ಎಸ್‌ಐಆರ್ ಕರ್ತವ್ಯ ಪಟ್ಟಣ ಪಂಚಾಯಿತಿಗೆ ಹೊರೆ

ಎಸ್‌ಐಆರ್ ಕರ್ತವ್ಯ, ಟ್ರೇಡ್ ಲೈಸೆನ್ಸ್, ಅಂಗಡಿಗಳ ಏಲಂ, ಎಸ್‌ಟಿಪಿ, ಚರಂಡಿ ಹೂಳೆತ್ತುವಿಕೆ, ನವಿಲುಗಳ ಸಾವು, ಪಪಂ ಸ್ವಾಗತ ಬೋರ್ಡ್ ಅಳವಡಿಕೆ ವಿಷಯದಲ್ಲಿ ಸದಸ್ಯರು ಗಂಭೀರ ಚರ್ಚೆ ನಡೆಸಿದರು.

ಪಪಂ ಸಿಬ್ಬಂದಿಗೆ ಎಸ್‌ಐಆರ್ ಕರ್ತವ್ಯ ವಹಿಸಲಾಗಿದೆ. ಇದರಿಂದ ಪಪಂನಲ್ಲಿ ಸಾರ್ವಜನಿಕರ ಕೆಲಸಗಳು ಸಕಾಲದಲ್ಲಿ ಆಗುತ್ತಿಲ್ಲ. ಎಸ್‌ಐಆರ್ ಕರ್ತವ್ಯ ಸರ್ಕಾರ ವಹಿಸಿರುವ ಜವಾಬ್ದಾರಿಯಾಗಿದ್ದರೂ, ಪ.ಪಂನಲ್ಲಿ ಕೆಲಸಗಳು ಆಗುತ್ತಿಲ್ಲ. ಇದಕ್ಕೆ ಪರ್ಯಾಯ ವ್ಯವಸ್ಥೆಯಾಗಬೇಕು ಎಂದು ಕೌನ್ಸಿಲರ್‌ಗಳಾದ ರಾಜೇಶ್ ಅಮೀನ್ ಮತ್ತು ಸಿರಾಜ್ ಬಜ್ಪೆ ಒತ್ತಾಯಿಸಿದರು. ಸಮಸ್ಯೆಗೆ ಸರ್ಕಾರವೇ ಸೂಕ್ತ ಪರಿಹಾರ ಸೂಚಿಸಬೇಕು ಎಂದು ಅಧ್ಯಕ್ಷರು ಉತ್ತರಿಸಿದರು.

22 ಅಂಗಡಿಗಳಲ್ಲಿ 2 ಅಂಗಡಿಗಳು ನಿಯಮಬಾಹಿರವಾಗಿ ಕಾರ್ಯಾಚರಿಸುತ್ತಿದ್ದು, ಅವುಗಳ ವಿರುದ್ಧ ಕ್ರಮ ಜರುಗಿಸಬೇಕು. ಮಾರುಕಟ್ಟೆ ಶುಲ್ಕ ವಸೂಲಿ ಸಮರ್ಪಕಗೊಳಿಸಬೇಕು ಹಾಗೂ ಶುಲ್ಕ ಹೆಚ್ಚಿಸಬೇಕೆಂಬ ಆಗ್ರಹ ಕೇಳಿಬಂತು.

ಬಜ್ಪೆ ಪಟ್ಟಣದ ಅಂದ ಹೆಚ್ಚಿಸುವ ಉದ್ದೇಶದಿಂದ ಪ್ರಸಕ್ತ ಮಾರುಕಟ್ಟೆ ಅಂಗಡಿಗಳ ಅವಧಿ ಮುಗಿದ ತಕ್ಷಣವೇ ಟೆಂಡರ್ ಕರೆಯಲಾಗುವುದು. ಬಜ್ಪೆ ಪೇಟೆಯಲ್ಲಿ ಟೆಂಟ್ ಅಳವಡಿಸಿ ಹೂವಿನ ವ್ಯಾಪಾರ ಮಾಡುತ್ತಿರುವ ವ್ಯಾಪಾರಿ ಮತ್ತು ನಿಯಮಬಾಹಿರವಾಗಿ ಕಾರ್ಯಾಚರಿಸುತ್ತಿರುವ 2 ಅಂಗಡಿಗಳ ವಿರುದ್ಧ ಕ್ರಮದ ಬಗ್ಗೆ ಮುಂದಿನ ಸಭೆಯಲ್ಲಿ ನಿರ್ಣಯಿಸಲಾಗುವುದು ಎಂದು ಅಧ್ಯಕ್ಷರು ಹೇಳಿದರು.

