರಾಜ್ಯ ಸರ್ಕಾರದ ‘ಶಕ್ತಿ ಯೋಜನೆ’ಯ ಉಚಿತ ಬಸ್ ಪ್ರಯಾಣದ ಸೌಲಭ್ಯದಿಂದ ವಂಚಿತರಾಗಿದ್ದಾರೆ.

ಬಸ್ಸುಗಳಿಗೂ ವಾರದ ರಜೆ!

ಸದ್ಯ ಇನೋಳಿಯಲ್ಲಿ ಖಾಸಗಿ ಸಿಟಿ ಮತ್ತು ಸರ್ವೀಸ್ ಬಸ್‌ಗಳು ಸಂಚರಿಸುತ್ತವೆಯಾದರೂ, ಅವುಗಳ ಸಮಯ ನಿಗದಿ ಅವೈಜ್ಞಾನಿಕವಾಗಿದೆ. ಒಂದೇ ಸಮಯದಲ್ಲಿ ಹಲವು ಬಸ್‌ಗಳು ಬರುವುದು, ಭಾನುವಾರ ಅಥವಾ ಸರ್ಕಾರಿ ರಜಾ ದಿನಗಳಲ್ಲಿ ಬಸ್‌ಗಳೇ ಇಲ್ಲದಿರುವುದು ಗ್ರಾಮಸ್ಥರನ್ನು ಕಂಗೆಡಿಸಿದೆ. ಖಾಸಗಿ ಬಸ್ ಮಾಫಿಯಾದ ಈ ದೌರ್ಜನ್ಯದಿಂದ ಪಾರಾಗಲು ಸರ್ಕಾರಿ ಬಸ್ ಸಂಚಾರವೊಂದೇ ಶಾಶ್ವತ ಪರಿಹಾರ ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.

ಕೆಎಸ್ಸಾರ್ಟಿಸಿ ಬಸ್ ಸಂಚಾರಕ್ಕೆ ಸಮಯ ನಿಗದಿಪಡಿಸಿ ವರ್ಷದ ಹಿಂದೆಯೇ ಆರ್‌ಟಿಒಗೆ ಅರ್ಜಿ ಹಾಕಲಾಗಿದೆ. ಆರ್‌ಟಿಒದಿಂದ ಅನುಮತಿ ಬಂದಿಲ್ಲ, ಅನುಮತಿ ಸಿಕ್ಕಿದ ಕೂಡಲೇ ಇನೋಳಿಗೆ ಬಸ್ ಸಂಚಾರ ಆರಂಭಗೊಳ್ಳಲಿದೆ.

ಮಂಗಳೂರಿಗೆ ಬಂದು ನಾಲ್ಕು ತಿಂಗಳಷ್ಟೇ ಆಗಿದೆ. ಕೆಎಸ್ಸಾರ್ಟಿಸಿಟಿಸಿಯಿಂದ ಬಂದಿರುವ ಕಡತದ ಬಗ್ಗೆ ಮಾಹಿತಿಯಿಲ್ಲ, ತಕ್ಷಣ ಪರಿಶೀಲನೆ ನಡೆಸಿ ಯಾವುದಾದರೂ ಕಡತ ಬಾಕಿಯಿದ್ದರೆ ವಿಲೇವಾರಿ ಮಾಡಲಾಗುವುದು.

ಸರ್ಕಾರದ ಶಕ್ತಿ ಯೋಜನೆಯ ಪ್ರಯೋಜನ ಮಹಿಳೆಯರಿಗೆ ಸಿಗಬೇಕೆನ್ನುವುದು ನಮ್ಮ ಆಶಯ. ನಾನು ಅಧ್ಯಕ್ಷನಾಗಿದ್ದ ಸಂದರ್ಭ ತಾಪಂ ಮಾಜಿ ಅಧ್ಯಕ್ಷರ ಜತೆ ಕೆಎಸ್ಸಾರ್ಟಿಸಿ ಅಧಿಕಾರಿಗಳನ್ನು ಭೇಟಿಯಾದಾಗ ಕೆಲವು ಕಾರಣಗಳನ್ನು ನೀಡಿದ್ದರು. ಶಾಸಕರೂ ಸರ್ಕಾರಿ ಬಸ್ಸಿನ ಭರವಸೆ ನೀಡಿದ್ದಾರೆ.

ಪಾವೂರು ಗ್ರಾಮಕ್ಕೆ ಟೈಮಿಂಗ್ ಆಗಿ ವರ್ಷವಾದರೂ ಬಸ್ ಬಾರದಿರುವುದರ ಹಿಂದಿರುವ ಕಾರಣವೇನು? ಹಲವು ಗ್ರಾಮಸಭೆಗಳಲ್ಲಿ ಪ್ರಸ್ತಾಪವೂ ಆಗಿ ಭರವಸೆ ಮಾತ್ರ ಸಿಕ್ಕಿದೆ. ಈಗ ಗ್ರಾಮಸ್ಥರು ಸಹಿ ಸಂಗ್ರಹ ಆರಂಭಿಸಿದ್ದು ಶಾಸಕರು ಇದನ್ನು ಗಂಭೀರವಾಗಿ ಪರಿಗಣಿಸಿ ತಕ್ಷಣ ಕೆಎಸ್ಸಾರ್ಟಿಸಿ ಅಧಿಕಾರಿಗಳಿಗೆ ಆದೇಶ ನೀಡಬೇಕು.

Government