ಅಪರಿಚಿತ ಸ್ಥಳಕ್ಕೆ ಹೆತ್ತಮ್ಮನ ಬಿಟ್ಟುಹೋದ ಪುತ್ರ!

* ಉಡುಪಿ ಬ್ರಹ್ಮಾವರದಲ್ಲಿ ತಮಿಳುನಾಡಿನ ವೃದ್ಧೆಯ ರಕ್ಷಣೆ

* ಅಪ್ಪನ ದುಷತ್ಯಕ್ಕೆ ಅಜ್ಜಿಯ ಮೊಮ್ಮಗನ ಸಾಥ್​ *

ಉಡುಪಿ: ಜನ್ಮ ನೀಡಿದ ತಾಯಿಯನ್ನೇ ಪುತ್ರನೋರ್ವ ಕಾರಿನಲ್ಲಿ ಕರೆತಂದು ಅಪರಿಚಿತ ಸ್ಥಳದಲ್ಲಿ ಬಿಟ್ಟುಹೋದ ಅಮಾನವೀಯ ಘಟನೆ ಬ್ರಹ್ಮಾವರದಲ್ಲಿ ನಡೆದಿದೆ.

ತಮಿಳುನಾಡಿನ ತಿರವುಳ್ಳೂರು ನಿವಾಸಿ ಸರಸ್ವತಿ (72) ಮಕ್ಕಳಿಂದಲೇ ಪರಿತ್ಯಕ್ತಳಾದ ತಾಯಿ.

ಬ್ರಹ್ಮಾವರದ ಎಸ್​ಎಂಎಸ್​ ಆಂಗ್ಲ ಮಾಧ್ಯಮ ಶಾಲೆಯ ಬಳಿ ಅಸಹಾಯಕ ಸ್ಥಿತಿಯಲ್ಲಿದ್ದ ಹಾಗೂ ದಿಕ್ಕು ತೋಚದೆ ಚಡಪಡಿಸುತ್ತಿದ್ದ ಅಪರಿಚಿತ ವೃದ್ಧೆಯನ್ನು ಶಾಲೆಯ ಬಸ್​ ಚಾಲಕ ರಾಮನಾಥ್​ ಶೆಣೈ ಗಮನಿಸಿ, ಸಮಾಜಸೇವಕ ನಿತ್ಯಾನಂದ ಒಳಕಾಡು ಅವರಿಗೆ ಮಾಹಿತಿ ನೀಡಿದರು. ತಕ್ಷಣ ಸ್ಪಂದಿಸಿದ ನಿತ್ಯಾನಂದ ಒಳಕಾಡು, 112 ತುರ್ತು ಪೊಲೀಸ್​ ಸಹಾಯವಾಣಿ ಸಿಬ್ಬಂದಿ ನೆರವಿನಿಂದ ವೃದ್ಧೆಯನ್ನು ರಕ್ಷಿಸಿ ಉಡುಪಿ ಜಿಲ್ಲಾಸ್ಪತ್ರೆಗೆ ತಂದು ದಾಖಲಿಸಿದರು.

ಮೊಮ್ಮಗನೂ ಇದ್ದ

ಪುತ್ರ ಪ್ರದೀಪ್​ ಕುಮಾರ್​ ಕಾರಿನಲ್ಲಿ ನನ್ನನ್ನು ಇಲ್ಲಿಗೆ ತಂದು, ಬಳಿಕ ಆಟೋದವರನ್ನು ಕರೆದು ನನ್ನನ್ನು ಈ ಶಾಲೆಯ ಹತ್ತಿರ ಬಿಡಿ, ಅವರನ್ನು ಕರೆದುಕೊಂಡು ಹೋಗಲು ಜನ ಬರುತ್ತಾರೆ ಎಂದು ತಿಳಿಸಿ ಹೋಗಿದ್ದಾರೆ. ನನ್ನ ಮಗನೊಂದಿಗೆ ಮೊಮ್ಮಗ ಶಿವಾನಂದ್​ ಸಹ ಇದ್ದ ಎಂದು ನೊಂದ ವೃದ್ಧೆ ತಿಳಿಸಿದ್ದಾರೆ. ಯಾಕಾಗಿ ಪುತ್ರ ಈ ರೀತಿ ಮಾಡಿದ ಎಂದು ಪ್ರಶ್ನಿಸಿದರೆ ಉತ್ತರಿಸದ ಆ ತಾಯಿಯ ಕಣ್ಣೀರು ಆಕೆಗೆ ಎದುರಾದ ಸಂಕಷ್ಟಕ್ಕೆ ಉತ್ತರವಾಗಿತ್ತು.

ಅನಾರೋಗ್ಯದಲ್ಲಿರುವಂತೆ ಕಾಣುವ ವೃದ್ಧೆ ನೈಟಿ ಧರಿಸಿದ್ದು, ಆಕೆಯ ಬಳಿ ಒಂದಿಷ್ಟು ಮಾತ್ರೆಯೂ ಇದೆ. ತೀವ್ರ ಕಾಲುನೋವಿನಿಂದ ಬಳಲುತ್ತಿರುವ ಆಕೆಗೆ ನಡೆದಾಡಲು ಆಗದ ಸ್ಥಿತಿಯಿದ್ದು, ಅವರ ಬಳಿ ಹೊಸ ವಾಕರ್​ ಕೂಡ ಇತ್ತು. ವೃದ್ಧ ತಾಯಿಯೋರ್ವಳ ಈ ಸ್ಥಿತಿ ಕಂಡು ಸ್ಥಳದಲ್ಲಿದ್ದ ಸಾರ್ವಜನಿಕರು ನಮ್ಮ ಸಮಾಜ ಎತ್ತ ಸಾಗುತ್ತಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಘಟನೆಯ ಕುರಿತು ನಿತ್ಯಾನಂದ ಒಳಕಾಡು ಅವರು ಮಹಿಳಾ ಪೊಲೀಸ್​ ಠಾಣೆಗೆ ಹಾಗೂ ಹಿರಿಯ ನಾಗರಿಕರ ಸಹಾಯವಾಣಿಗೆ ಮೌಖಿಕವಾಗಿ ಮಾಹಿತಿ ನೀಡಿದ್ದಾರೆ.