ಸೊರಗುತ್ತಿದೆ ಕೋಟೆಗಳ ಸೊಬಗು

ಕಾಸರಗೋಡು ಜಿಲ್ಲೆಯಲ್ಲಿರುವ ಬೇಕಲ ಕೋಟೆ ಸಹಿತ ಹಲವು ಪ್ರಮುಖ ಕೋಟೆಗಳ ಸಂರಕ್ಷಣೆ ಮತ್ತು ನಿರ್ವಹಣೆ ಸಂಬಂಧಪಟ್ಟ ಇಲಾಖೆಗಳಿಗೆ ಹೊರೆಯಾಗುತ್ತಿದ್ದು, ಜಿಲ್ಲೆಯ ಬಹುತೇಕ ಕೋಟೆಗಳು ಪ್ರಾಕೃತಿಕ ಸೌಂದರ್ಯವನ್ನು ಕಳೆದುಕೊಳ್ಳುವ ಅಪಾಯದಲ್ಲಿವೆ. 

 ಜಿಲ್ಲೆಯಲ್ಲಿ 14 ಕೋಟೆಗಳಿದ್ದು, ಬೇಕಲ ಕೋಟೆ ಕೇಂದ್ರ ಪ್ರಾಚ್ಯವಸ್ತು ಇಲಾಖೆ ಅಧೀನದಲ್ಲಿದ್ದರೆ ಇತರ ಕೋಟೆಗಳು ರಾಜ್ಯಸರ್ಕಾರದ ಅಧೀನಲ್ಲಿವೆ. ಈ ಪೈಕಿ ಕಡಲ ತಡಿಯ ಸೌಂದರ್ಯದೊಂದಿಗೆ ಬೇಕಲ ಕೋಟೆ ಖ್ಯಾತಿ ಪಡೆದಿದ್ದು, ಉಳಿದ ಕೋಟೆಗಳ ಸ್ಥಿತಿ ಶೋಚನೀಯವಾಗಿವೆ. 

ಐತಿಹಾಸಿಕ ಪರಂಪರೆಯ ಸಂಕೇತಗಳಾದ ಹೊಸದುರ್ಗ ಕೋಟೆ, ಚಂದ್ರಗಿರಿ ಕೋಟೆ, ಪೊವ್ವಲ್ ಕೋಟೆ, ಆರಿಕ್ಕಾಡಿ ಕೋಟೆ ಪ್ರಮುಖವಾದವು. ಆದರೆ ಬೇಕಲ ಕೋಟೆಯನ್ನು ಹೊರತುಪಡಿಸಿ ಉಳಿದ ಕೋಟೆಗಳತ್ತ ಪ್ರವಾಸಿಗರನ್ನು ಆಕರ್ಷಿಸುವಲ್ಲಿ ಸಂಬಂಧಪಟ್ಟ ಇಲಾಖೆ ಸಫಲವಾಗಿಲ್ಲ. ಇನ್ನೊಂದೆಡೆ ಕೊಟೆಗೆ ಸಂಬಂಧಿಸಿದ ಜಾಗದ ಅತಿಕ್ರಮಣವೂ ನಡೆಯುತ್ತಿರುವ ಆರೋಪ ಕೇಳಿಬರುತ್ತಿದೆ. ರಾಷ್ಟ್ರೀಯ ಹೆದ್ದಾರಿ ಹಾದುಹೋಗುವ ಕುಂಬಳೆ ಆರಿಕ್ಕಾಡಿ ಕೋಟೆಯ ಅಂಚಿನ ಬಹುತೇಕ ಜಾಗ ರಸ್ತೆಪಾಲಾಗಿದೆ. ಬೋವಿಕ್ಕಾನ ಸಮೀಪದ ಪೊವ್ವಲ್ ಕೋಟೆ ಅಸ್ತಿತ್ವದಲ್ಲಿರುವ ಬಗ್ಗೆ ಯಾರಿಗೂ ವಾಹಿತಿಯಿಲ್ಲ. 

 ಚಂದ್ರಗಿರಿ ಕೋಟೆಯ ಬಗ್ಗೆಯೂ ರಾಜ್ಯ ಸರ್ಕಾರ ನಿರ್ಲಕ್ಷೃ ವಹಿಸಿದೆ. ಚಂದ್ರಗಿರಿ ಕೋಟೆಯು ಐತಿಹಾಸಿಕ ಬೇಕಲ ಕೋಟೆಯಷ್ಟೇ ಸೊಬಗು, ಸೌಂದರ್ಯ ಹೊಂದಿದ್ದರೂ ಇಲ್ಲಿ ಮೂಲಸೌಕರ್ಯದ ಕೊರತೆಯಿದೆ. ಹೊಸದುರ್ಗ ಕೋಟೆಯ ಸ್ಥಿತಿಯೂ ಶೋಚನೀಯವಾಗಿದೆ. ಕೋಟೆ ಅಲ್ಲಲ್ಲಿ ಕುಸಿಯಲಾರಂಭಿಸಿರುವುದರಿಂದ ಮೂಲ ರೂಪವೇ ಹಾಳಾಗಿದೆ. ಜತೆಗೆ ಕೋಟೆಯ ಬಹುತೇಕ ಜಾಗ ಅತಿಕ್ರಮಣಗೊಂಡಿದೆ.  

