ಉಡುಪಿ: ಉಡುಪಿ ಪುತ್ತಿಗೆ ಮಠದ ಸುಗುಣೇಂದ್ರ ಶ್ರೀಗಳ ಧಾರ್ಮಿಕ, ಆಧ್ಯಾತ್ಮಿಕ ಮತ್ತು ಸಾಮಾಜಿಕ ಭಾಗಿತ್ವವು ಪ್ರೇರಣಾದಾಯಕವಾಗಿದೆ. ವಿಶ್ವ ಶಾಂತಿ ಬಯಸುವ ಹಾಗೂ ಅದಕ್ಕಾಗಿ ವಿದೇಶಗಳಲ್ಲೂ ಭಗವದ್ಗೀತೆಯ ಸಾರ ಪ್ರಸಾರ ಮಾಡುತ್ತಿರುವ ಶ್ರೀಗಳ ಕಾರ್ಯದಿಂದ ಪ್ರಭಾವಿತನಾಗಿದ್ದೇನೆ ಎಂದು ಮಾರಿಷಸ್​ ದೇಶದ ರಾಷ್ಟ್ರಪತಿ ಧರಮ್​ ಬೀರ್​ ಗೋಕುಲ್​ ತಿಳಿಸಿದರು.

ವಿಶ್ವ ಧಾರ್ಮಿಕ ನಾಯಕರ ಸಮಾವೇಶದಲ್ಲಿ ಭಾಗವಹಿಸಲು ಮಾರಿಷಸ್​ ಪ್ರವಾಸದಲ್ಲಿರುವ ಪುತ್ತಿಗೆ ಶ್ರೀಗಳನ್ನು ರಾಷ್ಟ್ರಪತಿ ಭವನಕ್ಕೆ ಆಹ್ವಾನಿಸಿ, ಆಗಮಿಸಿದ್ದ ಅವರನ್ನು ಸ್ವಾಗತಿಸಿ 40 ನಿಮಿಷಗಳ ಕಾಲ ಪ್ರಸ್ತುತ ವಿದ್ಯಮಾನಗಳ ಕುರಿತು ಮಾತನಾಡಿದರು.

ಭಗವದ್ಗೀತೆಯ ಅನುಸರಣೆಯಿಂದ ಮಾತ್ರ ಜಗದಲ್ಲಿ ಶಾಂತಿ ನೆಲೆಸಲು ಸಾಧ್ಯ. ಅದಕ್ಕಾಗಿಯೇ ತಾವು ಕೋಟಿ ಗೀತಾ ಲೇಖನ ಯಜ್ಞ ನಡೆಸುತ್ತಿರುವುದಾಗಿ ಶ್ರೀಗಳು ತಿಳಿಸಿದರು. ಭಾರತವಷ್ಟೇ ಅಲ್ಲದೆ ವಿಶ್ವದಾದ್ಯಂತ ಜನರು ಗೀತೆಯನ್ನು ಬರೆದು, ಅನುಸರಿಸಿ ಸನ್ನಡತೆ ಅಳವಡಿಸಿಕೊಂಡಿದ್ದಾರೆ ಎಂದರು. ಶ್ರೀಗಳ ಈ ಮಾತಿನಿಂದಲೂ ಪ್ರಭಾವಿತರಾದ ಧರಮ್​ ಬೀರ್​ ಗೋಕುಲ್​, ಮಾರಿಷಸ್​ನ ಪ್ರಜೆಗಳಿಗೂ ಮಾರ್ಗದರ್ಶನ ನೀಡುವಂತೆ ಕೋರಿದರು. ಶ್ರೀಗಳಿಂದ ಆಶೀರ್ವಾದ ಪಡೆದು, ಗೀತಾ ಲೇಖನದ ದೀಕ್ಷೆ ಪಡೆದರು.