ಉಪಾಧ್ಯಕ್ಷೆ ಶರ್ಮಿಳಾ ಶೆಟ್ಟಿ, ಸ್ಥಾಯಿ ಸಮಿತಿ ಅಧ್ಯಕ್ಷ ರಿತೇಶ್ ಶೆಟ್ಟಿ, ಕೌನ್ಸಿಲರ್‌ಗಳಾದ ಸಿರಾಜ್ ಬಜ್ಪೆ, ಜಾಕೋಬ್ ಪಿರೇರಾ, ವೀಣಾ ಡಿಸೋಜ, ಗುಲ್ಶನ್ ಕರೀಂ, ಸುಪ್ರಿತಾ ಶೆಟ್ಟಿ, ಕಿರಣ್ ಕೆ., ದಿನೇಶ್ ಶೆಟ್ಟಿ, ಮಲ್ಲಿಕಾ ಸಿ, ರಶ್ಮಿತಾ ಬಿ., ಜಯಂತ್ ಪೂಜಾರಿ, ಆಡಳಿತಾಧಿಕಾರಿ ರತ್ನಪ್ರಸಾದ್, ಕಿರಿಯ ಇಂಜಿನಿಯರ್ ನಳಿನ್‌ಕುಮಾರ್, ಆರ್‌ಐ ರವಿ ಮತ್ತಿತರರು ಇದ್ದರು.

ಪ.ಪಂ ವ್ಯಾಪ್ತಿಯ 19 ವಾರ್ಡ್‌ಗಳಲ್ಲಿ ಚರಂಡಿ ಹೂಳೆತ್ತುವಿಕೆ ಸಮರ್ಪಕವಾಗಿಲ್ಲ ಎಂದು ಕೆಲವು ಕೌನ್ಸಿಲರ್‌ಗಳು ಹೂಳೆತ್ತುವ ಗುತ್ತಿಗೆದಾರನ ವಿರುದ್ಧ ಆರೋಪಿಸಿದರು. ಕೆಲವೆಡೆ ಜೆಸಿಬಿ ಬಳಸಿ ಚರಂಡಿ ಹೂಳೆತ್ತಿರುವುದರಿಂದ ಚರಂಡಿ ಹಾಳಾಗಿದೆ. ಹೂಳೆತ್ತಿರುವಲ್ಲಿ ಮತ್ತೆ ಚರಂಡಿಯಲ್ಲಿ ಹೂಳು ತುಂಬಿಕೊಂಡಿದ್ದು, ಮಳೆ ನೀರಿನೊಂದಿಗೆ ತ್ಯಾಜ್ಯ ನೀರು ಎಲ್ಲೆಂದರಲ್ಲಿ ಹರಿಯುತ್ತಿದೆ ಎಂದು ಕೌನ್ಸಿಲರ್‌ಗಳು ದೂರಿದರು. ಮುಂದಿನ 15 ದಿನದೊಳಗೆ ಸಮರ್ಪಕ ಹೂಳೆತ್ತುವಿಕೆ ನಡೆಯಬೇಕು. ಇಲ್ಲವಾದಲ್ಲಿ ಪ್ರತ್ಯೇಕ ಟೆಂಡರ್ ಕರೆಯಲಾಗುವುದು ಎಂದು ಅಧ್ಯಕ್ಷರು ಎಚ್ಚರಿಸಿದರು.

