ಶಾಂತಿ-ಸಾಮರಸ್ಯ, ಏಕತೆಯ ಆದರ್ಶ ಶ್ರೀರಾಮಚಂದ್ರ

ಉಡುಪಿ: ರಾಮಾಯಣವು ಸತ್ಯ, ಘನತೆ, ಕರ್ತವ್ಯ, ತ್ಯಾಗ, ಪ್ರೀತಿ ಮತ್ತು ಸೇವೆಯ ಶಾಶ್ವತ ಸಂದೇಶ ನೀಡುತ್ತದೆ. ಎಷ್ಟೇ ಕಠಿಣ ಪರಿಸ್ಥಿತಿ ಎದುರಾದರೂ ನಮ್ಮ ತತ್ವ, ಕರ್ತವ್ಯಗಳಿಂದ ವಿಮುಖ ಆಗಬಾರದು ಎನ್ನುವುದಕ್ಕೆ ಭಗವಾನ್​ ಶ್ರೀರಾಮಚಂದ್ರನ ಜೀವನ ನಿದರ್ಶನವಾಗಿದೆ. ಕುಟುಂಬದಲ್ಲಿ ಮೌಲ್ಯ, ಸಮಾಜದಲ್ಲಿ ಸಾಮರಸ್ಯ ಹಾಗೂ ಜೀವನದಲ್ಲಿ ಶಿಸ್ತು ಬೆಳೆಸಲು ರಾಮಾಯಣ ಪ್ರೇರಣೆ. ಹನುಮ, ಶಬರಿ, ಸುಗ್ರೀವರನ್ನು ಶ್ರೀರಾಮ ಗೌರವಿಸಿದ ರೀತಿ ಸಾಮಾಜಿಕ ಏಕತೆ, ಸಮಾನತೆ ಮತ್ತು ಏಕತೆಯ ಆದರ್ಶ ಸಾರುತ್ತದೆ ಎಂದು ರಾಜ್ಯಪಾಲ ಥಾವರ್​ಚಂದ್​ ಗೆಹ್ಲೋಟ್​ ಅಭಿಪ್ರಾಯಪಟ್ಟರು.

ಉಡುಪಿಯ ರಾಮಕಥಾ ಸಮಿತಿ ವತಿಯಿಂದ ಪಡುಬಿದ್ರಿ ಎರ್ಮಾಳ್​ನಲ್ಲಿ ಮಂಗಳವಾರ (ಸೆ.8) ಆಯೋಜಿಸಿದ್ದ ಸಂತ ಶ್ರೀ ಮುರಾರಿ ಬಾಪುಜಿ ಅವರ 'ರಾಮಕಥಾ' ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಉಡುಪಿಯು ಭಾರತೀಯ ಆಧ್ಯಾತ್ಮಿಕ ಪರಂಪರೆಯ ಪ್ರಮುಖ ಕೇಂದ್ರವಾಗಿದ್ದು, ಶ್ರೀಕೃಷ್ಣನ ಭಕ್ತಿಯ ನಿರಂತರ ಹರಿವು ಇದೆ. ಶ್ರೀಮಧ್ವಾಚಾರ್ಯರ ಮಹಾನ್​ ಪರಂಪರೆಯಿದೆ. ಇಂತಹ ಪವಿತ್ರ ನೆಲದಲ್ಲಿ ಪ್ರಸಿದ್ಧ ನಿರೂಪಕರೂ ಆದ ಮುರಾರಿ ಬಾಪು ಅವರಿಂದ ಶ್ರೀರಾಮನ ಕಥೆಯ ಅಮೃತವೂ ಹರಿಯುತ್ತಿದೆ. ಅವರ ರಾಮಕಥೆ ಆಲಿಸುವ ಅವಕಾಶ ದೊರೆತಿರುವುದು ಸಂತಸದ ಸಂಗತಿ ಎಂದರು. 

ಕಾರ್ಯಕ್ರಮದ ಆಯೋಜಕ ಪ್ರವೀಣ್​ ಕಾಂಜಿ ತನ್ನಾ ಹಾಗೂ ಹಲವು ಗಣ್ಯರು ಉಪಸ್ಥಿತರಿದ್ದರು.

"