ಪರಂಪರೆಯ ಅರಿವಿನಿಂದ ಸಮಗ್ರ ದೇಶ ನಿರ್ಮಾಣ

ಉಡುಪಿಯಲ್ಲಿ ಪ್ರೊ.ಕೆ.ಪಿ. ರಾವ್ ಹಾಗೂ ಪ್ರೊ.ಕನರಾಡಿ ವಾದಿರಾಜ್ ಭಟ್ ಅವರಿಗೆ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಡಾ. ಬಿ.ಎ. ವಿವೇಕ್ ರೈ, ಡಾ. ಗಾಯತ್ರಿ ಪೈ, ಡಾ. ಕೆ.ರಾಘವ ನಂಬಿಯಾರ್, ಡಾ. ಚಂದ್ರಾವತಿ ಶೆಟ್ಟಿ, ಡಾ. ಬಿ.ಜಗದೀಶ್ ಶೆಟ್ಟಿ, ಡಾ.ಅರುಣಕುಮಾರ್ ಎಸ್.ಆರ್. ಇದ್ದರು.

Published on:

12 Sep 2026, 5:31 pm

* ಹಿರಿಯ ಸಾಹಿತಿ ಡಾ. ಬಿ.ಎ. ವಿವೇಕ್ ರೈ ಅಭಿಮತ

* ಕು.ಶಿ. ಭಟ್, ಡಾ. ಉಪಾಧ್ಯಾಯ ಜಾನಪದ ಪ್ರಶಸ್ತಿ ಪ್ರದಾನ

ಉಡುಪಿ: ಮಾತೃಭಾಷೆ, ದೇಶದ ಸಂಸ್ಕೃತಿ, ಆಚರಣೆಯ ಜ್ಞಾನವೇ ಇಲ್ಲದಿದ್ದರೆ ಕೋಟಿ, ಟ್ರಿಲಿಯನ್ಗಳಷ್ಟು ಹಣವಿದ್ದರೂ ಪ್ರಯೋಜನವಿಲ್ಲ. ಧನದಿಂದ ಎಲ್ಲವನ್ನೂ ಸಾಧಿಸಲಾಗದು. ವಿದ್ವತ್ ಪರಂಪರೆ ಕ್ಷೀಣಿಸತೊಡಗಿದ್ದು, ಹೊಸ ಪರಂಪರೆ ಜೋಡಿಸಬೇಕಾದ ಅಗತ್ಯತೆ ಇದೆ. ತಿಳಿವಳಿಕೆಗೆ ಕೊನೆಯೆಂಬುದಿಲ್ಲ. ಪರಂಪರೆಯ ಅರಿವು, ಅನುಭವ ಇದ್ದಾಗ ಮಾತ್ರ ಸುಸ್ಥಿರ ಸಮಾಜ, ಸಮಗ್ರ ದೇಶ ಕಟ್ಟಲು ಸಾಧ್ಯ ಎಂದು ಹಿರಿಯ ಸಾಹಿತಿ ಡಾ. ಬಿ.ಎ. ವಿವೇಕ್ ರೈ ಹೇಳಿದರು.

ಉಡುಪಿಯ ಎಂಜಿಎಂ ಕಾಲೇಜ್ನ ನೂತನ ರವೀಂದ್ರ ಮಂಟಪದಲ್ಲಿ ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನಾ ಕೇಂದ್ರ, ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜುಕೇಷನ್ ವತಿಯಿಂದ, ಆಶಾ ಮತ್ತು ಅಶೋಕ್ ಕುತ್ಯಾರ್ ಪ್ರಾಯೋಜಕತ್ವದಲ್ಲಿ ಶನಿವಾರ (ಸೆ.12) ಆಯೋಜಿಸಿದ್ದ ಕು.ಶಿ. ಹರಿದಾಸ್ ಭಟ್ ಜಾನಪದ ಪ್ರಶಸ್ತಿ ಹಾಗೂ ಡಾ.ಯು.ಪಿ. ಉಪಾಧ್ಯಾಯ, ಡಾ. ಸುಶೀಲಾ ಪಿ. ಉಪಾಧ್ಯಾಯ ಜಾನಪದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದರು.

