ಗ್ರಾಹಕರ ಪ್ರೀತಿ, ವಿಶ್ವಾಸ ಗಳಿಸಿದ ಶಿರಸಿ ಅರ್ಬನ್​ ಬ್ಯಾಂಕ್​

* ಎಸ್​ವಿಸಿ ಬ್ಯಾಂಕ್​ ನಿರ್ದೇಶಕ ಸತೀಶ್​ ತೋನ್ಸೆ ರಾವ್​ ಶ್ಲಾಘನೆ

* ಉಡುಪಿಯಲ್ಲಿ 24ನೇ ಶಾಖೆಯ ಉದ್ಘಾಟನೆ

ಉಡುಪಿ: ರಾಜ್ಯದಲ್ಲಿ ಅತಿಹೆಚ್ಚು ಮನೆ ಸಾಲ ನೀಡುವುದರಲ್ಲಿ ಬೆಂಗಳೂರು, ಮಂಗಳೂರಿನ ಬಳಿಕ ಉಡುಪಿ 3ನೇ ಸ್ಥಾನದಲ್ಲಿದೆ. ಭಾರಿ ಪ್ರಮಾಣದಲ್ಲಿ ಅಭಿವೃದ್ಧಿ ಕಾಣುತ್ತಿರುವ ಉಡುಪಿಯಲ್ಲಿ ಶತಮಾನಗಳ ಸೇವಾನುಭ ಹೊಂದಿರುವ ಹಿರಿಯ ಸಹಕಾರಿ ಶಿರಸಿ ಅರ್ಬನ್​ ಬ್ಯಾಂಕ್​ನ ಶಾಖೆ ಆರಂಭಗೊಂಡಿರುವುದು ಅರ್ಥಪೂರ್ಣ. ಎರಡೂವರೆ ಸಾವಿರ ಕೋಟಿ ರೂ. ಆರ್ಥಿಕ ವ್ಯವಹಾರ ನಡೆಸುತ್ತಿರುವ ಈ ಬ್ಯಾಂಕ್​ ಗ್ರಾಹಕರ ಪ್ರೀತಿ, ವಿಶ್ವಾಸ ಗಳಿಸಿದೆ. ಸಂಜೆ 6ರ ವರೆಗೂ ಬ್ಯಾಂಕಿಂಗ್​ ಸೇವೆ ನೀಡುತ್ತಿದ್ದು ಮಾದರಿಯಾಗಿದೆ ಎಂದು ಎಸ್​ವಿಸಿ ಕೋ-&ಆಪರೇಟಿವ್​ ಬ್ಯಾಂಕ್​ ಮುಂಬೈನ ನಿರ್ದೇಶಕ ಸತೀಶ್​ ತೋನ್ಸೆ ರಾವ್​ ಶ್ಲಾಘಿಸಿದರು.

ಉಡುಪಿ-ಮಣಿಪಾಲ ಹೆದ್ದಾರಿಯ ಕುಂಜಿಬೆಟ್ಟುವಿನಲ್ಲಿರುವ ಆಪಲ್​ ಶೋರೂಮ್​ ಇಮ್ಯಾಜಿನ್​ ಸಮೀಪದ ಮಿರಾಜ್​ ಕಟ್ಟಡದ ಗ್ರೌಂಡ್​ ಫ್ಲೋರ್​ನಲ್ಲಿ ರಾಜ್ಯದ ಸಹಕಾರಿ ಕ್ಷೇತ್ರದಲ್ಲಿ ಕಳೆದ 121 ವರ್ಷದಿಂದ ಉತ್ತಮ ಬ್ಯಾಂಕಿಂಗ್​ ಸೇವೆಯ ಮೂಲಕ ನಾಡಿನ ಗಮನ ಸೆಳೆದಿರುವ ಉತ್ತರ ಕನ್ನಡ ಜಿಲ್ಲೆ ಶಿರಸಿಯ 'ದಿ ಶಿರಸಿ ಅರ್ಬನ್​ ಸಹಕಾರಿ ಬ್ಯಾಂಕ್​ ಲಿ.'ನ 24ನೇ ಶಾಖೆಯನ್ನು ಸೋಮವಾರ ಉದ್ಘಾಟಿಸಿ ಮಾತನಾಡಿದರು.

