ಉಡುಪಿ: ಬ್ಯಾಂಕ್​ಗಳ ಎಲ್ಲ ನೌಕರರ ನಡುವೆ ಒಂದೇ ರೀತಿಯ ಹುದ್ದೆ, ಶ್ರೇಣಿಗೆ ಸಮನಾಗಿ ಕಾರ್ಯಕ್ಷಮತೆ ಆಧಾರಿತ ಪ್ರೋತ್ಸಾಹ ನೀಡಬೇಕು. ಇತ್ತೀಚೆಗಿನ ಕೆಲ ವರ್ಷಗಳಲ್ಲಿ ಕೆಲಸದ ಒತ್ತಡ ಹೆಚ್ಚುತ್ತಲಿದ್ದು ಅನಾರೋಗ್ಯಕ್ಕೆ ಒಳಗಾಗುವಂತಾಗಿದೆ. ಹೀಗಾಗಿ ವಾರದಲ್ಲಿ 5 ದಿನ ಮಾತ್ರ ಬ್ಯಾಂಕಿಂಗ್​ ವ್ಯವಸ್ಥೆಯನ್ನು ಕೇಂದ್ರ ಸರ್ಕಾರ ಕೂಡಲೇ ಜಾರಿ ಮಾಡಬೇಕು ಎಂದು ಅಖಿಲ ಭಾರತೀಯ ಬ್ಯಾಂಕ್​ ನೌಕರರ ಸಂಘಗಳ ಒಕ್ಕೂಟ (ಎಐಬಿಇಎ)ದ ಜಿಲ್ಲಾ ಸಂಚಾಲಕ ಹರೀಶ್​ ಶೆಟ್ಟಿ ಆಗ್ರಹಿಸಿದರು. 

ಯುನೈಟೆಡ್​ ಫೋರಮ್​ ಆಫ್​ ಬ್ಯಾಂಕ್​ ಯೂನಿಯನ್ಸ್​ ದೇಶವ್ಯಾಪಿ ಕರೆ ಕೊಟ್ಟಿರುವ ಅಖಿಲ ಭಾರತ ಬ್ಯಾಂಕ್​ ಮುಷ್ಕರದ ಹಿನ್ನೆಲೆಯಲ್ಲಿ ಉಡುಪಿ ಕೋರ್ಟ್​ ಸಮೀಪದಲ್ಲಿರುವ ಕೆನರಾ ಬ್ಯಾಂಕ್​ ಪ್ರಾದೇಶಿಕ ಕಚೇರಿಯ ಮುಂಭಾಗದಲ್ಲಿ ಎಐಬಿಇಎ ವತಿಯಿಂದ ಶುಕ್ರವಾರ (ಸೆ.11) ಆಯೋಜಿಸಿದ್ದ ಪ್ರತಿಭಟನೆಯಲ್ಲಿ ಮಾತನಾಡಿದರು.

ಎಐಬಿಒಸಿ ಪ್ರಮುಖ ಸಚಿನ್​ ಶೆಟ್ಟಿ ಮಾತನಾಡಿ, ಸ್ಕೇಲ್​-3 ನಂತರದ ಸೌಕರರಿಗೆ ಯಾವುದೇ ಸೌಲಭ್ಯವಿಲ್ಲ. ಇನ್​ಸೆನ್​ಟೀವ್​ ಸಹ ಕೊಡುತ್ತಿಲ್ಲ. ಕೆಲಸ ಮಾಡುವವರು ನಾವು, ಅದರ ಪ್ರಯೋಜನ (ಪಿಎಲ್​ಎಸ್​) ಪಡೆಯುವವರು ಮೇಲಿನ ಅಧಿಕಾರಿಗಳು. ಕೆಲಸದಲ್ಲಿನ ಹಾಗೂ ವೇತನದಲ್ಲಿನ ತಾರತಮ್ಯವನ್ನೂ ಸಹ ನೀಗಿಸಬೇಕು ಎಂದರು.

ಎನ್​ಸಿಬಿಇಯ ಮುರಳೀಧರ್​, ಸುಪ್ರಿಯಾ, ಎಐಒಬಿಎಯ ರವಿಶಂಕರ್​, ಐಎನ್​ಬಿಒಸಿಯ ಪ್ರಮೋದ್​ ಲಾಂಜೆ, ವಿವಿಧ ಸಂಘಟನೆಗಳ ಪ್ರಮುಖರಾದ ಸುದೀಪ್​, ಮನೋಜಕುಮಾರ್​, ರಮೇಶ್​, ನಿರಂಜನ್​, ಮರಿಯೋ ಮಥಾಯಿಸ್​, ಪ್ರಣವ್​ ಪೈ,ಸಂತೋಷ್​, ಮಂಜುನಾಥ್​, ಸಚಿನ್​ ಚಾಪರ್​, ಸೂರಜ್​ ಇತರರಿದ್ದರು.

ಜೆಸಿಟಿಯು ಕನ್ವೀನರ್​ ನಾಗೇಶ್​ ನಾಯಕ್​ ಕಾರ್ಯಕ್ರಮ ನಿರ್ವಹಿಸಿದರು.

ಮಣಿಪಾಲದ ಕೆನರಾ ಬ್ಯಾಂಕ್​ ವೃತ್ತ ಶಾಖೆಯ ಮುಂಭಾಗದಲ್ಲಿಯೂ ಸಹ ಬ್ಯಾಂಕ್​ ನೌಕರರ ಸಂಗಳ ಒಕ್ಕೂಟದಿಂದ ಪ್ರತಿಭಟಿಸಲಾಯಿತು. ಅಧಿಕಾರಿಗಳ ಸಂಘದ ಅಧ್ಯಕ್ಷ ಸಚಿನ್​ ಶೆಟ್ಟಿ, ಪದಾಧಿಕಾರಿಗಳಾದ ಸೂರಜ್​ ಉಪ್ಪೂರು, ದುರ್ಗಾಪ್ರಸಾದ್​, ರೋಹಿತ್​, ವಿಶಾಲ್​ ಸಿಂಗ್​, ಪ್ರಮೋದ್​ ಲಾಂಜೆ, ನಿರಂಜನ್​ ಆಚಾರ್ಯ ಮತ್ತಿತರರಿದ್ದರು.