ಚೆಂಬುಗುಡ್ಡೆಯಲ್ಲಿ ಮೆಟ್ಟಿಲು ಮರು ನಿರ್ಮಾಣ

ಮಂಗಳೂರು ವಿವಿ ಸಂಪರ್ಕಿಸುವ ರಾಜರಸ್ತೆ ಚತುಷ್ಪಥ ಕಾಮಗಾರಿ ಸಂದರ್ಭ ಎರಡು ವರ್ಷಗಳ ಹಿಂದೆ ರಸ್ತೆಬದಿ ಚರಂಡಿ ನಿರ್ಮಿಸುವ ನೆಪದಲ್ಲಿ ಚೆಂಬುಗುಡ್ಡೆ ಸಂಪರ್ಕ ರಸ್ತೆಯ ಮೆಟ್ಟಿಗಲುಗಳನ್ನೇ ಕಡಿದು ಹಾಕಲಾಗಿತ್ತು. ರಸ್ತೆ ಕಾಮಗಾರಿ ಮುಗಿದು ವರ್ಷ ಕಳೆದರೂ ಕಡಿದು ಹಾಕಲಾದ ಮೆಟ್ಟಿಲು ಮಾತ್ರವಲ್ಲದೆ ಚರಂಡಿಗೆ ಪೈಪ್ ಕೂಡಾ ಹಾಕದೆ ಲೋಕೋಪಯೋಗಿ ಇಲಾಖೆಯ ಅಧಿಕಾರಿಗಳು ನಿರ್ಲಕ್ಷ್ಯ ತಾಳಿದ್ದರು. ಇದರಿಂದಾಗಿ ಸ್ಥಳೀಯರು ಶಾಲೆಗೆ ಹೋಗುವ ಮಕ್ಕಳು, ಹಿರಿಯರು, ಮಹಿಳೆಯರು ತಮ್ಮ ದೈನಂದಿನ ಕೆಲಸ ಕಾರ್ಯಗಳಿಗೆ ತೆರಳುವುದೇ ಸವಾಲಾಗಿತ್ತು.

ಈ ಬಗ್ಗೆ ಲೋಕೋಪಯೋಗಿ ಇಲಾಖೆಯ ಅಧಿಕಾರಿಗಳಿಗೆ ದೂರು ನೀಡಿದರೆ ನಗರಸಭೆಯತ್ತಲೂ, ನಗರಸಭೆಯ ಗಮನಕ್ಕೆ ತಂದರೆ ಲೋಕೋಪಯೋಗಿಯತ್ತಲೂ ಬೊಟ್ಟು ಮಾಡುತ್ತಿದ್ದರು. ಇದರಿಂದ ಬೇಸತ್ತ ಸ್ಥಳೀಯರು ವಿಜಯವಾಣಿ ಪತ್ರಿಕೆಯ ಗಮಕ್ಕೆ ತಂದಿದ್ದರು. ಈ ಹಿನ್ನೆಲೆಯಲ್ಲಿ ಜುಲೈ 11ರ ಸಂಚಿಕೆಯಲ್ಲಿ ವಿಶೇಷ ವರದಿ ಪ್ರಕಟಿಸಲಾಗಿತ್ತು. ಮರುದಿನವೇ ಲೋಕೋಪಯೋಗಿ ಇಲಾಖೆಯ ಇಂಜಿನಿಯರ್ ದಾಸ್ ಪ್ರಕಾಶ್ ಅವರು ಗುತ್ತಿಗೆದಾರರನ್ನು ಸ್ಥಳಕ್ಕೆ ಕಳುಹಿಸಿ ಪರಿಶೀಲಿಸುವಂತೆ ಮಾಡಿದ್ದರು. ಎರಡು ದಿನಗಳ ಬಳಿಕ ಮೆಟ್ಟಿಲು ನಿರ್ಮಿಸಲಾಗಿದ್ದು ಚರಂಡಿಗೆ ಪೈಪ್ ಅಳವಡಿಸುವ ಕೆಲಸ ಬಾಕಿ ಉಳಿಸಲಾಗಿದೆ.