ವಿದ್ಯಾರ್ಥಿ ನಾಪತ್ತೆ

ಕಾಸರಗೋಡು: ಆಸ್ಪತ್ರೆಗೆ ದಾಖಲಾಗಿದ್ದ ಪತಿಯನ್ನು ನೋಡಿಕೊಳ್ಳುತ್ತಿದ್ದ ಪತ್ನಿಯ 52,000 ರೂ. ನಗದು ಹಾಗೂ ಹಲವು ದಾಖಲೆಗಳಿದ್ದ ಪರ್ಸ್ ಕಳವಾಗಿರುವ ಬಗ್ಗೆ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಪುತ್ರ, ಮಾಯಿಪ್ಪಾಡಿ ಕೈವಲ್ಯ ಹೌಸ್‌ನ ಟಿ.ಎ.ಅಬ್ದುಲ್ ಖಾದರ್ ದೂರು ನೀಡಿದ್ದಾರೆ. ಅಸೌಖ್ಯಪೀಡಿತರಾಗಿದ್ದ ತಂದೆಯ ಆರೈಕೆಗಾಗಿ ಆಸ್ಪತ್ರೆಗೆ ತೆರಳಿದ್ದ ತಾಯಿ ನಗದು, ದಾಖಲೆ ಹೊಂದಿದ್ದ ಬ್ಯಾಗನ್ನು ಆಸ್ಪತ್ರೆ ಕೊಠಡಿಯ ಮೇಜಿನ ಡ್ರಾಯರ್‌ನಲ್ಲಿ ಇಟ್ಟಿದ್ದರು. ಕೆಲ ಹೊತ್ತಿನ ಬಳಿಕ ಬ್ಯಾಗ್ ನಾಪತ್ತೆಯಾಗಿರುವುದಾಗಿ ದೂರಿನಲ್ಲಿ ತಿಳಿಸಿದ್ದಾರೆ.

ಕಾಸರಗೋಡು: ಮಂಜೇಶ್ವರ ಪೊಲೀಸ್ ಠಾಣಾ ವ್ಯಾಪ್ತಿಯ ಹೊಸಂಗಡಿಯ ಅಂಗಡಿಪದವಿನ ಹಳೇ ಹೆಂಚಿನ ಮನೆಯಲ್ಲಿ ಕೊಲೆಗೀಡಾದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದ ವ್ಯಕ್ತಿಯನ್ನು ಹೊಸಪೇಟೆಯ ಲಿಂಗನಾಯಕನಹಳ್ಳಿಯ ದಿ.ಪೀರನಾಯ್ಕ ಎಂಬುವರ ಪುತ್ರ ಸತೀಶ (38) ಎಂದು ಗುರುತಿಸಲಾಗಿದೆ. ಶುಕ್ರವಾರ ರಾತ್ರಿ 8ರ ವೇಳೆಗೆ ಅಂಗಡಿಪದವು ನಿವಾಸಿ ನರಸಿಂಹಮೂರ್ತಿ ಎಂಬುವರ ಎರಡಂತಸ್ತಿನ ಮನೆ ಕೆಳಭಾಗದ ಅಡುಗೆ ಕೊಠಡಿಯಲ್ಲಿ ತಲೆ ಛಿದ್ರಗೊಂಡ ಸ್ಥಿತಿಯಲ್ಲಿ ಮೃತದೇಹ ಪತ್ತೆಯಾಗಿತ್ತು. ಇದೇ ಕೋಣೆಯಲ್ಲಿ ಮದ್ಯಪಾನ ಮಾಡಿ, ಹೊಡೆದಾಟ ನಡೆಸಿದ ಕುರುಹುಗಳು ಪತ್ತೆಯಾಗಿದ್ದು, ತಂಡಗಳೊಳಗೆ ನಡೆದ ಕಲಹದಲ್ಲಿ ಕೊಲೆ ನಡೆದಿರಬೇಕೆಂದು ಪೊಲೀಸರು ಶಂಕಿಸಿದ್ದಾರೆ. ಮಂಜೇಶ್ವರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು ತನಿಖೆ ನಡೆಸುತ್ತಿದ್ದಾರೆ.

