ಪಂಚಾಯಿತಿ ವತಿಯಿಂದ ನಿರ್ವಹಿಸಲ್ಪಡುವ ತ್ಯಾಜ್ಯ ವಿಲೇವಾರಿಗೆ ಜನರು ಮಾಸಿಕ ಶುಲ್ಕ ಪಾವತಿಸುತ್ತಿದ್ದರೂ ತ್ಯಾಜ್ಯ ಸಂಗ್ರಹಣೆ ಮಾತ್ರ ಸೂಕ್ತವಾಗಿ ನಡೆಯುತ್ತಿಲ್ಲ. ಪಂಚಾಯಿತಿ ಕಡೆಯಿಂದ ಸೂಚಿಸಿದಂತೆ ಹಸಿ ತ್ಯಾಜ್ಯ ಹಾಗೂ ಒಣ ತ್ಯಾಜ್ಯ ಎಂದು ವಿಂಗಡಿಸಲಾಗಿದ್ದು, ಪ್ರತ್ಯೇಕವಾಗಿಯೇ ತುಂಬಿಸಿ ಇಡಲಾಗುತ್ತಿದೆ. ಆದರೆ ವಿಲೇವಾರಿ ಕಾರ್ಮಿಕರು ಕಳೆದ ಒಂದು ವಾರದಿಂದ ಒಣಕಸ ಮಾತ್ರ ಕೊಂಡೊಯ್ಯುತ್ತಿದ್ದು, ಹಸಿ ಕಸ ಸಂಗ್ರಹ ಮಾಡಲು ಮತ್ತೊಂದು ವಾಹನ ಬರಲಿದೆ ಎಂದಿದ್ದಾರೆ. ಇದುವರೆಗೆ ಹಸಿ ಕಸ ಸಂಗ್ರಹಕ್ಕೆ ಮುಂದಾಗದಿರುವುದರಿಂದ ಸ್ಥಳೀಯ ಪರಿಸರದಲ್ಲಿ ದುರ್ನಾತ ಬರಲಾರಂಭಿಸಿದೆ. ಜತೆಗೆ ಜನರಿಗೆ ಸಾಂಕ್ರಾಮಿಕ ರೋಗಗಳು ಹರಡುವ ಭೀತಿ ಆರಂಭವಾಗಿದೆ.
