ಉಡುಪಿ: ಸರ್ವೋಚ್ಚ ನ್ಯಾಯಾಲಯದಲ್ಲಿ ಆಗಸ್ಟ್​ 21ರಿಂದ 23ರ ವರೆಗೆ 'ಸಮಾಧಾನ ಸಮಾರೋಹ-2026' ವಿಶೇಷ ಲೋಕ ಅದಲಾತ್​ ಹಾಗೂ ಜುಲೈ 11ರಂದು ರಾಜ್ಯಾದ್ಯಂತ ರಾಷ್ಟ್ರೀಯ ಲೋಕ ಅದಾಲತ್​ ಆಯೋಜಿಸಲಾಗಿದೆ. ಕಕ್ಷಿದಾರರುಗಳಿಗೆ ರಾಜೀ ಮೂಲಕ ಪ್ರಕರಣ ಇತ್ಯರ್ಥ ಮಾಡಿಕೊಳ್ಳಲು ಇದು ಸದವಕಾಶವಾಗಿದೆ ಎಂದು ಉಡುಪಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಕಿರಣ್​ ಎಸ್​. ಗಂಗಣ್ಣನವರ ತಿಳಿಸಿದರು.

ಉಡುಪಿ ಜಿಲ್ಲಾ ನ್ಯಾಯಾಲಯ ಸಂಕೀರ್ಣದ ವಿ.ಸಿ. ಹಾಲ್​ನಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಕೆಳಹಂತದ ನ್ಯಾಯಾಲಯಗಳಿಂದ ಹಿಡಿದು ಜಿಲ್ಲಾ ಕೋರ್ಟ್​, ಹೈಕೋರ್ಟ್​ನಲ್ಲಿ ಬಂದ ತೀರ್ಪನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್​ಗಳಲ್ಲಿ ದಾಖಲಾದ ಪ್ರಕರಣಗಳನ್ನು ಮಾತ್ರ ರಾಜೀ ಮೂಲಕ ಇತ್ಯರ್ಥ ಮಾಡುವುದು 'ಸಮಾಧಾನ ಸಮಾರೋಹ' ಲೋಕ ಅದಾಲತ್​ನ ವಿಶೇಷತೆಯಾಗಿದೆ. ಉಡುಪಿ ಜಿಲ್ಲೆಯಲ್ಲಿ ಇಂತಹ 19 ಪ್ರಕರಣಗಳು ಸುಪ್ರೀಂ ಮೆಟ್ಟಿಲೇರಿದ್ದು, ಅವುಗಳಲ್ಲಿ 2 ಪ್ರಕರಣ ಈಗಾಗಲೇ ರಾಜೀ ಇತ್ಯರ್ಥ ಆಗಿದೆ ಎಂದು ತಿಳಿಸಿದರು.   

ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ನ್ಯಾಯಾಧೀಶ ನಿತಿನ್​ ರಾವ್​ ಮಾತನಾಡಿ, ಜಿಲ್ಲೆಯಲ್ಲಿ 34,856 ಪ್ರಕರಣ ಬಾಕಿ ಇದ್ದು 3,546 ಪ್ರಕರಣಗಳನ್ನು ರಾಜೀ ಮಾಡಬಹುದಾಗಿದೆ. ಇದರಲ್ಲಿ 2 ಸಾವಿರ ಪ್ರಕರಣ ರಾಜೀ ಮಾಡಲಾಗುತ್ತಿದ್ದು, ಈಗಾಗಲೇ 505 ಪ್ರಕರಣಗಳು ರಾಜೀ ಇತ್ಯರ್ಥ ಆಗಿದೆ. ಉಳಿದ ಪ್ರಕರಣಗಳ ಕಕ್ಷಿದಾರರೂ ಸಹ ರಾಜೀ ಮಾಡಿಕೊಳ್ಳುವುದಿದ್ದಲ್ಲಿ ಜು.11ರಂದು ನಡೆಯುವ ಲೋಕ ಅದಾಲತ್​ನ ಪ್ರಯೋಜನ ಪಡೆಯಬಹುದು. ರಾಜೀ ಇತ್ಯರ್ಥದ ಮೂಲಕ ಪ್ರಕರಣ ಅಂತ್ಯ ಮಾಡಿಕೊಂಡಲ್ಲಿ ಈಗಾಗಲೇ ನ್ಯಾಯಾಲಯಕ್ಕೆ ಭರಿಸಿರುವ ಶುಲ್ಕವನ್ನೂ ಹಿಂದಿರುಗಿಸಲಾಗುವುದು ಎಂದರು. 

"