ಮಹಿಳೆಗೆ ಅಪರೂಪದ ಎಂಡೋಸ್ಕೋಪಿ ಶಸ್ತ್ರಚಿಕಿತ್ಸೆ ಯಶಸ್ವಿ

ಬೆನ್ನುನೋವು ಮತ್ತು ಕಾಲಿನ ಸ್ನಾಯುಗಳ ಸೆಳೆತದಿಂದ ಬಳಲುತ್ತಿದ್ದ 49 ವರ್ಷದ ಮಹಿಳೆಯೊಬ್ಬರ ಬೆನ್ನುಮೂಳೆಯಲ್ಲಿ ಕಂಡುಬಂದಿದ್ದ ದ್ರವ ತುಂಬಿದ ಚೀಲಗಳನ್ನು (ಅರಕ್ನಾಯಿಡ್ ಸಿಸ್ಟ್) ಬೆನ್ನುಮೂಳೆ ಶಸಚಿಕಿತ್ಸೆ ತಜ್ಞ ಡಾ.ಮಹೇಶ್ ನೇತೃತ್ವದ ವೈದ್ಯರ ತಂಡ ಅಪರೂಪದ ಎಂಡೋಸ್ಕೋಪಿ ಶಸಚಿಕಿತ್ಸೆ ಮೂಲಕ ಯಶಸ್ವಿಯಾಗಿ ಹೊರತೆಗೆದಿದೆ. ಈ ಮೂಲಕ ಉಜಿರೆ ಎಸ್‌ಡಿಎಂ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆ ವಿಶೇಷ ಸಾಧನೆ ಮಾಡಿದೆ.

ಎಸ್‌ಡಿಎಂ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಗೆ ಚಿಕಿತ್ಸೆಗೆಂದು ಬಂದಿದ್ದ ಮಹಿಳೆಯನ್ನು ಬೆನ್ನುಮೂಳೆ ಸರ್ಜನ್ ಡಾ.ಶತಾನಂದ ಪ್ರಸಾದ್ ರಾವ್ ಅವರ ಸೂಚನೆಯಂತೆ ಎಂಆರ್‌ಐ ಸ್ಕಾೃನಿಂಗ್ ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಸ್ಕಾೃನಿಂಗ್‌ನಲ್ಲಿ ಬೆನ್ನುಮೂಳೆಯಲ್ಲಿ ದ್ರವ ತುಂಬಿದ ಚೀಲಗಳು ಪತ್ತೆಯಾದವು.

ಸಂಪೂರ್ಣ ಎಂಡೋಸ್ಕೋಪಿಕ್ ತಂತ್ರಜ್ಞಾನ ಬಳಸಿ ಕೇವಲ 8 ಮಿ.ಮೀ. ಛೇದನದೊಂದಿಗೆ 2 ಸೆ.ಮೀ. ಗಾತ್ರದ ದ್ರವ ತುಂಬಿದ ಚೀಲಗಳನ್ನು ಯಶಸ್ವಿಯಾಗಿ ಹೊರತೆಗೆಯಲಾಗಿದೆ. ಈ ಶಸ್ತ್ರಚಿಕಿತ್ಸೆಯು ಹೆಚ್ಚಿನ ರಕ್ತಸ್ರಾವವಾಗದಂತೆ ಹಾಗೂ ಇತರ ಅಂಗಗಳಿಗೆ ಹಾನಿಯಾಗದಂತೆ ನಡೆಸಲಾಗಿದೆ. ಇದು ನೋವು ರಹಿತ ಮತ್ತು ಹೊಲಿಗೆ ರಹಿತ ಶಸ್ತ್ರಚಿಕಿತ್ಸೆಯಾಗಿದೆ. ರೋಗಿ ಗುಣಮುಖರಾಗಿದ್ದು ಶಸ್ತ್ರಚಿಕಿತ್ಸೆ ನಡೆದ ಒಂದೇ ದಿನದಲ್ಲಿ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ ಎಂದು ತಜ್ಞ ವೈದ್ಯ ಡಾ.ಮಹೇಶ್ ಕೆ. ತಿಳಿಸಿದರು.

ದ್ರವ ತುಂಬಿದ ಚೀಲಗಳು ಬೆಳೆದಂತೆ ರೋಗಿಗೆ ಬೆನ್ನುನೋವು, ಕಾಲುಗಳ ಸೆಳೆತದಿಂದ ನಡೆದಾಡುವುದೇ ಕಷ್ಟವಾಗುತ್ತದೆ. ಎಂಡೋಸ್ಕೋಪಿಕ್ ಸರ್ಜರಿಯಲ್ಲಿ 8 ಮಿ.ಮೀ. ಛೇಧನದ ಮೂಲಕ ಕ್ಯಾಮರಾ ಸಹಿತ ಎಂಡೋಸ್ಕೋಪಿಕ್ ಅನ್ನು ರವಾನಿಸಿ ನೋವಿಲ್ಲದೆ ದ್ರವತುಂಬಿದ ಚೀಲಗಳನ್ನು ಹೊರ ತೆಗೆಯಲಾಗುತ್ತದೆ. ಇದರಿಂದ ರೋಗಿಯೂ ಚೇತರಿಸಿಕೊಳ್ಳಲು ಮತ್ತು ದಿನನಿತ್ಯದ ಚಟುವಟಿಕೆಗಳನ್ನು ಮೊದಲಿನಂತೆಯೇ ನಡೆಸಬಹುದು ಎಂದರು.

ಬೆನ್ನು ಹುರಿಯ ದ್ರವ ತುಂಬಿದ ಚೀಲವನ್ನು ಎಂಡೋಸ್ಕೋಪಿಕ್ ಶಸಚಿಕಿತ್ಸೆ ಮೂಲಕ ಗುಣಪಡಿಸಿದ ವಿಶ್ವದ ಮೊದಲ ಸರ್ಜನ್ ಎಂಬ ಖ್ಯಾತಿಗೆ ಡಾ.ಮಹೇಶ್ ಪಾತ್ರರಾದರು. ಉಜಿರೆಯ ಎಸ್‌ಡಿಎಂ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಯ ಬೆನ್ನುಮೂಳೆ ಶಸ್ತ್ರಚಿಕಿತ್ಸೆ ತಜ್ಞರಾದ ಡಾ.ಶತಾನಂದ ಪ್ರಸಾದ್ ರಾವ್, ಅರಿವಳಿಕೆ ತಜ್ಞೆ ಡಾ.ಚೈತ್ರಾ ಆರ್. ನೇತೃತ್ವದ ವೈದ್ಯರ ತಂಡ ಸಹಕರಿಸಿತು.