ಉಡುಪಿ: ದೈವದತ್ತವಾದ ಈ ಪ್ರಕೃತಿಯಲ್ಲಿ ಮನುಷ್ಯರು ಪರಿಸರದೊಂದಿಗೆ ಸಹಬಾಳ್ವೆಯಿಂದ ಬದುಕಬೇಕು. ಅದೇರೀತಿಯಲ್ಲಿ ಗ್ರಹಸ್ಥರು ಹಾಗೂ ಸನ್ಯಾಸಿಗಳು ಪರಸ್ಪರ ಯಾರನ್ನೂ ಬಿಟ್ಟುಕೊಡಬಾರದು. ಪಾಕೃತಿಕ ಸಮತೋಲನ ಕಾಪಾಡಬೇಕು ಎನ್ನುವುದು ಈ ದಿನ ನಮಗೆ ನಡೆದ ಶ್ರೀಗಂಧದ ತುಲಾಭಾರದ ಸಂದೇಶವಾಗಿದೆ. ಗುರು-ಶಿಷ್ಯರ ಸಂಬಂಧ ಎಂದಿಗೂ ಅನ್ಯೋಯ್ಯವಾಗಿರುತ್ತದೆ. ಭಕ್ತರ ಪ್ರೀತಿಯೇ ಗುರುಗಳಿಗೆ ಆಸ್ತಿಯಾಗಿರುತ್ತದೆ ಎಂದು ಪರ್ಯಾಯ ಪುತ್ತಿಗೆ ಮಠದ ಸುಗುಣೇಂದ್ರ ತೀರ್ಥ ಶ್ರೀಪಾದರು ನುಡಿದರು.

ಉಡುಪಿಯ ಶ್ರೀಕೃಷ್ಣ ಮಠದ ಒಳಾಂಗಣದಲ್ಲಿರುವ ಮಧ್ವ ಮಂಟಪದಲ್ಲಿ ಮಂಗಳೂರಿನ ಕಲ್ಕೂರ ಪ್ರತಿಷ್ಠಾನದ ವತಿಯಿಂದ ಶುಕ್ರವಾರ (ಜ.16) ಸಂಜೆ ಆಯೋಜಿಸಿದ್ದ ಶ್ರೀಗಂಧ, ತುಳಸಿಗಿಡ ಸಹಿತ ನೆರವೇರಿಸಿದ ವಿಶೇಷ ತುಲಾಭಾರ ಸ್ವೀಕರಿಸಿ ಆಶೀರ್ವಚನ ನೀಡಿದರು.

ಕಲ್ಕೂರ ಪ್ರತಿಷ್ಠಾನದ ಸ್ಥಾಪಕ ಪ್ರದೀಪಕುಮಾರ್​ ಕಲ್ಕೂರ ಮಾತನಾಡಿ, ಪುತ್ತಿಗೆ ಶ್ರೀಗಳ ಚತುರ್ಥ ಪರ್ಯಾಯದ ಅಂತಿಮ ಹಂತದಲ್ಲಿ ಇಬ್ಬರೂ ಶ್ರೀಪಾದರಿಗೆ ತುಲಾಭಾರ ಮಾಡುವ ಅವಕಾಶ ಲಭಿಸಿರುವುದು ನಿಜಕ್ಕೂ ಧನ್ಯತೆ ಉಂಟಾಗಿದೆ. ಶ್ರೀಗಂಧದ ಪರಿಮಳದಂತೆ ಭಗವದ್ಗೀತೆಯ ಪರಿಮಳವನ್ನು ವಿಶ್ವಾದ್ಯಂತ ಪಸರಿಸಿದ, ವಿಜೃಂಭಿಸಿದ ಶ್ರೀಗಳ ಕಾರ್ಯಕ್ಕೆ ಅಭಿನಂದನೆ ಸಲ್ಲಿಸಲೇಬೇಕು. ತಮ್ಮ ಪರ್ಯಾಯವನ್ನು 'ನ ಭೂತೋ ನ ಭವಿಷ್ಯತಿ' ಎಂಬ ರೀತಿಯಲ್ಲಿ ಕೃಷ್ಣನ ಆರಾಧನೆ ಮಾಡಿದ್ದಾರೆ. ಸುಶ್ರೀಂದ್ರ ಶ್ರೀಗಳಂತೂ ಕೃಷ್ಣನನ್ನು ಬಗೆಬಗೆಯಾಗಿ ನಿತ್ಯವೂ ಅಲಂಕರಿಸಿ ಭಕ್ತರಿಗೆ ಭಗವಂತನ ವಿಶ್ವರೂಪ ದರ್ಶನ ಮಾಡಿಸಿದ್ದಾರೆ. ಹೀಗಾಗಿ ಯತಿದ್ವಯರನ್ನು ಶ್ರೀಗಂಧ ಹಾಗೂ ತುಳಸಿಯಿಂದ ತುಲಾಭಾರ ಮಾಡಿದ್ದೇವೆ. ಶ್ರೀಗಂಧದ ಗಿಡ ನೆಟ್ಟು, ಪೋಷಿಸಿ, ಪುತ್ತಿಗೆ ಶ್ರೀಗಳ ಮುಂದಿನ 5ನೇ ಪರ್ಯಾಯದ ಸಂದರ್ಭದಲ್ಲಿ ಅದೇ ಮರದ ಗಂಧವನ್ನು ಶ್ರೀಕೃಷ್ಣನಿಗೆ ಬಳಸಲಾಗುವುದು ಎಂದರು.