ಉತ್ತಮ ಬ್ಯಾಂಕಿಂಗ್​ ಸೇವೆ

ಮಣಿಪಾಲದ ಡಾ. ಟಿಎಂಎ ಪೈ ಫೌಂಡೇಷನ್​ನ ಕೋಶಾಧಿಕಾರಿ ಟಿ.ಸಚಿನ್​ ಪೈ ಮಾತನಾಡಿ, ಗ್ರಾಮೀಣ ಭಾಗದ ಆರ್ಥಿಕ ಅಭಿವೃದ್ಧಿಯಲ್ಲಿ ಶಿರಸಿ ಅರ್ಬನ್​ ಬ್ಯಾಂಕ್​ನ ಕೊಡುಗೆ ಮಹತ್ತರವಾಗಿದೆ. ಸ್ಥಳಿಯರ ಆಶೋತ್ತರಗಳಿಗೆ, ಅವರ ಬದುಕಿಗೆ ಆಸರೆಯಾಗಿ ಕಾರ್ಯ ನಿರ್ವಹಿಸುತ್ತಿದೆ. ಉಡುಪಿ ಜನರಿಗೂ ಸಹ ಉತ್ತಮ ಬ್ಯಾಂಕೊಂದರ ಸೇವೆ ಲಭಿಸುತ್ತಿರುವುದು ಸಂತಸ ವಿಚಾರ ಎಂದರು.

ದಿ ಶಿರಸಿ ಅರ್ಬನ್​ ಸಹಕಾರಿ ಬ್ಯಾಂಕ್​ ಶಿರಸಿ ಅಧ್ಯಕ್ಷ ಜಯದೇವ್​ ಯು. ನೀಲೇಕಣಿ ಅಧ್ಯಕ್ಷತೆ ವಹಿಸಿದ್ದರು.

ಬ್ಯಾಂಕ್​ನ ಉಪಾಧ್ಯಕ್ಷ ಸಂತೋಷ್​ ಪಂಡಿತ್​, ವ್ಯವಸ್ಥಾಪನಾ ಮಂಡಳಿ ಅಧ್ಯಕ್ಷ ನಿತಿನ್​ ಕಾಸರಕೋಡು, ನಿರ್ದೇಶಕರಾದ ವರೀಂದ್ರ ಕಾಮತ್​, ಟಿ.ಎಸ್​. ಬಾಲಮಣಿ, ಬ್ಯಾಂಕ್​ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಆರತಿ ಎಸ್​. ಶೆಟ್ಟರ್​, ಬ್ಯಾಂಕ್​ನ ಡಿಜಿಎಂ ರಾಘವೇಂದ್ರ ಪೈ, ಉಡುಪಿ ಶಾಖೆಯ ವ್ಯವಸ್ಥಾಪಕ ಗಜಾನನ ಶೆಟ್ಟಿ, ಬ್ಯಾಂಕ್​ನ ಸಿಬ್ಬಂದಿ ಪಾಲ್ಗೊಂಡಿದ್ದರು.

ಬ್ಯಾಂಕ್​ನ ಒಳಾಂಗಣ ವಿನ್ಯಾಸ ಮಾಡಿದ ಗುತ್ತಿಗೆದಾರ ಪ್ರದೀಪ್​ ಶೆಟ್ಟಿ, ಕಟ್ಟಡದ ಮಾಲೀಕರು ಹಾಗೂ ಎಂಐಟಿಯ ಸಹಾಯಕ ಪ್ರಾಧ್ಯಾಪಕಿ ಡಾ. ಗಂಗೋತ್ರಿ ಸಾನಿಲ್​ ಅವರನ್ನು ಸನ್ಮಾನಿಸಲಾಯಿತು.

ಹಿರಿಯ ಸಂಗೀತ ಗುರು ವಿದುಷಿ ಡಾ. ಉಷಾ ಹೆಬ್ಬಾರ್​ ಗಣಪತಿ ಸ್ತುತಿ ಪ್ರಾರ್ಥಿಸಿದರು. ಬ್ಯಾಂಕ್​ನ ನಿರ್ದೇಶಕ ಪ್ರೊ. ಕೆ.ಎನ್​. ಹೊಸಮನಿ ಸ್ವಾಗತಿಸಿ, ಕಾರ್ಯಕ್ರಮ ನಿರ್ವಹಿಸಿದರು. ಬ್ಯಾಂಕ್​ನ ನಿರ್ದೇಶಕ ಸದಾನಂದ್​ ನಾಯ್ಕ್​ ವಂದಿಸಿದರು.