ಪ್ರಶಸ್ತಿ ಪ್ರದಾನ

ಬಸ್ರೂರಿನ ಜಾನಪದ ತಜ್ಞ ಡಾ. ಕನರಾಡಿ ವಾದಿರಾಜ್ ಭಟ್ ಅವರಿಗೆ ಕು.ಶಿ. ಹರಿದಾಸ್ ಭಟ್ ಪ್ರಶಸ್ತಿ ಹಾಗೂ ಭಾಷಾ ತಂತ್ರಾಂಶ ತಜ್ಞ ನಾಡೋಜ ಪ್ರೊ. ಕೆ.ಪಿ. ರಾವ್ ಅವರಿಗೆ ಡಾ ಯು.ಪಿ. ಉಪಾಧ್ಯಾಯ, ಡಾ. ಸುಶೀಲಾ ಪಿ. ಉಪಾಧ್ಯಾಯ ಪ್ರಶಸ್ತಿ ವಿತರಿಸಲಾಯಿತು. ಯಕ್ಷಗಾನದ ಹಿರಿಯ ವಿದ್ವಾಂಸ ಡಾ. ಕೆ.ರಾಘವ ನಂಬಿಯಾರ್, ಬಸ್ರೂರು ಶಾರದಾ ಕಾಲೇಜ್ನ ನಿವೃತ್ತ ಪ್ರಾಂಶುಪಾಲೆ ಡಾ. ಚಂದ್ರಾವತಿ ಶೆಟ್ಟಿ ಅಭಿನಂದನಾ ಭಾಷಣ ಮಾಡಿದರು.

ಕನ್ನಡಕ್ಕಿಂತ ತುಳು ಹೆಚ್ಚು ಸ್ವರವಂತ ಭಾಷೆಯಾಗಿದೆ ಎನ್ನುವುದು ನನ್ನ ಅಭಿಪ್ರಾಯ. ಕಲಿಕೆಯ ಆಸಕ್ತಿಯಿದ್ದರೆ ಯಾರು ಬೇಕಾದರೂ ಸಾಧನೆ ಮಾಡಬಹುದು. ಎಲ್ಲವನ್ನೂ ಚಿಕಿತ್ಸಕ ಬುದ್ಧಿ, ವಿವೇಕದಿಂದ ನೋಡುವ ಗುಣ ಬೆಳೆಸಿಕೊಳ್ಳಬೇಕು. ಕಲಿಸಿದ ಗುರುಗಳನ್ನು ಎಂದಿಗೂ ಮರೆಯಕೂಡದು.

ಎಂಜಿಎಂ ಕಾಲೇಜ್ನ ಪ್ರಾಂಶುಪಾಲೆ ಡಾ.ಗಾಯತ್ರಿ ಪೈ ಉಪಸ್ಥಿತರಿದ್ದರು. ಗುರು ಉಮೇಶ್ ಸುವರ್ಣ ಪ್ರಾರ್ಥಿಸಿದರು. ರಾಷ್ಟ್ರಕವಿ ಗೋವಿಂದ ಪೈ ಸಂಶೋಧನಾ ಕೇಂದ್ರದ ಆಡಳಿತಾಧಿಕಾರಿ ಡಾ. ಬಿ.ಜಗದೀಶ್ ಶೆಟ್ಟಿ ಸ್ವಾಗತಿಸಿದರು. ಆರ್ಆರ್ಸಿಯ ಸಹ ಸಂಶೋಧಕ ಡಾ.ಅರುಣಕುಮಾರ್ ಎಸ್.ಆರ್. ಕಾರ್ಯಕ್ರಮ ನಿರ್ವಹಿಸಿದರು.

ಇತ್ತೀಚೆಗಿನ ವರ್ಷಗಳಲ್ಲಿ ಸಂಶೋಧಕರು, ತಜ್ಞರು ಯಾರು ಎನ್ನುವ ಪ್ರಶ್ನೆ ಮೂಡುತ್ತಿದೆ. ಕು.ಶಿ. ಹೆಸರಲ್ಲಿ ಜಾನಪದ ಗ್ರಂಥ ಪ್ರಕಟಣೆಗೆ ಪ್ರಶಸ್ತಿಯ ಮೊತ್ತ ಬಳಕೆಗೆ ನೀಡಲಾಗುವುದು. ಗ್ರಾಮೀಣ ಭಾಗದಲ್ಲಿ ಈಗಲೂ ಇರುವ ಜನಪದರ ವಿದ್ವತ್ ಗುರುತಿಸಬೇಕು. ಅವರ ಬಳಿ ಜಾನಪದದ ಅಪಾರ ಜ್ಞಾನದ ಗಣಿಯಿದೆ.

Udupi