ಉಡುಪಿ: ದೇಶದ ಶಿಕ್ಷಣ ವ್ಯವಸ್ಥೆಯಲ್ಲಿಯೇ ಪ್ರಥಮ ಬಾರಿಗೆ ವಿದ್ಯಾರ್ಥಿಗಳಲ್ಲಿರುವ ಪ್ರತಿಭೆ ಅನಾವರಣಗೊಳಿಸಲು ಉಡುಪಿಯ ಕಿದಿಯೂರು ಎಜುಕೇಷನ್​ ಟ್ರಸ್ಟ್​ ವತಿಯಿಂದ ಹಾಗೂ ಹೈದರಾಬಾದ್​ನ ಆರ್​ಜಿಎಫ್​ ಸಂಸ್ಥೆಯ ಸಹಭಾಗಿತ್ವದಲ್ಲಿ ಡಿ.21ರಂದು ಕಿದಿಯೂರು ಹೋಟೆಲ್​ನ ಅನಂತಶಯನ ಸಭಾಭವನದಲ್ಲಿ ಬೆಳಗ್ಗೆ 10ರಿಂದ 12ರ ವರೆಗೆ "ಪ್ರತಿಭಾನ್ವೇಷಣಾ ಪರೀಕ್ಷೆ' ಸ್ಪರ್ಧೆ ಆಯೋಜಿಸಿದ್ದೇವೆ ಎಂದು ಕಿದಿಯೂರು ಹೋಟೆಲ್​ನ ಮಾಲೀಕ ಭುವನೇಂದ್ರ ಕಿದಿಯೂರು ಮಾಹಿತಿ ನೀಡಿದರು.

ಉಡುಪಿಯ ನಿಟ್ಟೂರು ಗ್ರಾಮದಲ್ಲಿರುವ ಕಿದಿಯೂರ್ಸ್​ ಲಾರ್ಡ್ಸ್​ ಇಂಟರ್​ನ್ಯಾಷನಲ್​ ರೆಸಿಡೆನ್ಶಿಯಲ್​ ಸ್ಕೂಲ್​ನಲ್ಲಿ ಗುರುವಾರ (ಡಿ.18) ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಉಡುಪಿ ಜಿಲ್ಲೆಯೂ ಸೇರಿದಂತೆ ರಾಜ್ಯದ ಯಾವುದೇ ಜಿಲ್ಲೆಯ ಹಾಗೂ ಸಿಬಿಎಸ್​ಇ, ಸ್ಟೇಟ್​ ಸೇರಿದಂತೆ ಯಾವುದೇ ಬೋರ್ಡ್​ ವ್ಯವಸ್ಥೆಯ 1ರಿಂದ 9ನೇ ತರಗತಿಯ ಮಕ್ಕಳು ಪಾಲ್ಗೊಳ್ಳಬಹುದು. ತಲಾ ಟಾಪ್​-10 ವಿದ್ಯಾರ್ಥಿಗಳನ್ನು ಆಯ್ಕೆ ಮಾಡಲಾಗುತ್ತಿದ್ದು, ಒಟ್ಟು 3 ಕೋಟಿ ರೂ. ವಿದ್ಯಾರ್ಥಿ ವೇತನ ನೀಡಲಾಗುವುದು ಎಂದರು.

ಹೈದರಾಬಾದ್​ನ ಆರ್​ಜಿಎಫ್​ ಸಂಸ್ಥೆಯ ಸಿಇಒ ರವೀಂದ್ರ ನಾಯ್ಡು ಮಾತನಾಡಿ, ಕಾಶ್ಮೀರದಿಂದ ಕನ್ಯಾಕುಮಾರಿವರೆಗೆ ಸುಮಾರು 800 ಶಾಲೆಗಳಿಗೆ ಶೈಕ್ಷಣಿಕ ನೆರವು ನೀಡುತ್ತಿದ್ದೇವೆ. ಶೈಕ್ಷಣಿಕ ಪಠ್ಯಕ್ರಮದೊಂದಿಗೆ ಬಾಲ್ಯದಲ್ಲಿಯೇ ಮಕ್ಕಳಿಗೆ ಎಲ್ಲ ರೀತಿಯ ಸವಾಲು ಎದುರಿಸುವ ತರಬೇತಿ ನೀಡುವ ವಿಶಿಷ್ಟ ಶಾಲೆ ಇದಾಗಿದೆ. ಪ್ರತಿಭಾನ್ವೇಷಣೆ ಪರೀಕ್ಷೆಯಲ್ಲಿ ಶೇ.60 ಪ್ರತಿಶತದಿಂದ ಶೇ.90 ಹಾಗೂ ಶೇ.90ಕ್ಕಿಂತ ಅಧಿಕ ಫಲಿತಾಂಶ (ನಾಲ್ಕು ವಿಭಾಗದಲ್ಲಿ) ಗಳಿಸಿದ ವಿದ್ಯಾರ್ಥಿಗಳಿಗೆ ಪುರಸ್ಕಾರ ನೀಡಲಾಗುವುದು. ಪರೀಕ್ಷೆ ಮುಗಿದ ವಾರದ ಬಳಿಕ ಫಲಿತಾಂಶ ಹಾಗೂ ಮಕ್ಕಳ ಹೆಸರು ತಿಳಿಸಲಾಗುವುದು. ಹೆಸರು ನೋಂದಣಿಗೆ ಲಾರ್ಡ್ಸ್ ಶಾಲೆ, ಕಿದಿಯೂರ್ ಹೋಟೆಲ್ ಸಂಪರ್ಕಿಸಬಹುದು. ಪರೀಕ್ಷೆಯ ದಿನ ನೇರವಾಗಿ ಆಗಮಿಸಿಯೂ ಹೆಸರು ನೀಡಬಹುದು. ಸ್ಪರ್ಧೆಯಲ್ಲಿ ಉತ್ತೀರ್ಣರಾದವರು ಲಾರ್ಡ್ಸ್​ ಸ್ಕೂಲ್​ನಲ್ಲಿ ಕಲಿಕೆಗೆ ಆಗಮಿಸಿದಲ್ಲಿ 10ನೇ ತರಗತಿವರೆಗೂ ಪ್ರತಿವರ್ಷ ಪ್ರತಿಭಾ ಪುರಸ್ಕಾರ ನೀಡಲಾಗುವುದು ಎಂದರು.

ಸುದ್ದಿಗೋಷ್ಠಿಯಲ್ಲಿ ಕಿದಿಯೂರು ಎಜುಕೇಷನ್​ ಟ್ರಸ್ಟ್​ನ ಆಡಳಿತಾಧಿಕಾರಿ ಹಿರಿಯಣ್ಣ ಸೇರಿಗಾರ್​, ಸಂಸ್ಥೆಯ ಸಿಇಒ ಜೀಮ್​ ನಜೀರ್​ ಅಹ್ಮದ್​, ಕಿದಿಯೂರು ಹೋಟೆಲ್​ನ ಮೆನೇಜರ್​ ವಿಲಾಸಕುಮಾರ್​ ಉಪಸ್ಥಿತರಿದ್ದರು.

"