ನೆಲ್ಯಾಡಿ ಪದವಿ ಕಾಲೇಜು ಉಳಿಸಲು ಕ್ರಮ

ಕಡಬ ತಾಲೂಕಿನ ನೆಲ್ಯಾಡಿ ಸರ್ಕಾರಿ ಪದವಿ ಕಾಲೇಜು ಪ್ರಸ್ತುತ ಮುಚ್ಚುವ ಹಂತದಲ್ಲಿದ್ದು ಕಾಲೇಜು ಉಳಿಸಲು ಕ್ರಮ ಕೈಗೊಳ್ಳಬೇಕು. ಕಾಲೇಜಿನಲ್ಲಿ ಪ್ರಥಮ ಮತ್ತು ದ್ವಿತೀಯ ಬಿಎ-ಬಿಕಾಂ ತರಗತಿಗಳಲ್ಲಿ ವಿದ್ಯಾರ್ಥಿಗಳೇ ಇಲ್ಲ. ಕೇವಲ ಅಂತಿಮ ತರಗತಿ ಮಾತ್ರ ಇದೆ. ಇದರಿಂದ ಭವಿಷ್ಯದಲ್ಲಿ ಈ ಭಾಗದ ಕಡುಬಡವರ ಮಕ್ಕಳು ಉನ್ನತ ಶಿಕ್ಷಣದಿಂದ ವಂಚಿತಗೊಳ್ಳುವ ಸ್ಥಿತಿ ನಿರ್ಮಾಣವಾಗುತ್ತದೆ ಎಂದು ಮುಖಂಡರು ಅಳಲು ತೋಡಿಕೊಂಡರು.

ಕಡಬ ತಾಲೂಕು ಆಡಳಿತ ಸೌಧದ ಸಭಾಂಗಣದಲ್ಲಿ ತಾಲೂಕುಮಟ್ಟದ ಪರಿಶಿಷ್ಟ ಜಾತಿ-ಪಂಗಡದ ಕುಂದುಕೊರತೆ ಸಭೆಯಲ್ಲಿ ವಿಷಯ ಪ್ರಸ್ತಾಪಿಸಿದ ಆನಂದ್ ಕೆ.ಪಿ., ಪದವಿ ಕಾಲೇಜು ಮುಚ್ಚಿದರೆ ಮುಂದಿನ ಶಿಕ್ಷಣಕ್ಕೆ ಕತ್ತರಿ ಬೀಳಲಿದೆ. ಪ್ರಸ್ತುತ ಬಾಡಿಗೆ ಕಟ್ಟಡದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕಾಲೇಜನ್ನು ಕಡಬ ಕಾಲೇಜಿನೊಂದಿಗೆ ವಿಲೀನಗೊಳಿಸಬೇಕು ಎಂದರು. ಕಾಲೇಜು ಶಿಕ್ಷಣ ನಮ್ಮ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಶಿಕ್ಷಣಾಧಿಕಾರಿ ಸ್ಪಷ್ಟನೆ ನೀಡಿದರು.

ನೆಲ್ಯಾಡಿಯಲ್ಲಿ ಅಂಬೇಡ್ಕರ್ ಭವನಕ್ಕೆ ಹೋರಾಟ ಮಾಡಿ ಜಾಗ ಪಡೆದುಕೊಂಡಿದ್ದೇವೆ. ಹಲವು ವರ್ಷ ಕಳೆದರೂ ಭವನ ನಿರ್ಮಾಣಕ್ಕೆ ಅನುದಾನ ನೀಡುವಲ್ಲಿ ಮುತುವರ್ಜಿ ತೋರಿಸುತ್ತಿಲ್ಲ. ನೆಲ್ಯಾಡಿಯ ಪಡುವೆಟ್ಟು ಎಂಬಲ್ಲಿ 80 ದಲಿತ ಕುಟುಂಬಗಳಿಗೆ ಸ್ಮಶಾನ ಭೂಮಿ ಇಲ್ಲ. ಇದ್ದ ಸ್ಮಶಾನವನ್ನೂ ಅರಣ್ಯ ಇಲಾಖೆ ತನ್ನ ವಶಕ್ಕೆ ತೆಗೆದುಕೊಂಡಿದೆ. ಹೆಣ ಸುಡಲೂ ಜಾಗ ಇಲ್ಲ ಎಂದು ಸದಸ್ಯರು ದೂರಿದರು.

