ವೇದವ್ಯಾಸರೇ ಎಲ್ಲರ ನಿಜವಾದ ಗುರು

ಉಡುಪಿ: ಎಲ್ಲರಿಗೂ ಗುರು ಯಾರೆಂದರೆ 'ಕೃಷ್ಣಂ ವಂದೇ ಜಗದ್ಗುರುಂ' ಎನ್ನುತ್ತೇವೆ. ಆದರೆ, ಕೃಷ್ಣರಲ್ಲಿ ವಾಸಿಷ್ಠ ಕೃಷ್ಣ ಹಾಗೂ ಯಾದವ ಕೃಷ್ಣ ಎಂದು ಇಬ್ಬರಿದ್ದಾರೆ. ಯಾದವ ಕೃಷ್ಣ ಎಲ್ಲರಿಗೂ ಗೊತ್ತು.  ಒಂದೇ ವೇದಕ್ಕೆ ಬ್ರಹ್ಮಸೂತ್ರಗಳನ್ನು ಅಳವಡಿಸಿ ಚತುರ್ವೇದವನ್ನಾಗಿಸಿ ಮನುಕುಲಕ್ಕೆ ನೀಡಿದ ವಾಸಿಷ್ಠ ಕೃಷ್ಣನಾದ ವೇದವ್ಯಾಸರೇ ಎಲ್ಲರಿಗೂ ನಿಜವಾದ ಗುರುಗಳು ಎಂದು ಪರ್ಯಾಯ ಶೀರೂರು ಮಠದ ವೇದವರ್ಧನ ತೀರ್ಥ ಶ್ರೀಪಾದರು ನುಡಿದರು.

ಗುರು ಪೂರ್ಣಿಮೆಯ ನಿಮಿತ್ತ ಉಡುಪಿಯ ರಾಜಾಂಗಣದಲ್ಲಿ ಪರ್ಯಾಯ ಶೀರೂರು ಮಠದ ವತಿಯಿಂದ ಹಾಗೂ ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್​ ಮತ್ತು ದಾಸನಮನ ತಂಡ ಬೆಂಗಳೂರು ಸಹಭಾಗಿತ್ವದಲ್ಲಿ ಬುಧವಾರ (ಜು.29) ಸಂಜೆ ಆಯೋಜಿಸಿದ್ದ ಸಹಸ್ರ ಕಂಠ ಗಾಯನ ಮತ್ತು ಕುಣಿತ ಭಜನಾ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದರು.

ಶೀರೂರು ಮಠದ ದಿವಾನ ಡಾ. ಉದಯಕುಮಾರ್​ ಸರಳತ್ತಾಯ ಮಾತನಾಡಿ, ಶಾಸ್ತ್ರದಲ್ಲಿ ವ್ಯಾಸ ಸಾಹಿತ್ಯ ಹಾಗೂ ದಾಸ ಸಾಹಿತ್ಯವೆಂದು ಎರಡು ವಿಧವಿದೆ. ವ್ಯಾಸ ಸಾಹಿತ್ಯ ಕಬ್ಬಿಣದ ಕಡಲೆ. ಅದನ್ನು ಸುಲಭವಾಗಿ ಸಾಮಾನ್ಯರಿಂದ ಅರಗಿಸಿಕೊಳ್ಳಲಾಗದು. ಆದರೆ, ದಾಸ ಸಾಹಿತ್ಯ ಹಾಗಲ್ಲ. "ಹರಿ ಸವೋರ್ತ್ತಮ ವಾಯು ಜೀವೋತ್ತಮ' ಎಂಬ ತತ್ವವನ್ನು ಜನಸಾಮಾನ್ಯರಿಗೆ ಸುಲಭವಾಗಿ ತಿಳಿಸಿದ ಹಾಗೂ ವ್ಯಾಸಮತವನ್ನು ಕೊಟ್ಟಿದ್ದು ದಾಸ ಸಾಹಿತ್ಯ. ಅಂತಹ ದಾಸಪಂಥಕ್ಕೆ ಮೂಲ ಇದೇ ರಜತಪೀಠಪುರವೆಂಬ ಉಡುಪಿಯಾಗಿದೆ. ಕನಕದಾಸರು ಇಲ್ಲಿ ಶ್ರೀಕೃಷ್ಣನನ್ನು ಕಂಡಿದ್ದೇ ಇದಕ್ಕೆ ಸಾಕ್ಷ್ಯವಾಗಿದೆ ಎಂದರು.

ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್​ನ ಸಮನ್ವಯಾಧಿಕಾರಿ ಸಂತೋಷ್​ ಪಿ. ಅಳಿಯೂರು, ಸಂಗೀತ ಭಜನೆಯ ನಿರ್ದೇಶಕರಾದ ಸಂದೇಶ್​ ಸುವರ್ಣ, ನಾಗೇಶ್​ ಎನ್​., ದಾಸನಮನ ತಂಡದ ಆರ್​.ಕೆ. ಗೀತಾಮಣಿ, ಸುಭಾಶಿಣಿ ಪ್ರಕಾಶ್​, ಟಿಟಿಡಿ ವಾಹಿನಿಯ ಮುಖ್ಯಸ್ಥ ಗುಂಡೂರಾವ್​, ಶೋಭಾ ಉಪಾಧ್ಯಾಯ, ರಶ್ಮೀ, ಡಾ.ಉಷಾ ಹೆಬ್ಬಾರ್​ ಉಪಸ್ಥಿತರಿದ್ದರು. 

"

ವ್ಯಾಸ ಸಾಹಿತ್ಯ ಸೂರ್ಯನಿದ್ದಂತೆ. ಅದು ಭಯಂಕರ ಬಿಸಿ. ಆದರೆ, ಕತ್ತಲು ಓಡಿಸುತ್ತದೆ. ಆದರೆ, ದಾಸ ಸಾಹಿತ್ಯ ಚಂದಿರನಿದ್ದಂತೆ. ತುಂಬ ತಂಪು. ಹಾಡಿನ ರೂಪದಲ್ಲಿರುವ ಈ ಸಾಹಿತ್ಯನಮಗಷ್ಟೇ ಅಲ್ಲ, ದೇವರಿಗೂ ಸಹ ಇಷ್ಟ. ಶ್ರೀಕೃಷ್ಣನಿಗೆ ಹಾಡಿನ ರೂಪದಲ್ಲಿರುವ ಸಾಮವೇದ ಬಲು ಇಷ್ಟ. ಪರಮಾತ್ಮನ ಗುಣ ಅರಿತುಕೊಳ್ಳಲು ಭಜನೆ ಅತ್ಯಂತ ಶ್ರೇಷ್ಠ. ಭಜನೆಯಿಂದ ಮನಸ್ಸು ಶುದ್ಧಿಯಾಗುತ್ತದೆ. ಪರಮಾತ್ಮನ ಸಾಕ್ಷಾತ್ಕಾರಕ್ಕೆ ಭಜನೆಯೇ ಮೂಲದಾರಿ.

— ವೇದವರ್ಧನ ತೀರ್ಥ ಶ್ರೀಪಾದರು. ಪರ್ಯಾಯ ಶೀರೂರು ಮಠ.