ಮೃತ ಅಭಿಷೇಕ್ನ ತಂದೆ ಪ್ರಭಾಕರ್ ಪೂಜಾರಿ ಅವರನ್ನು ವಿಜಯವಾಣಿ ಮಾತನಾಡಿಸಿದಾಗ, ಅವರು ಕಾನ್ಪುರದಲ್ಲಿಯೇ ಇದ್ದರು. ಅತ್ಯಂತ ದು:ಖದ ನಡುವೆಯೇ ಪುತ್ರನ ಸಾಧನೆ ವಿವರಿಸಿದರು. ನನಗೆ ಇಬ್ಬರು ಮಕ್ಕಳು. ಅಭಿಷೇಕ್ ಬಿಇ ಮೆಕಾನಿಕಲ್ ಇಂಜಿನೀಯರ್ ಪದವಿ ಮುಗಿಸಿದ್ದು, ಇನ್ನೋರ್ವ ಮಗ ಅಭಿನವ್ (23) ಬಿಇ ಇಲೆಕ್ಟ್ರಾನಿಕ್ಸ್ ಆ್ಯಂಡ್ ಟೆಲಿ ಕಮ್ಯುನಿಕೇಷನ್ ಕಲಿಯುತ್ತಿದ್ದಾನೆ. ನಾವು ಅಭಿಷೇಕ್ನ ವಿವಾಹ ಮಾಡಬೇಕು ಅಂದುಕೊಂಡಿದ್ದೆವು. ಆದರೆ, ಆತ ಪೈಲೆಟ್ ಆಗಬೇಕು ಎಂಬ ವಿಚಾರ ತಿಳಿಸಿದ. ಹೀಗಾಗಿ ಕಾನ್ಪುರದಲ್ಲಿರುವ ಗರ್ಗ್ ಏವಿಯೇಷನ್ ಟ್ರೇನಿಂಗ್ ಸೆಂಟರ್ನಲ್ಲಿ ಮೂರು ವರ್ಷದ ತರಬೇತಿ ಪಡೆಯುತ್ತಿದ್ದನು. ಮುಂದಿನ ತಿಂಗಳು (ಸೆ.7) ಆತನ ತರಬೇತಿ ಪೂರ್ಣಗೊಳ್ಳುತ್ತಿತ್ತು. ಇದೀಗ ದುರ್ಘಟನೆಯಲ್ಲಿ ಮೃತಪಟ್ಟಿದ್ದಾನೆ. ಟ್ರೇನಿಂಗ್ ಸೆಂಟರ್ನವರು ಸರಿಯಾಗಿ ಯಾವುದೇ ಮಾಹಿತಿ ನೀಡುತ್ತಿಲ್ಲ. ಮಗನನ್ನು ಕಳೆದುಕೊಂಡು ದು:ಖದಲ್ಲಿರುವ ನಮಗೇ ಹೆರೇಸ್ಮೆಂಟ್ ಮಾಡುತ್ತಿದ್ದಾರೆ. ಪುತ್ರನ ಶವವನ್ನು ನಿಮ್ಮದೇ ಖರ್ಚಿನಲ್ಲಿ ಮಂಗಳೂರಿಗೆ ಕಳುಹಿಸಬೇಕೆಂದು ಕೇಳಿಕೊಂಡಿದ್ದೇವೆ. ಮಗನ ಮೃತದೇಹವನ್ನು ಕಾರ್ಕಳ ತಾಲೂಕಿನ ಕಣಜಾರು ಗ್ರಾಮಕ್ಕೆ ತಂದು ನಮ್ಮ ಮನೆಯ ಸಮೀಪವೇ ಅಂತ್ಯಕ್ರಿಯೆ ಮಾಡುತ್ತೇವೆ ಎಂದು ತಿಳಿಸಿದರು.