ಬಜ್ಪೆಯಲ್ಲಿ ಹೊಸ ಮಾರುಕಟ್ಟೆ ನಿರ್ಮಾಣಗೊಳ್ಳಲಿದೆ. ಪಾರ್ಕಿಂಗ್ ಸುಧಾರಿಸಲಿದೆ. ಈ ಬಗ್ಗೆ ಈಗಾಗಲೇ ಪ್ರಸ್ತಾವಿಸಲಾಗಿದ್ದು, ಶೀಘ್ರ ಅಂತಿಮ ರೂಪುರೇಷೆ ಸಿದ್ಧಗೊಳ್ಳಲಿದೆ. ಕೆಂಜಾರಿನಲ್ಲಿ ಖಾಸಗಿ ಅಪಾರ್ಟ್‌ಮೆಂಟ್‌ನಲ್ಲಿ ಅತ್ಯಾಧುನಿಕ ಎಸ್‌ಟಿಪಿ ಕಾರ್ಯಗತಗೊಂಡಿದೆ. ಎಲ್ಲ ಅಪಾರ್ಟ್‌ಮೆಂಟ್‌ಗಳಲ್ಲೂ ಈ ಮಾದರಿಯಲ್ಲಿ ಎಸ್‌ಟಿಪಿ ರಚನೆಯಾಗಬೇಕು. ಆಗ ಎಲ್ಲೆಂದರಲ್ಲಿ ಕೊಳಚೆ ನೀರು ಹರಿಯುವುದು ತಪ್ಪುತ್ತದೆ ಎಂದು ಲೋಕೇಶ್ ಪೂಜಾರಿ ಹೇಳಿದರು.

ಎಂಎಸ್‌ಇಝಡ್ ವ್ಯಾಪ್ತಿಯ ಜಿಎಂಪಿಎಲ್ ಕಂಪನಿಯಿಂದ ಪರಿಸರಕ್ಕೆ ತೀವ್ರ ತೊಂದರೆ ಉಂಟಾಗಿದೆ. ಅಲ್ಲಿ ಈಗಾಗಲೇ ಒಂದರೆಡು ನವಿಲುಗಳು ಸತ್ತಿವೆ. ನವಿಲುಗಳ ಸಾವಿಗೆ ಕಂಪನಿಯಿಂದ ಅಥವಾ ಅರಣ್ಯ ಇಲಾಖೆಯಿಂದ ಸೂಕ್ತ ಉತ್ತರ ಸಿಕ್ಕಿಲ್ಲ. ಕಂಪನಿ ಹೊರಗೆ ಬಿಡುತ್ತಿರುವ ಕಲುಷಿತ ನೀರು ವಿಷಕಾರಕ ಎಂದು ಎನ್‌ಐಟಿಕೆ ವರದಿ ಹೇಳಿದೆ. ಇಷ್ಟಿದ್ದರೂ ಅರಣ್ಯ ಇಲಾಖೆ ಮತ್ತು ಮಾಲಿನ್ಯ ನಿಯಂತ್ರಣ ಇಲಾಖೆ ವಿರುದ್ಧ ಎಫ್‌ಐಆರ್ ದಾಖಲಾಗಿಲ್ಲ ಎಂದ ಅಧ್ಯಕ್ಷರು, ಉನ್ನತಾಧಿಕಾರಿಗಳಿಗೆ ಪತ್ರ ಬರೆದು ಸಮಸ್ಯೆಯ ಗಂಭೀರತೆ ಬಗ್ಗೆ ಗಮನ ಸೆಳೆಯಲಾಗುವುದು. ಏರ್‌ಪೋರ್ಟ್‌ನಿಂದ ಕೆಳ ಪ್ರದೇಶಕ್ಕೆ ಹರಿದು ಬರುತ್ತಿರುವ ತ್ಯಾಜ್ಯ ನೀರಿನ ವಿರುದ್ಧ ಪ.ಪಂ ವತಿಯಿಂದ ಆಗಸ್ಟ್ 8ರಂದು ಪ್ರತಿಭಟನೆ ನಡೆಯಲಿದೆ ಎಂದರು.