ಶಾಲೆಗೆ ಅನುದಾನ ಹಂಚಿಕೆ ವಿವಾದ

ವಿಜಯವಾಣಿ ಸುದ್ದಿಜಾಲ ಉಳ್ಳಾಲ

ನಾಲ್ಕನೇ ವಾರ್ಡಿನ ಅನುದಾನವನ್ನು ಮೂರನೇ ವಾರ್ಡಿನ ಶಾಲೆಗೆ ಮೀಸಲಿಟ್ಟ ವಿಚಾರ ಬುಧವಾರ ಕೋಟೆಕಾರು ಪಟ್ಟಣ ಪಂಚಾಯಿತಿ ಸಾಮಾನ್ಯ ಸಭೆಯಲ್ಲಿ ತೀವ್ರ ಚರ್ಚೆ ಹಾಗೂ ವಾಕ್ಸಮರಕ್ಕೆ ಕಾರಣವಾಯಿತು.

ನಾಲ್ಕನೇ ವಾರ್ಡಿನ 15 ಮಂದಿ ಸಲ್ಲಿಸಿರುವ ಆಕ್ಷೇಪದ ಕುರಿತು ಮುಖ್ಯಾಧಿಕಾರಿ ಮಾಲಿನಿ ಸಭೆಯ ಗಮನಕ್ಕೆ ತಂದರು. ಈ ವೇಳೆ ಮಾತನಾಡಿದ ಅಧ್ಯಕ್ಷೆ ದಿವ್ಯಾ ಶೆಟ್ಟಿ, ಆಕ್ಷೇಪ ವ್ಯಕ್ತವಾಗಿರುವ ಹಿನ್ನೆಲೆಯಲ್ಲಿ ಸಂಬಂಧಪಟ್ಟ ವಾರ್ಡ್ ಸದಸ್ಯರು ಹಾಗೂ ಸಾರ್ವಜನಿಕರನ್ನು ಕರೆಸಿ ಮಾತುಕತೆ ಮೂಲಕ ಗೊಂದಲ ಬಗೆಹರಿಸಲಾಗುವುದು. ಶಾಲೆಗೆ ಅನುದಾನ ನೀಡುವುದಕ್ಕೆ ನಮ್ಮ ವಿರೋಧವಿಲ್ಲ ಎಂದು ಸ್ಪಷ್ಟಪಡಿಸಿದರು.

ಇದಕ್ಕೆ ಪ್ರತಿಕ್ರಿಯಿಸಿದ 3ನೇ ವಾರ್ಡ್ ಸದಸ್ಯ ಸುಜಿತ್, ಇನ್ನೊಂದು ವಾರ್ಡ್‌ನ ಶಾಲೆಗೆ ಅನುದಾನ ನೀಡಬಾರದೆಂಬ ನಿಯಮವಿಲ್ಲ. 15 ಮಂದಿ ಆಕ್ಷೇಪಿಸಿದರೆ, 50ಕ್ಕೂ ಹೆಚ್ಚು ಮಂದಿ ಬೆಂಬಲ ವ್ಯಕ್ತಪಡಿಸಿದ್ದಾರೆ ಎಂದು ಸಮರ್ಥಿಸಿಕೊಂಡರು.

ನಾಲ್ಕನೇ ವಾರ್ಡ್ ಸದಸ್ಯ ಕಿರಣ್ ಮಾತನಾಡಿ, ಮಾಡೂರು ಸರ್ಕಾರಿ ಶಾಲೆಗೆ 8 ವಾರ್ಡ್‌ಗಳ ಬಡ ಮತ್ತು ಮಧ್ಯಮ ವರ್ಗದ ಮಕ್ಕಳು ಬರುತ್ತಿದ್ದು, ಯಾವುದೇ ರಾಜಕೀಯವಿಲ್ಲದೆ ಅಭಿವೃದ್ಧಿ ದೃಷ್ಟಿಯಿಂದ ಅನುದಾನ ಮೀಸಲಿಡಲಾಗಿದೆ ಎಂದರು.

ಶಾಲೆಗೆ ಅನುದಾನ ನೀಡಿದ್ದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದವರನ್ನು ಕರೆಸಿ ಮಾತನಾಡುವುದು ಚುನಾಯಿತ ಸದಸ್ಯನ ಹಕ್ಕನ್ನು ಮೊಟಕುಗೊಳಿಸಿದಂತೆ ಎಂದು ಕಾಂಗ್ರೆಸ್ ಸದಸ್ಯ ಅಹ್ಮದ್ ಅಜ್ಜಿನಡ್ಕ ಆಕ್ಷೇಪಿಸಿದರು.

ಅಧ್ಯಕ್ಷರು ಹಾಗೂ ಸದಸ್ಯರು ಒಂದೇ ಪಕ್ಷದವರಾಗಿರುವುದರಿಂದ ಆಂತರಿಕವಾಗಿ ಮಾತನಾಡಿ ಬಗೆಹರಿಸಿಕೊಳ್ಳಲು ಸೂಚಿಸಲಾಗಿದೆಯೆಂದು ಸದಸ್ಯರಾದ ಧೀರಜ್ ಹಾಗೂ ಉದಯಕುಮಾರ್ ತಿಳಿಸಿದರು. ಪಂಚಾಯಿತಿ ಸಭೆಯಲ್ಲಿ ಪಕ್ಷದ ವಿಚಾರ ತರುವುದು ಸರಿಯಲ್ಲ ಎಂದು ಸುಜಿತ್ ಆಕ್ಷೇಪ ವ್ಯಕ್ತಪಡಿಸಿದಾಗ, ನೀವೇ ಅನಗತ್ಯ ಗೊಂದಲ ಸೃಷ್ಟಿಸುತ್ತಿದ್ದೀರಿ ಎಂದು ಅಧ್ಯಕ್ಷರು ಹಾಗೂ ಉದಯಕುಮಾರ್ ತಿರುಗೇಟು ನೀಡಿದರು.