ಕಾಸರಗೋಡು: ಬದಿಯಡ್ಕ ಪೊಲೀಸ್ ಠಾಣೆ ವ್ಯಾಪ್ತಿಯ ಏಳ್ಕಾನ ಬಳಿಯ ಬಾಳೆಗಳಿ ನಿವಾಸಿ ಪಾರ್ವತಿ (73) ಎಂಬುವರ ಮನೆ ಬಾಗಿಲು ಒಡೆದು ನುಗ್ಗಿದ ಕಳ್ಳರು 2 ಪವನ್ ಚಿನ್ನಾಭರಣ ಹಾಗೂ 50 ಸಾವಿರ ರೂ. ದೋಚಿದ್ದಾರೆ. ಪಾರ್ವತಿ ಅವರು ರಾತ್ರಿ ಊಟ ಮಾಡಿ ಎಂದಿನಂತೆ ಸಮೀಪದಲ್ಲಿರುವ ತರವಾಡು ಮನೆಗೆ ಮಲಗಲು ಹೋಗಿದ್ದರು. ಮರುದಿನ ಬೆಳಗ್ಗೆ ಮನೆಗೆ ಆಗಮಿಸಿದಾಗ ಕಳವು ನಡೆದಿರುವು ಬೆಳಕಿಗೆ ಬಂದಿದೆ. ಕಪಾಟಿನಲ್ಲಿದ್ದ 2 ಪವನ್ ಚಿನ್ನ ಹಾಗೂ 50 ಸಾವಿರ ರೂ. ನಗದು ಕಳವಾಗಿದೆ ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ಕಾಸರಗೋಡು: ಉಪ್ಪಳ ಐಲ ಸಮುದ್ರ ದಡದಲ್ಲಿ ಪತ್ತೆಯಾಗಿದ್ದ ಮೃತದೇಹ ಮುಳಿಂಜ ಮಹಾನಗರ ನಿವಾಸಿ, ದೈವ ನರ್ತನ ಕಲಾವಿದ ತಿಮ್ಮಪ್ಪ(60) ಎಂಬುವರದ್ದು ಎಂದು ಪತ್ತೆ ಹಚ್ಚಲಾಗಿದೆ. ಬುಧವಾರ ಐಲ ಸಮುದ್ರ ಕರಾವಳಿಯಲ್ಲಿ ಅಪರಿಚಿತ ಮೃತದೇಹ ಪತ್ತೆಯಾಗಿತ್ತು. ಕರಾವಳಿ ಠಾಣೆ ಪೊಲೀಸರ ಸಹಾಯದಿಂದ ಶವವನ್ನು ಮಂಗಲ್ಪಾಡಿಯ ತಾಲೂಕು ಆಸ್ಪತ್ರೆ ಶವಾಗರಕ್ಕೆ ತಲುಪಿಸಲಾಗಿತ್ತು. ಬುಧವಾರ ಬೆಳಗ್ಗೆ ಉಪ್ಪಳಕ್ಕೆ ಹೋಗುವುದಾಗಿ ತೆರಳಿದ್ದ ತಿಮ್ಮಪ್ಪ ಮನೆಗೆ ವಾಪಸಾಗಿರಲಿಲ್ಲ. ಮನೆಯವರು ಹುಡುಕಾಡಿದರೂ ಸಿಗದಿದ್ದಾಗ ಮಂಜೇಶ್ವರ ಠಾಣೆ ಪೊಲೀಸರಿಗೆ ದೂರು ನಿಡಲು ಮುಂದಾಗುತ್ತಿದ್ದಂತೆ ಮೃತದೇಹದ ಗುರುತು ಪತ್ತೆಯಾಗಿದೆ.