ಶಿರೂರು ಅಳ್ವೆಗದ್ದೆ ದೇವಸ್ಥಾನ ಬ್ರಹ್ಮಕಲಶೋತ್ಸವ

ಶಿರೂರು ಅಳ್ವೆಗದ್ದೆಯ ಶ್ರೀ ಮಹಾಗಣಪತಿ ದೇವಸ್ಥಾನ ನವನಿರ್ಮಾಣಗೊಂಡಿದ್ದು, ಅದರ ಪುನಃ ಪ್ರತಿಷ್ಠಾಪನೆ ಹಾಗೂ ಬ್ರಹ್ಮಕಲಶೋತ್ಸವ ಏ.2ರಿಂದ 14ರವರೆಗೆ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆ ಮಾರ್ಗದರ್ಶನ, ಡಾ.ಜಿ.ಶಂಕರ್ ನೇತೃತ್ವದಲ್ಲಿ ರಾಮಚಂದ್ರ ಪರಂಭಟ್ಟ ಶಿರಾಲಿ ತಂತ್ರಿವರ್ಯರ ಪೌರೋಹಿತ್ಯದಲ್ಲಿ ವಿವಿಧ ಧಾರ್ಮಿಕ ಕಾರ್ಯಗಳೊಂದಿಗೆ ನಡೆಯಲಿದೆ.

ಅಳ್ವೆಗದ್ದೆ ದೇವಳವು ಉಡುಪಿ ಜಿಲ್ಲೆಯ ಬೈಂದೂರು ತಾಲೂಕಿನ ಗಡಿಭಾಗದಲ್ಲಿರುವ ಶಿರೂರು ಗ್ರಾಮದಲ್ಲಿದೆ. ಕಡಲನ್ನೇ ನಂಬಿ ಅಲೆಗಳಂತೆ ಅನಿಶ್ಚಿತ ಬದುಕಿನಲ್ಲಿಯೂ ನಿಶ್ಚಿತವಾದ ಜೀವನ ಕಟ್ಟಿಕೊಂಡ ಜನರ ಬದುಕಿನ ಆಸ್ತಿಕತೆಗೆ ಸ್ಫೂರ್ತಿಯಾಗಿನರುವುದು ಇಲ್ಲಿನ ಅಧಿದೇವತೆ ಶ್ರೀ ಮಹಾಗಣಪತಿ. ಎಂಟು ನೂರೈವತ್ತು ವರ್ಷಗಳ ಹಿಂದೆ ಇಲ್ಲಿನ ಕೆಲವರು ಕಾಶಿಯಿಂದ ಗಣಪತಿ ವಿಗ್ರಹ ತಂದು ಪೂಜಿಸಲು ಪ್ರಾರಂಭಿಸಿದರೆಂಬ ಮಾತು ಪ್ರಚಲಿತದಲ್ಲಿದೆ. ಇಂದಿನ ದೋಣಿ ನಿಲುಗಡೆಯ ತಾಣವೇ ಅಂದು ಮಹಾಗಣಪತಿ ದೇವರ ಸಾನ್ನಿಧ್ಯವಿದ್ದ ಸ್ಥಳವಾಗಿತ್ತು. ಎಂಟೂವರೆ ಶತಮಾನಗಳ ಐತಿಹ್ಯವಿರುವ ಈ ದೇವಳ ಇದೀಗ ಮೂರನೇ ಬಾರಿ ಪುನಃ ನಿರ್ಮಾಣಗೊಂಡಿದೆ. ಕಲೆ, ವಾಸ್ತುಶಿಲ್ಪ, ಕಾಷ್ಠಶಿಲ್ಪದ ಅಪರೂಪದ ಕೆತ್ತನೆಗಳು ಸೂಚಿಗಲ್ಲಿನಂತೆ ನೋಡುಗರನ್ನು ಆಕರ್ಷಿಸುತ್ತಿದೆ.

ಜಗದ್ಗುರು ಆದಿ ಶಂಕರಾಚಾರ್ಯ ಮಹಾಸಂಸ್ಥಾನಂ ಶ್ರೀ ವಾಗೀಶ್ವರಿ ಲಕ್ಷ್ಮೀನೃಸಿಂಹ ಭಾಗವತ ಮಹಾಪೀಠಂ ಪುಣ್ಯಸಂಗಮ ಕ್ಷೇತ್ರ ಶ್ರೀ ಮಠ ಬಾಳೆಕುದ್ರು ಹಂಗಾರಕಟ್ಟೆ ಶ್ರೀ ವಾಸುದೇವ ಸದಾಶಿವಾಶ್ರಮ ಶ್ರೀಪಾದಂಗಳವರು, ಜಗದ್ಗುರು ಆದಿ ಶಂಕರಾಚಾರ್ಯ ಮಹಾಸಂಸ್ಥಾನಂ ಶ್ರೀಮದ್ ಎಡನೀರು ಮಠ ಶ್ರೀ ಸಚ್ಚಿದಾನಂದ ಭಾರತೀ ಶ್ರೀಪಾದಂಗಳವರು ಆಶೀರ್ವಚನ ನೀಡಲಿದ್ದಾರೆ. ಪ್ರತಿದಿನ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮ ಹಾಗೂ ಅನ್ನಸಂತರ್ಪಣೆ ನಡೆಯಲಿದ್ದು, ವಿವಿಧ ಧಾರ್ಮಿಕ ಮುಖಂಡರು, ಗಣ್ಯರು ಭಾಗವಹಿಸಲಿದ್ದಾರೆ. ಅಳ್ವೆಗದ್ದೆ ಶ್ರೀ ಮಹಾಗಣಪತಿ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷ ರಾಮ ಎನ್.ಅಳ್ವೆಗದ್ದೆ, ದೇವಳದ ಅಧ್ಯಕ್ಷ ಗಣಪತಿ ಎಸ್.ಮೊಗವೀರ ಹಾಗೂ ಸಮಿತಿ ಸದಸ್ಯರು ಉತ್ಸವದ ತಯಾರಿಯಲ್ಲಿ ತೊಡಗಿದ್ದಾರೆ.