ಶ್ರೇಷ್ಠ ಪವಾಡಗಳ ಆರೋಗ್ಯ ಮಾತೆ ವೆಲಂಕಣಿ

ಉಡುಪಿ: ವಾರ್ಷಿಕ ಹಬ್ಬದ ಸಂದರ್ಭದಲ್ಲಿ ಚರ್ಚ್​ಗಳ ಪಾಲಕರ ಮಂಜೂಶಾ (ಮೂರ್ತಿ)ಗಳನ್ನು ಸಾರ್ವಜನಿಕವಾಗಿ ಮೆರವಣಿಗೆ ನಡೆಸಲಾಗುತ್ತದೆ. ಈ ರೀತಿ ಗೌರವ ಸೂಚಿಸುವುದು ಕೆಸ್ತ ಸಂಪ್ರದಾಯವಾಗಿದೆ. ವೆಲಂಕಣಿ ಆರೋಗ್ಯ ಮಾತೆಯು ಶ್ರೇಷ್ಠ ಪವಾಡಗಳ ಮಾತೆ ಎಂದು ಜನಜನಿತವಾಗಿದೆ. ಆಕೆಯ ಮೂಲಕ ಯೇಸು ಕ್ರಿಸ್ತರ ಕ್ರಪಾವರಗಳು ಸಮುದಾಯದ ಎಲ್ಲರಿಗೂ ಲಭಿಸಲಿ ಎಂದು ಶಿವಮೊಗ್ಗ ಪ್ರಾಂತ್ಯದ ಧರ್ಮಗುರು ವಂ.ಫ್ರಾಂಕ್ಲಿನ್​ ಡಿಸೋಜಾ ಆಶಿಸಿದರು.

ಉಡುಪಿಯ ಕಲ್ಮಾಡಿಯಲ್ಲಿರುವ ಸ್ಟೆಲ್ಲಾ ಮಾರಿಸ್​ ದೇವಾಲಯದ ವೆಲಂಕಣಿ ಆರೋಗ್ಯ ಮಾತೆಯ ಪುಣ್ಯಕ್ಷೇತ್ರ ಪ್ರತಿಷ್ಠಾಪನೆಯ ವಾರ್ಷಿಕ ಮಹೋತ್ಸವದ ನಿಮಿತ್ತ ಗುರುವಾರ (ಆ.13) ಆಯೋಜಿಸಿದ್ದ ವೆಲಂಕಣಿ ಮಾತೆ ಮೂರ್ತಿಯ ಮೆರವಣಿಗೆಗೆ ಚಾಲನೆ ನೀಡಿ ಮಾತನಾಡಿದರು.

ಮೆರವಣಿಗೆಯು ಆದಿಉಡುಪಿ ಮಾರ್ಗವಾಗಿ ಆರಂಭಗೊಂಡು ಚರ್ಚ್​ನವರೆಗೆ ನಡೆಯಿತು. ತದನಂತರ ಫ್ರಾಂಕ್ಲಿನ್​ ಡಿಸೋಜಾ ಬಲಿಪೂಜೆ ನೆರವೇರಿಸಿದರು.

ವೆಲಂಕಣಿ ಮಾತೆಯ ವಾರ್ಷಿಕ ಮಹೋತ್ಸವ ಆ.15ರಂದು ನಡೆಯಲಿದ್ದು, ಬೆಳಗ್ಗೆ 10:30ಕ್ಕೆ ಉಡುಪಿ ಧರ್ಮಪ್ರಾಂತ್ಯದ ಅಧ್ಯಕ್ಷ ಅತಿ ವಂ. ಡಾ.ಲೆಸ್ಲಿ ಕ್ಲಿಫರ್ಡ್​ ಡಿಸೋಜಾ ಹಬ್ಬದ ಬಲಿಪೂಜೆ ನೆರೆವೇರಿಸಲಿದ್ದಾರೆ.