 ಜಿಲ್ಲೆಯ ಕೋಟೆಗಳ ಅಭಿವೃದ್ಧಿ ಬಗ್ಗೆ ಜಿಲ್ಲಾ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ ಅಧ್ಯಕ್ಷರೂ ಆಗಿರುವ ಜಿಲ್ಲಾಧಿಕಾರಿ ಅರ್ಜುನ್ ಪಾಂಡಿಯನ್ ಮುಂದಾಗಿರುವುದು ಆಶಾದಾಯಕವಾಗಿದೆ. ಚಂದ್ರಗಿರಿ ಕೋಟೆಯನ್ನು ಅಭಿವೃದ್ಧಿ ಪಡಿಸುವ ನಿಟ್ಟಿನಲ್ಲಿ ಇತ್ತೀಚೆಗೆ ಜಿಲ್ಲಾಧಿಕಾರಿ ವಿವಿಧ ಇಲಾಖೆ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳ ಜತೆ ಕೋಟೆಗೆ ಭೇಟಿ ನೀಡಿ ಪರಾಮರ್ಶಿಸಿದ್ದಾರೆ.

ವಿಶ್ವ ಬೈಸಿಕಲ್ ದಿನಾಚರಣೆ ಪ್ರಯುಕ್ತ ಜಿಲ್ಲಾ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ(ಡಿಟಿಪಿಸಿ)  ಮತ್ತು ಜಿಲ್ಲಾಡಳಿತ, ಕಾಸರಗೋಡು ಪೆಡಲರ್ಸ್ ಸೈಕ್ಲಿಂಗ್ ಕ್ಲಬ್ ಮೇ 31ರಂದು ‘ಕಾಸರಗೋಡು ಫೋರ್ಟ್ ರೈಡ್-2026’ ಬೈಸಿಕಲ್ ರೈಡ್ ಆಯೋಜಿದೆ. ಬೆಳಗ್ಗೆ 6ಕ್ಕೆ ಹೊಸದುರ್ಗ ಕೋಟೆಯಿಂದ ಆರಂಭವಾಗುವ ಸೈಕಲ್ ಸವಾರಿ 70 ಕಿ.ಮೀ. ಕ್ರಮಿಸಿ ಕುಂಬಳೆಯ ಅರಿಕ್ಕಾಡಿ ಕೋಟೆಯಲ್ಲಿ ಕೊನೆಗೊಳ್ಳಲಿದೆ. ಕಾಸರಗೋಡಿನ ಐತಿಹಾಸಿಕ ಪರಂಪರೆಯ ಸಂಕೇತಗಳಾದ ಹೊಸದುರ್ಗ ಕೋಟೆ, ಬೇಕಲ ಕೋಟೆ, ಚಂದ್ರಗಿರಿ ಕೋಟೆ, ಪೊವ್ವಲ್ ಕೋಟೆ ಮತ್ತು ಅರಿಕ್ಕಾಡಿ ಕೋಟೆಗಳನ್ನು ಸಂಪರ್ಕಿಸಿ ಜಾಗೃತಿ ಮೂಡಿಸುವುದಕ್ಕಾಗಿ ಸೈಕಲ್ ರೈಡ್ ಆಯೋಜಿಸಲಾಗಿದೆ. ರೈಡ್‌ನಲ್ಲಿ ಭಾಗವಹಿಸಲು ಮುಕ್ತ ಅವಕಾಶವಿದ್ದು ಭಾಗವಹಿಸುವವರು ಸೈಕಲ್‌ನ್ನು ತಾವೇ ತರಬೇಕು. ಹೆಲ್ಮೆಟ್ ಕಡ್ಡಾಯವಾಗಿ ಧರಿಸಬೇಕು. 

ಜಿಲ್ಲೆಯ ಕೋಟೆಗಳ ಅಭಿವೃದ್ಧಿಯಿಂದ ಪ್ರವಾಸೋದ್ಯಮ ವಲಯಕ್ಕೆ ಹೆಚ್ಚಿನ ಉತ್ತೇಜನ ಲಭಿಸಲಿದ್ದು, ಈ ನಿಟ್ಟಿನಲ್ಲಿ ವಿಶ್ವ ಬೈಸಿಕಲ್ ದಿನಾಚರಣೆ ಪ್ರಯುಕ್ತ ಕೋಟೆಗಳನ್ನು ಸಂಪರ್ಕಿಸುವ ರೀತಿಯಲ್ಲಿ ಬೈಸಿಕಲ್ ರೈಡ್ ಆಯೋಜಿಸಲಾಗಿದೆ. ಪ್ರಸಕ್ತ ರಾಜ್ಯ ಪ್ರಾಚ್ಯವಸ್ತು ಇಲಾಖೆ ಅಧೀನದಲ್ಲಿರುವ ಚಂದ್ರಗಿರಿ ಕೋಟೆಯ ನಿರ್ವಹಣೆ ಡಿಟಿಪಿಸಿಗೆ ಹಸ್ತಾಂತರಗೊಂಡಿರುವ ಹಿನ್ನೆಲೆಯಲ್ಲಿ ಹೆಚ್ಚಿನ ಪ್ರವಾಸಿಗರನ್ನು ಆಕರ್ಷಿಸುವ ರೀತಿಯಲ್ಲಿ ಅಭಿವೃದ್ಧಿ ಕಾರ್ಯ ನಡೆಸಲು ಯೋಜನೆ ರೂಪಿಸಲಾಗಿದೆ. ಇದೇ ರೀತಿ ಜಿಲ್ಲೆಯ ಇತರ ಕೋಟೆಗಳ ಅಭಿವೃದ್ಧಿಗೂ ವಿಭಿನ್ನ ಯೋಜನೆ ರಚಿಸಲಾಗುವುದು.

— ಅರ್ಜುನ್ ಪಾಂಡಿಯನ್, ಕಾಸರಗೋಡು ಜಿಲ್ಲಾಧಿಕಾರಿ