ತೋಟ ಬಿಟ್ಟುಕೊಟ್ಟ ಉದಾರ ಮನಸ್ಸುಗಳು

ದಶಕಗಳ ಬೇಡಿಕೆಯಾಗಿದ್ದ ಕೋಡಿಜಾಲ್-ಕರ್ಮಾರ್ ನೇರ ಸಂಪರ್ಕ ರಸ್ತೆ ಇದೀಗ ಸಾಕಾರಗೊಂಡಿದೆ. ಸ್ಥಳೀಯರ ಮನವಿಗೆ ಸ್ಪಂದಿಸಿದ ಶಾಸಕರು ಮತ್ತು ಅದಕ್ಕೆ ಪೂರಕವಾಗಿ ತಮ್ಮ ತೋಟ-ಜಮೀನುಗಳನ್ನು ಉದಾರವಾಗಿ ಬಿಟ್ಟುಕೊಟ್ಟ ಸ್ಥಳೀಯರ ಸಹಕಾರದಿಂದಾಗಿ, ಈ ಭಾಗದ ಜನರ ಬಹುದಿನದ ಕನಸು ನನಸಾಗಿದೆ.

ಕೊಣಾಜೆ ಗ್ರಾಮದ ಕೋಡಿಜಾಲ್‌ನಿಂದ ಕರ್ಮಾರ್ ಮೂಲಕ ಮಂಗಳೂರು ವಿಶ್ವವಿದ್ಯಾಲಯದ ಮಂಗಳಾ ಸಭಾಂಗಣಕ್ಕೆ ನೇರ ಸಂಪರ್ಕ ಕಲ್ಪಿಸಬೇಕೆಂಬುದು ಕಳೆದ 40 ವರ್ಷಗಳ ಸ್ಥಳೀಯರ ಬೇಡಿಕೆಯಾಗಿತ್ತು. ನಾಲ್ಕು ವರ್ಷಗಳ ಹಿಂದೆ ಮದುವೆ ಸಮಾರಂಭವೊಂದರಲ್ಲಿ ಪಾಲ್ಗೊಂಡಿದ್ದ ಶಾಸಕ ಯು.ಟಿ.ಖಾದರ್ ಅವರಲ್ಲಿ ಸ್ಥಳೀಯರು ಈ ಬೇಡಿಕೆಯನ್ನು ಮುಂದಿಟ್ಟಿದ್ದರು. ಶಾಸಕರ ಸೂಚನೆಯಂತೆ ಜಾಗದ ವ್ಯವಸ್ಥೆ ಕಲ್ಪಿಸಲಾಗಿದ್ದು, ಇದೀಗ ಕಾಂಕ್ರೀಟ್ ರಸ್ತೆ ನಿರ್ಮಾಣದ ಮೂಲಕ ಎರಡು ಊರುಗಳ ನಡುವಿನ ಸಂಚಾರ ಸುಗಮವಾಗಿದೆ.

ಇಂದಿನ ದಿನಗಳಲ್ಲಿ ಸಾರ್ವಜನಿಕ ಉದ್ದೇಶಕ್ಕೆ ಜಾಗ ಬಿಟ್ಟುಕೊಡಲು ಹಿಂದೇಟು ಹಾಕುವವರೇ ಹೆಚ್ಚು. ಆದರೆ, ಈ ರಸ್ತೆ ನಿರ್ಮಾಣಕ್ಕೆ ದಿ.ಮಹಮ್ಮದ್ ಹಾಜಿ ಅವರ ಕುಟುಂಬ, ಅಬ್ದುಲ್ ರಹ್ಮಾನ್ ಕೋಡಿಜಾಲ್, ಸಿರಾಜ್, ಅಶ್ರ್ ಮತ್ತು ಮಹಮ್ಮದ್ ಹಾಜಿ ಅವರು ತಮ್ಮ ಖಾಸಗಿ ಜಮೀನು ಮತ್ತು ತೋಟವನ್ನು ಬಿಟ್ಟುಕೊಡುವ ಮೂಲಕ ಮಾದರಿಯಾಗಿದ್ದಾರೆ.