ಉಡುಪಿ: ಇಡಿ ವಿಶ್ವವೇ ಮರ್ಯಾದಾ ಪುರುಷೋತ್ತಮನಾದ ಭಗವಾನ್​ ಶ್ರೀರಾಮಚಂದ್ರನನ್ನು ಗೌರವಿಸುತ್ತದೆ, ಪೂಜಿಸುತ್ತದೆ. ಆದರೆ, ರಾಮನ ಹೆಸರಿನಲ್ಲೇ ಅಧಿಕಾರಕ್ಕೆ ಬಂದಿರುವ ಕೇಂದ್ರ ಬಿಜೆಪಿ ಸರ್ಕಾರ ಅಯೋಧ್ಯಾ ರಾಮ ಮಂದಿರದಲ್ಲಿ ನಡೆದ ಕೋಟ್ಯಂತರ ರೂಪಾಯಿ ಭ್ರಷ್ಟಾಚಾರದಲ್ಲಿ ನೇರವಾಗಿ ಭಾಗಿಯಾಗಿದೆ. ನೈತಿಕ ಹೊಣೆ ಹೊತ್ತು ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್​ ಶಾ ಹಾಗೂ ಉ.ಪ್ರದೇಶ ಸಿಎಂ ಯೋಗಿ ಆದಿತ್ಯನಾಥ್​ ರಾಜೀನಾಮೆ ನೀಡಬೇಕು ಎಂದು ಕೆಪಿಸಿಸಿ ಉಪಾಧ್ಯಕ್ಷ ವಿ.ಎಸ್​. ಉಗ್ರಪ್ಪ ಆಗ್ರಹಿಸಿದರು.

ಉಡುಪಿಯಲ್ಲಿ ಸೋಮವಾರ (ಜು.13) ಮಾಧ್ಯಮದವರೊಂದಿಗೆ ಮಾತನಾಡಿ, ರಾಷ್ಟ್ರದ ಗೌರವದ ಪ್ರತಿಕನಾಗಿರುವ ಶ್ರೀರಾಮನ ಮೇಲೆ ಕಿಂಚಿತ್ತಾದರೂ ಅವರಿಗೆ ಭಕ್ತಿಯಿದ್ದರೆ ದೇಶವಾಸಿಗರಲ್ಲಿ ಕ್ಷಮೆ ಯಾಚಿಸಬೇಕು ಎಂದರು.

ಅಯೋಧ್ಯಾ ಭ್ರಷ್ಟಾಚಾರದಲ್ಲಿ ಆರ್​ಎಸ್​ಎಸ್​, ಬಿಜೆಪಿ ಹಾಗೂ ವಿಎಚ್​ಪಿಯ ಸದಸ್ಯರೇ ಭಾಗಿಯಾಗಿದ್ದಾರೆ. ಪ್ರಧಾನಿ ಮೋದಿ ಅವರ ಮಾಜಿ ಕಾರ್ಯದರ್ಶಿಯೂ ಇದ್ದಾರೆ. ಲೆಕ್ಕಕ್ಕೇ ಸಿಗದಷ್ಟು ಕೋಟಿ ರೂಪಾಯಿ ಸಂಖ್ಯೆಯಲ್ಲಿ ಹಣ, ವಜ್ರ, ಬಂಗಾರ, ಬೆಳ್ಳಿಯನ್ನು ಲೂಟಿ ಮಾಡಲಾಗಿದೆ. ರಾಮನ ಹೆಸರಲ್ಲಿ ಅಧಿಕಾರ ಪಡೆದು ರಾಮನ ಸ್ವತ್ತು ಲೂಟಿ ಮಾಡುವುದೂ ರಾಷ್ಟ್ರ ಪ್ರೇಮವೇ? ಶ್ರೀರಾಮನಿಗೇ ಮೋಸ ಮಾಡಿದ್ದು, ಇದರಂತಹ ದೇಶದ್ರೋಹ ಮತ್ತೊಂದಿಲ್ಲ. ಪ್ರಕರಣಕ್ಕೆ ಸಂಭಂದಿಸಿ 8 ಮಂದಿಯನ್ನು ಬಂಧಿಸಿದ್ದೀರಿ. ಆದರೆ, ಈವರೆಗೂ ದೇಗುಲ ಟ್ರಸ್ಟ್​ನ ಅಧ್ಯಕ್ಷ, ಕಾರ್ಯದರ್ಶಿಯನ್ನು ಏಕೆ ಬಂಧಿಸಿಲ್ಲ ಎಂದು ಉಗ್ರಪ್ಪ ಪ್ರಶ್ನಿಸಿದರು.