ಜನರ ಬದುಕಿಗೆ ಮೇಳ ಸಹಕಾರಿ

ಬ್ರಹ್ಮಾವರದ ಎಸ್‌ಎಂಎಸ್ ಚರ್ಚ್ ಆವರಣದಲ್ಲಿ ಶುಕ್ರವಾರದಿಂದ ನಡೆಯುತ್ತಿರುವ ಹಲಸು ಮತ್ತು ಹಣ್ಣು ಮೇಳದಲ್ಲಿ ರಾಜ್ಯದ ವಿವಿಧ ಭಾಗಗಳ 150 ಸ್ಟಾಲ್‌ಗಳಿದ್ದು, ಹಲವು ಕುಟುಂಬಗಳ ನೂರಾರು ಜನರ ಬದುಕಿಗೆ ಬೆಳಕಾಗಿದೆ. ಜತೆಗೆ ಪ್ರಧಾನ ಮಂತ್ರಿಯವರ ಪರಿಕಲ್ಪನೆಯ ಆತ್ಮ ನಿರ್ಭರ ಭಾರತದ ಭಾಗವಾಗಿ ಗುರುತಿಸಿಕೊಂಡಿದೆ.

ಬ್ರಹ್ಮಾವರ ರೋಟರಿ ಮತ್ತು ಬಾರಕೂರು ರೋಟರಿ, ಕೃಷಿ ವಿಜ್ಞಾನ ಕೇಂದ್ರ ಇನ್ನಿತರ ಸಂಸ್ಥೆಗಳ ಸಹಭಾಗಿತ್ವದಲ್ಲಿ ನಡೆಯುವ ಹಲಸು ಮತ್ತು ಹಣ್ಣು ಮೇಳದಲ್ಲಿ ಇಂದಿನ ಕಾಲಘಟ್ಟದಲ್ಲಿ ಕಾಣಲು ಸಿಗದ ಹಲವು ಜಾತಿಯ ಹಣ್ಣುಗಳ ಮಾರಾಟವಿತ್ತು. ಶಾಲಾ ವಿದ್ಯಾರ್ಥಿ ಒಬ್ಬ ಹಲಸಿನ ಹಣ್ಣುಗಳನ್ನು ತಂದು ಮಾರಾಟ ಮಾಡಿ ತನ್ನ ಶಾಲಾ ಶುಲ್ಕವನ್ನು ಭರಿಸಿಕೊಳ್ಳುತ್ತಿದ್ದದ್ದು ಪ್ರೇರಣಾದಾಯಕ. ಚಿತ್ರ ಕಲಾವಿದರೊಬ್ಬರು ಸ್ಥಳದಲ್ಲಿ 10 ನಿಮಿಷದಲ್ಲಿ ವ್ಯಕ್ತಿ ಚಿತ್ರವನ್ನು ರಚಿಸಿಕೊಟ್ಟು ಎಐ ತಂತ್ರಜ್ಞಾನಕ್ಕೆ ಸವಾಲು ನೀಡುತ್ತಿದ್ದಾರೆ.

ಕೃಷಿ ಸಲಕರಣೆಗಳು, ದೇಶೀಯ ಗೋ ತಳಿಗಳ ಉತ್ಪನ್ನಗಳು, ಕ್ಷಣ ಮಾತ್ರದಲ್ಲಿ ಬಟ್ಟೆಯ ಕಲೆ ತೆಗೆಯುವ ರಾಸಾಯನಿಕ ಮಾರಾಟ, ಮನೆಯಲ್ಲಿ ಉತ್ಪಾದಿಸುವ ನಾನಾ ಖಾದ್ಯಗಳ ಮಾರಾಟ, ರೈತರಿಗೆ ಮತ್ತು ಗೃಹ ಬಳಕೆಗೆ ಬೇಕಾಗುವ ಸಲಕರಣೆಗಳ ಮಾರಾಟ, ಅವಿಭಕ್ತ ಕುಟುಂಬದಂತೆ ಮನೆ ಮಂದಿಯೊಂದಿಗೆ ಸ್ಥಳದಲ್ಲಿ ಮಾಡಿಕೊಡುವ ಹೋಳಿಗೆ, ಬಗೆಬಗೆಯ ತಿಂಡಿ ತಿನಿಸುಗಳು ಗ್ರಾಹಕರನ್ನು ಆಕರ್ಷಿಸುತ್ತಿವೆ. 3 ದಿನಗಳ ಮೇಳದ ಎಲ್ಲ ಮಳಿಗೆಯವರಿಗೆ ಉತ್ತಮ ವ್ಯವಹಾರ ಮತ್ತು ಗ್ರಾಹಕರಿಗೆ ತಮಗಿಷ್ಟವಾದ ವಸ್ತುಗಳು, ತಿನಿಸುಗಳು ಲಭಿಸುವುದರೊಂದಿಗೆ ಮೇಳವು ಯಶಸ್ವಿ ಹಾಗೂ ಜನೋಪಯೋಗಿಯಾಯಿತು.

ಬ್ರಹ್ಮಾವರದಲ್ಲಿ ನಡೆಯುವ ಹಲಸು ಮತ್ತು ಹಣ್ಣು ಮೇಳದಲ್ಲಿ ನಾನಾ ಭಾಗಗಳ ಹಲಸಿನ ಹಣ್ಣುಗಳನ್ನು ತಂದು ಮಾರಾಟ ಮಾಡಿ, ಅದರಿಂದ ಬಂದ ಲಾಭದಲ್ಲಿ ನಾನು ಕಾಲೇಜಿನ ಶಿಕ್ಷಣ ಶುಲ್ಕ ಭರಿಸುತ್ತೇನೆ. ನನಗೆ ಇದೊಂದು ಆರ್ಥಿಕ ಸ್ವಾವಲಂಬನೆಗೆ ದಾರಿಯಾಗಿದೆ.

— ಸನ್ನಿಧಿ ಶೆಟ್ಟಿ, ವಿದ್ಯಾರ್ಥಿ

ಹಲಸು ಮತ್ತು ಹಣ್ಣು ಮೇಳ ಸಣ್ಣ ಉದ್ಯಮ ಉದ್ಯೋಗಿಗಳಿಗೆ ಹಾಗೂ ಗ್ರಾಮೀಣ ಭಾಗದ ಉತ್ಪನ್ನಗಳಿಗೆ ವೇದಿಕೆ ನೀಡುವ ಪರಿಕಲ್ಪನೆ. ಇದರಿಂದ ನೂರಾರು ಮಂದಿಗೆ ಉದ್ಯೋಗ, ಆರ್ಥಿಕ ಸ್ವಾವಲಂಬನೆಗೆ ದಾರಿಯಾಗುತ್ತಿದೆ.

— ಆಲ್ವಿನ್ ಅಂದ್ರಾದೆ ಮುಖ್ಯ ಸಂಘಟಕರು, ಹಲಸು ಮತ್ತು ಹಣ್ಣು ಮೇಳ