ಉಡುಪಿ ಜಿಲ್ಲೆಯ 5 ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಮಾದರಿ ಸೋಲಾರ್ ಗ್ರಾಮಕ್ಕೆ ಬೈಂದೂರು ತಾಲೂಕಿನ ಕಿರಿಮಂಜೇಶ್ವರ, ಬ್ರಹ್ಮಾವರ ತಾಲೂಕಿನ ಕೋಟತಟ್ಟು, ಉಡುಪಿ ತಾಲೂಕಿನ ಉಪ್ಪೂರು, ಕಾಪು ತಾಲೂಕಿನ ಮಜೂರು ಹಾಗೂ ಕಾರ್ಕಳ ತಾಲೂಕಿನ ನಿಟ್ಟೆ ಗ್ರಾಮ ಆಯ್ಕೆ ಮಾಡಲಾಗಿದೆ. ಸೌರ ಶಕ್ತಿ ಘಟಕ ಅಳವಡಿಸಲು ಡಿಸೆಂಬರ್ 31ರ ವರೆಗೆ ಚಾಲೆಂಜ್ ಅವಧಿ ನಿಗದಿಸಲಾಗಿದೆ. ಕಿರಿಮಂಜೇಶ್ವರ ಗ್ರಾಮದವರು 26 ಕೆವಿ, ಕೋಟತಟ್ಟು ಗ್ರಾಮದವರು 1,777 ಕೆವಿ, ಉಪ್ಪೂರು ಗ್ರಾಮದವರು 163 ಕೆವಿ, ಮಜೂರು 13.88 ಕೆವಿ ಹಾಗೂ ನಿಟ್ಟೆ ಗ್ರಾಮದವರು 1,577.31 ಕೆವಿ ಸೋಲಾರ್ ಅಳವಡಿಸಿದ್ದಾರೆ. ಅವುಗಳಲ್ಲಿ ಯಾವ ಗ್ರಾಮ ಹೆಚ್ಚು ಪರಿಣಾಮಕಾರಿಯಾಗಿ ಸೌರ ಶಕ್ತಿ ಘಟಕ ಅನುಷ್ಠಾನ ಮಾಡಿದೆ ಎಂಬ ಕುರಿತು ಮೈಸೂರು ರೀಜನಲ್ ಕಮಿಷನ್ ಪರಾಮರ್ಶಿಸಿ, ಒಂದು ಗ್ರಾಮ ಆಯ್ಕೆ ಮಾಡಲಿದ್ದಾರೆ. ಆಯ್ಕೆಯಾದ ಗ್ರಾಮಕ್ಕೆ 1 ಕೋಟಿ ರೂ. ಬಹುಮಾನ ಅನುದಾನದ ರೂಪದಲ್ಲಿ ಸರ್ಕಾರ ನೀಡಲಿದೆ. ಅದರಲ್ಲಿ ಸೋಲಾರ್ ಪಾರ್ಕ್ ಅಳವಡಿಸಲು ಅವಕಾಶ ಕಲ್ಪಿಸಲಿದೆ ಎಂದು ಸಂಸದ ಕೋಟ ಮಾಹಿತಿ ನೀಡಿದರು.