ಪ್ರದೀಪಕುಮಾರ್​ ಕಲ್ಕೂರ ಹಾಗೂ ಬೆಂಗಳೂರಿನ ಗೋವರ್ಧನಗಿರಿಯ ಶ್ರೀಧರ್​ ಭಟ್​ ಅವರಿಗೆ ಪುತ್ತಿಗೆ ಶ್ರೀಗಳು 'ಶ್ರೀಕೃಷ್ಣಗೀತಾನುಗ್ರಹ' ಪ್ರಶಸ್ತಿ ಪ್ರದಾನ ಮಾಡಿದರು.

ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ., ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಪ್ರೊ.ಎಂ.ಬಿ. ಪುರಾಣಿಕ್​, ಯು.ವಿಶ್ವನಾಥ ಶೆಣೈ, ಮಾಧವ ಉಲ್ಲಾಳ್​, ಡಾ. ತಲ್ಲೂರು ಶಿವರಾಂ ಶೆಟ್ಟಿ, ಗುರುರಾಜ ಆಚಾರ್ಯ, ಸಗ್ರಿ ಗೋಪಾಲಕೃಷ್ಣ ಸಾಮಗ, ಮುರಳಿ ಕಡೆಕಾರ್​ ಇತರರು ಉಪಸ್ಥಿತರಿದ್ದರು. 

ಶಾರದಾ ವಿದ್ಯಾಲಯದ ವಿದ್ಯಾರ್ಥಿಗಳು ವಂದೇ ಮಾತರಂ ಗೀತೆ ಹಾಡಿದರು. ಪುತ್ತಿಗೆ ವಿದ್ಯಾಪಿಠದ ಶಿಷ್ಯರು ವೇದಘೋಷ ಪಠಿಸಿದರು. ಮಠದ ವಿದ್ವಾನ್​ ಡಾ. ಬಿ.ಗೋಪಾಲ್​ ಆಚಾರ್ಯ ಕಾರ್ಯಕ್ರಮ ನಿರ್ವಹಿಸಿದರು. 

ಮಠದ ದಿವಾನ ನಾಗರಾಜ್​ ಆಚಾರ್ಯ, ಮಠದ ಅಂತಾರಾಷ್ಟ್ರೀಯ ಕಾರ್ಯದರ್ಶಿ ಪ್ರಸನ್ನ ಆಚಾರ್ಯ, ಸುಗುಣಮಾಲಾ ಪತ್ರಿಕೆಯ ಸಂಪಾದಕ ಮಹಿತೋಷ್​ ಆಚಾರ್ಯ, ಸಾಂಸ್ಕೃತಿಕ ಕಾರ್ಯಕ್ರಮಗಳ ಸಂಚಾಲಕ ರಮೇಶ್​ ಭಟ್​ ಇನ್ನಿತರರು ಪಾಲ್ಗೊಂಡಿದ್ದರು.

"