ಉಪಾಧ್ಯಕ್ಷ ಪ್ರವೀಣ್ ಬಗಂಬಿಲ ಉಪಸ್ಥಿತರಿದ್ದರು.

ಕಸ ನಿರ್ವಹಣಾ ವ್ಯವಸ್ಥೆ ಇಲ್ಲದೆ ಮಂಗಳೂರಿಗೆ ತ್ಯಾಜ್ಯ ಸಾಗಿಸಲಾಗುತ್ತಿದೆ ಎಂದು ಮುಖ್ಯಾಧಿಕಾರಿ ತಿಳಿಸಿದಾಗ, ಮನೆಗಳಲ್ಲಿ ಪೈಪ್ ಕಾಂಪೋಸ್ಟ್ ನಿರ್ಮಾಣಕ್ಕೆ ಮೀಸಲಿಟ್ಟಿದ್ದ 5 ಲಕ್ಷ ರೂ. ಅನುದಾನ ಏನಾಯಿತು? ಎಂದು ಸುಜಿತ್ ಇಂಜಿನಿಯರ್ ಅವರನ್ನು ತರಾಟೆಗೆ ತೆಗೆದುಕೊಂಡರು. ಪ್ರಾಯೋಗಿಕವಾಗಿ ಒಂದು ವಾರ್ಡ್‌ನಲ್ಲಿ ಪೈಪ್ ಕಾಂಪೋಸ್ಟ್ ಜಾರಿಗೊಳಿಸುವುದು ಸೂಕ್ತ ಎಂದು ಸ್ಥಾಯಿ ಸಮಿತಿ ಅಧ್ಯಕ್ಷ ಧೀರಜ್ ಕುಸಾಲನಗರ ಅಭಿಪ್ರಾಯಪಟ್ಟರು. ತ್ಯಾಜ್ಯ ವಾಹನ ತೊಳೆಯಲು ಯಂತ್ರೋಪಕರಣಗಳ ಅಗತ್ಯವಿದೆ ಎಂದು ಸಭೆಯಲ್ಲಿ ಚರ್ಚಿಸಲಾಯಿತು. ಮುಂದಿನ ದಿನಗಳಲ್ಲಿ ಪಪಂ ವ್ಯಾಪ್ತಿಯಲ್ಲಿ ಹೊಸ ಮನೆಗಳ ನಿರ್ಮಾಣ ಹೆಚ್ಚಲಿದ್ದು, ತ್ಯಾಜ್ಯ ಸಮಸ್ಯೆ ಗಂಭೀರವಾಗಲಿದೆ ಎಂದು ಆರೋಗ್ಯಾಧಿಕಾರಿ ವಿಕ್ರಂ ಕುಂದಾಪುರ ಎಚ್ಚರಿಸಿದರು.

ಸರ್ಕಾರದ ಸುತ್ತೋಲೆಯಂತೆ ಪಪಂ ವ್ಯಾಪ್ತಿಯಲ್ಲಿ ತಲಾ 10 ಲಕ್ಷ ರೂ. ಅನುದಾನದ 4 ‘ಭಾರತ್ ಜೋಡೋ’ ಸಂಘಗಳನ್ನು ಸ್ಥಾಪಿಸಲು ಅವಕಾಶವಿದ್ದು, ಈ ಯೋಜನೆಯಲ್ಲಿ ಯಾವುದೇ ರಾಜಕೀಯ ತಾರತಮ್ಯ ಮಾಡಬಾರದು ಎಂದು ಸದಸ್ಯ ಸುಜಿತ್ ಆಗ್ರಹಿಸಿದರು.

ಆರೋಗ್ಯ ಇಲಾಖೆ ಹೊರತುಪಡಿಸಿ ಕಂದಾಯಾಧಿಕಾರಿ, ಗ್ರಾಮಕರಣಿಕರು ಸೇರಿದಂತೆ ಇತರ ಪ್ರಮುಖ ಅಧಿಕಾರಿಗಳು ಸಭೆಗೆ ಗೈರುಹಾಜರಾಗಿದ್ದಕ್ಕೆ ಸದಸ್ಯ ಸುಜಿತ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ಅಧಿಕಾರಿಗಳು ಬೇರೆ ಕರ್ತವ್ಯದಲ್ಲಿದ್ದಾರೆ ಎಂದು ಆಡಳಿತ ಸಮಜಾಯಿಷಿ ನೀಡಿದಾಗ, ಪರ್ಯಾಯ ಹೊಣೆಗಾರಿಕೆ ಇದ್ದರೂ ಸಭೆಗೆ ಬಾರದಿರುವುದು ಸರಿಯಲ್ಲ ಎಂದು ಆಕ್ಷೇಪಿಸಿದರು.