ಸರ್ಕಾರಿ ಆಸ್ಪತ್ರೆಯಲ್ಲಿ ಸ್ಕ್ಯಾನಿಂಗ್ ಲಭ್ಯ

ಕುಂದಾಪುರ ಉಪವಿಭಾಗ ಆಸ್ಪತ್ರೆ 200ಕ್ಕೂ ಹೆಚ್ಚಿನ ಹಾಸಿಗೆಯುಳ್ಳ ಆಸ್ಪತ್ರೆಯಾಗಿದ್ದು, ಇಲ್ಲಿ ದಾಖಲಾದ ರೋಗಿಗಳ ಪರೀಕ್ಷೆಗೆ ಅಗತ್ಯವಾಗಿ ಬೇಕಾದ ಅಲ್ಟ್ರಾಸೌಂಡ್ ಸ್ಕಾೃನಿಂಗ್ ಯಂತ್ರ ಇರಲಿಲ್ಲ. ಅದರಲ್ಲೂ ತಾಯಿ ಮಕ್ಕಳ ಆಸ್ಪತ್ರೆಗೆ ಅತ್ಯವಶ್ಯವಾಗಿದ್ದ ಸೌಲಭ್ಯ ಇಲ್ಲದೆ ತೊಂದರೆಯಾಗುತ್ತಿತ್ತು. ಅಲ್ಟ್ರಾಸೌಂಡ್ ಸ್ಕಾೃನಿಂಗ್ ದೇಹದೊಳಗಿನ ಅಂಗಗಳು ಮತ್ತು ಮೃದು ಅಂಗಾಂಶಗಳ ಚಿತ್ರ ಪಡೆಯಲು ಬಳಸುವ ನೋವುರಹಿತ ಮತ್ತು ಸುರಕ್ಷಿತ ವಿಧಾನ. ವಿಕಿರಣ ಬಳಸದ ಕಾರಣ ಸುಧಾರಿತ ವೈದ್ಯಕೀಯ ಚಿಕಿತ್ಸೆಯಲ್ಲಿ ಇದನ್ನೇ ಬಳಸಲಾಗುತ್ತದೆ.

ಕುಂದಾಪುರ ಸರ್ಕಾರಿ ಆಸ್ಪತ್ರೆಯಲ್ಲಿ ಯುಎಸ್ ಸ್ಕಾೃನಿಂಗ್ ಯಂತ್ರ ಇಲ್ಲದ ಕಾರಣ ಖಾಸಗಿ ಸಂಸ್ಥೆ ಜತೆ ಒಪ್ಪಂದ ಮಾಡಿಕೊಂಡು ಬಿಪಿಎಲ್‌ನವರಿಗೆ ಸ್ಕಾೃನಿಂಗ್ ಮಾಡಲಾಗುತ್ತಿತ್ತು. ಆ ಸಂಸ್ಥೆಗೆ ಆಸ್ಪತ್ರೆ ವತಿಯಿಂದ ಪ್ರತಿ ಸ್ಕಾೃನಿಂಗ್‌ಗೆ 300 ರೂ.ನಂತೆ ಪಾವತಿಸಲಾಗುತ್ತಿತ್ತು. ತಿಂಗಳಿಗೆ ಲಕ್ಷಾಂತರ ರೂಪಾಯಿ ಬಿಲ್ ಬರುತ್ತಿತ್ತು. ಎಪಿಎಲ್‌ನವರಿಗೆ ಈ ಸೌಲಭ್ಯ ಇಲ್ಲದ ಕಾರಣ ಅವರು ಸಾವಿರಾರು ರೂ. ಪಾವತಿಸಬೇಕಿತ್ತು ಇಲ್ಲವೇ ಖಾಸಗಿ ಆಸ್ಪತ್ರೆಗಳನ್ನು ಅವಲಂಬಿಸುವಂತಾಗಿತ್ತು.

ಭ್ರೂಣದ ಬೆಳವಣಿಗೆ ಮತ್ತು ಆರೋಗ್ಯ ಪರೀಕ್ಷಿಸಲು, ಭ್ರೂಣದ ಸ್ಥಾನ ಮತ್ತು ವಯಸ್ಸನ್ನು ನಿರ್ಧರಿಸಲು, ಗರ್ಭಾಶಯದ ಸಮಸ್ಯೆ ಗುರುತಿಸಲು, ಗರ್ಭಾಶಯದಲ್ಲಿನ ಗಡ್ಡೆ ಪತ್ತೆ, ಪಾಲಿಸಿಸ್ಟಿಕ್ ಓವರಿ ಸಿಂಡ್ರೋಮ್, ಅಂಡಾಶಯದಲ್ಲಿನ ಅಸಹಜತೆ ಪತ್ತೆ, ಪಿತ್ತಕೋಶದ ಸಮಸ್ಯೆ, ಪಿತ್ತಕೋಶದಲ್ಲಿನ ಕಲ್ಲುಗಳನ್ನು ಗುರುತಿಸಲು, ಪಿತ್ತಕೋಶದ ಉರಿಯೂತ, ಕೊಬ್ಬಿನ ಯಕೃತ್, ಸಿರೋಸಿಸ್, ಯಕೃತ್ತಿನ ಗಡ್ಡೆಗಳು, ಮೂತ್ರಪಿಂಡದ ಕಲ್ಲುಗಳು, ಸೋಂಕು, ವಿವರಿಸಲಾಗದ ಹೊಟ್ಟೆ ನೋವಿನ ಕಾರಣ ಕಂಡುಹಿಡಿಯಲು, ಹೃದಯದ ಕಾರ್ಯ, ಕವಾಟಗಳು ಮತ್ತು ರಕ್ತನಾಳಗಳ ರಚನೆ ಪರೀಕ್ಷಿಸಲು, ಥೈರಾಯ್ಡ ಗ್ರಂಥಿಯಲ್ಲಿನ ಗಂಟುಗಳು, ಕ್ಯಾನ್ಸರ್ ತಪಾಸಣೆ, ಮೂಳೆ ಮತ್ತು ಸ್ನಾಯುಗಳ ಸಮಸ್ಯೆ ಪತ್ತೆ ಹಚ್ಚಲು ಅಲ್ಟ್ರಾಸೌಂಡ್ ಸ್ಕಾೃನಿಂಗ್ ಯಂತ್ರದ ಅಗತ್ಯ ಇದೆ.

ಆಸ್ಪತ್ರೆಯಲ್ಲಿ ಈವರೆಗೆ ರೇಡಿಯಾಲಜಿಸ್ಟ್ ಇರಲಿಲ್ಲ. ಇತ್ತೀಚೆಗೆ ರೇಡಿಯಾಲಜಿಸ್ಟ್ ನೇಮಕ ಮಾಡಿರುವುದರಿಂದ ಸ್ಕಾೃನಿಂಗ್ ಸುಲಭವಾಗಲಿದೆ. ಬಹುತೇಕ ಎಲ್ಲ ತಜ್ಞ ವೈದ್ಯರು ಆಸ್ಪತ್ರೆಯಲ್ಲಿ ಲಭ್ಯರಿದ್ದು ರೋಗಿಗಳಿಗೆ ಉತ್ತಮ ಆರೋಗ್ಯ ಸೇವೆ ಸಿಗುತ್ತಿದೆ. ಚರ್ಮ ವೈದ್ಯರ ಹುದ್ದೆ ಖಾಲಿಯಿದ್ದು ಶೀಘ್ರವೇ ಮಂಜೂರು ಮಾಡಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.