ತೆಂಗು ಬೆಳೆಗಾರರಿಗೆ ಕೆಂಚಳಿಲು ಕಾಟ..!

ರೈತನಿಗೆ ಒಂದಲ್ಲಾ ಒಂದು ಸಮಸ್ಯೆ ಕಾಡುತ್ತನೇ ಇರುತ್ತೆ. ಕಾಡುಕೋಣ, ಹಂದಿ, ಜಿಂಕೆ, ಮಂಗಗಳು, ನವಿಲು ಸಹಿತ ಪಕ್ಷಿಗಳ ಕಾಟ ಒಂದೆಡೆಯಾದರೆ ಇದೀಗ ಕಾಡಿನಲ್ಲಿರುವ ಕೆಂಚಳಿಲು ಕಾಟ ಕೊಡಲು ಆರಂಭಿಸಿವೆ.

ನವಿಲು, ಮಂಗ, ಹಂದಿಗಳು ಭತ್ತ ಸಲು ನಾಶ ಮಾಡಿದರೆ. ತರಕಾರಿಗಳನ್ನು ನವಿಲುಗಳು ಹಾಳು ಮಾಡುತ್ತಿವೆ. ಇದರಿಂದ ತರಕಾರಿ ಬೆಳೆಸಲು ಕಷ್ಟವಾಗುತ್ತಿದೆ. ಹೀಗಾಗಿ ನಾವು ತರಕಾರಿ ಬೆಳೆಯುವುದನ್ನೇ ಬಿಟ್ಟಿದ್ದೇವೆ ಎಂದು ಕೃಷಿಕರಾದ ಆನಂದ ಆಚಾರ್ ಕಡ್ತಲ ಹೇಳುತ್ತಾರೆ. ಕಷ್ಟದಲ್ಲಿ ಕೃಷಿ ವಾಡಿ ಫಸಲು ಬರುವಾಗ ಕಾಡುಪ್ರಾಣಿ, ಪಕ್ಷಿಗಳಿಂದ ಕೃಷಿಕರ ಪಾಲಿಗೆ ಯಾವೂದು ಕೈಗೆ ಸಿಗುತ್ತಿಲ್ಲ. ಇದೀಗ ಕಾಡಿನಲ್ಲಿರುವ ಕೆಂಚಳಿಲುಗಳು ತೆಂಗು ಬೆಳೆಗಾರರಿಗೆ ಸಿಂಹಸ್ವಪ್ನವಾಗಿ ಕಾಡುತ್ತಿದೆ.

ಒಂದು ಕಡೆ ಮಂಗಗಳು ಸಿಯಾಳವನ್ನು ತಿಂದು ಹಾಕುತ್ತಿದ್ದರೆ ಮತ್ತೊಂದೆಡೆ ಕಾಡಿನಲ್ಲಿರುವ ಕೆಂಚಳಿಲುಗಳು ತೆಂಗಿನ ಮರಗಳಿಗೆ ದಾಂಗುಡಿಯಿಡುತ್ತಿದೆ. ಯಾವುದೇ ಸದ್ದಿಲ್ಲದೆ ತೆಂಗಿನ ಮರಕ್ಕೆ ಬರುವ ಕೆಂಚಳಿಲುಗಳು ಒಮ್ಮೆ ಬಂದರೆ ನಾಲ್ಕೈದು ಸಿಯಾಳವನ್ನು ತಿಂದು ಮುಗಿಸುತ್ತವೆ. ಮಂಗಗಳು ತೆಂಗಿನ ಮರಕ್ಕೆ ಬಂದರೆ ಸ್ವಲ್ಪ ಪ್ರವಾಣದ ಸದ್ದು ಆಗಿ ತಿಳಿಯುತ್ತದೆ. ಈ ವೇಳೆ ಅವುಗಳನ್ನು ಓಡಿಸಲು ಸಾಧ್ಯವಾಗುತ್ತದೆ. ಆದರೆ ಕೆಂಚಳಿಲು ಬರುವುದು ತಿಳಿಯುವುದೇ ಇಲ್ಲ. ಇದು ತೆಂಗು ಬೆಳೆಗಾರರಿಗೆ ಬಹುದೊಡ್ಡ ಸಮಸ್ಯೆಯಾಗಿದೆ. ಇದರಿಂದ ಪಾರಾಗುವುದು ಹೇಗೆ ಎಂದು ತಿಳಿಯುತ್ತಿಲ್ಲ ಎಂದು ಕೃಷಿಕರಾದ ಶಿವಣ್ಣ ಶೆಟ್ಟಿ ಹೇಳುತ್ತಾರೆ. ಮರಕ್ಕೆ ಬಂದು ಸಿಯಾಳ ತಿನ್ನಲು ಕುಳಿತರೆ ಓಡಿಸಲು ಕೂಡ ಸಾಧ್ಯವಾಗುತ್ತಿಲ್ಲ. ಹೊಟ್ಟೆ ತುಂಬಾ ತಿಂದೇ ಹೋಗುತ್ತವೆ. ಇದರಿಂದ ತೆಂಗು ಬೆಳೆಗಾರರಿಗೆ ಅಪಾರ ನಷ್ಟವಾಗುತ್ತಿದೆ. ಕಾಡುಪ್ರಾಣಿ ಪಕ್ಷಿಗಳ ಕಾಟದಿಂದ ಕೃಷಿಕರು ರೋಸಿ ಹೋಗಿದ್ದಾರೆ.