ಕಡಬ ತಹಸೀಲ್ದಾರ್ ಗಣೇಶ ಸವಣೂರು ಅಧ್ಯಕ್ಷತೆ ವಹಿಸಿದ್ದರು. ವಸಂತ, ಆನಂದ್, ಲಲಿತಾ ಈಶ್ವರ್, ರಾಜೇಶ್ವರಿ, ದೇವಕಿ, ಸತೀಶ್, ತಾಪಂ ಕಾರ್ಯನಿರ್ವಹಣಾಧಿಕಾರಿ ನವೀನ್ ಭಂಡಾರಿ, ತೋಟಗಾರಿಕಾ ಇಲಾಖೆ ಅಧಿಕಾರಿ ರೇಖಾ, ಪಿಡಿಒ ಆನಂದ್ ಗೌಡ, ಅರಣ್ಯ ಇಲಾಖೆ ಅಧಿಕಾರಿ ಸಂಧ್ಯಾ, ಪಿಡಿಒ ನಾರಾಯಣ ಗೌಡ, ಸಿಡಿಪಿಒ ಹರೀಶ್, ಲೋಕೋಪಯೋಗಿ ಇಲಾಖೆ ಇಂಜಿನಿಯರ್ ಪ್ರಮೋದ್, ಪಪಂ ಸಿಬ್ಬಂದಿ ಹರೀಶ್, ಶಿಕ್ಷಣ ಇಲಾಖೆಯ ಹರಿಪ್ರಸಾದ್ ಮತ್ತಿತರರ ಅಧಿಕಾರಿಗಳು ಉಪಸ್ಥಿತರಿದ್ದರು.

ಸವಣೂರಿನಲ್ಲಿ ಪರಿಶಿಷ್ಟ ಜಾತಿ-ಪಂಗಡದ ಅನುದಾನದಿಂದ ಅಂಬೇಡ್ಕರ್ ಭವನ ನಿರ್ಮಾಣ ಮಾಡುವುದಾಗಿ ತಿಳಿಸಿ ಯುವಕ ಮಂಡಲದ ಕಟ್ಟಡ ನಿರ್ಮಿಸಲಾಗಿದೆ. ಹಲವಾರು ವರ್ಷಗಳಿಂದ ಈ ಬಗ್ಗೆ ಆಕ್ಷೇಪ ಮಾಡುತ್ತಿದ್ದೇವೆ. ಪಹಣಿಯಲ್ಲೂ ಅಂಬೇಡ್ಕರ್ ಭವನ ಎಂದೇ ದಾಖಲಾಗಿದೆ. 1.25 ಲಕ್ಷ ರೂ. ಅನುದಾನ ಬಂದಿದೆ. ಆದರೆ ಕಟ್ಟಡಕ್ಕೆ ಈವರೆಗೂ ಅಂಬೇಡ್ಕರ್ ಭವನ ಎಂದು ಹೆಸರಿಟ್ಟಿಲ್ಲ. ದಲಿತ ಸಂಘದ ಕಾರ್ಯಕ್ರಮಗಳಿಗೂ ಕಟ್ಟಡ ನೀಡುತ್ತಿಲ್ಲ ಎಂದು ಬಾಬು ಎನ್. ಆರೋಪಿಸಿದರು.

ಆಲಂಕಾರು ಗ್ರಾಮದ 203 ಸರ್ವೇ ನಂಬರ್‌ನ ಡಿಸಿ ಮನ್ನಾ ಭೂಮಿ ಬಗ್ಗೆ ಈಗಾಗಲೇ ಜಂಟಿ ಸರ್ವೇಗೆ ನೀಡಲಾಗಿದೆ ಎಂದು ಸಮಾಜ ಕಲ್ಯಾಣ ಇಲಾಖಾಧಿಕಾರಿ ಮಾಹಿತಿ ನೀಡಿದಾಗ ಆಕ್ರೋಶ ವ್ಯಕ್ತಪಡಿಸಿದ ಶಶಿಧರ್, ಬಾಬು, ಮೋನಪ್ಪ, ಪ್ರತಿ ಬಾರಿ ಕೇಳಿದಾಗಲೂ ಇದೇ ಉತ್ತರ ನಿಮ್ಮಿಂದ ಬರುತ್ತಿದೆ. ಕಾಟಾಚಾರದ ಸಭೆಗೆ ನಾವು ಯಾಕೆ ಬರಬೇಕು? ಎಂದರು.