ದೆಹಲಿಯಲ್ಲಿ ಪಾಕ್​ ಹಿಂದೂ ಬಡಾವಣೆಗೆ ಪೇಜಾವರ ಶ್ರೀ ಭೇಟಿ

ಉಡುಪಿ: ಪಾಕಿಸ್ತಾನದಿಂದ ಹಿಂದುಗಳು ಭಾರತ ವಿಭಜನೆ ಹಾಗೂ ನಂತರದ ವರ್ಷಗಳಲ್ಲಿ ಬಂದು ನೆಲೆಸಿದ ದೆಹಲಿಯ ಅತೀ ದೊಡ್ಡ ಸ್ಲಮ್​ ಏರಿಯಾ ಎಂದೇ ಪರಿಚಿತವಾದ ಭಾಟಿ ಮೈನ್ಸ್​ ಬಡಾವಣೆಗೆ ಭಾನುವಾರ ಪೇಜಾವರ ಶ್ರೀ ವಿಶ್ವಪ್ರಸನ್ನತಿರ್ಥ ಶ್ರೀಪಾದರು ಭೇಟಿ ನೀಡಿದರು.

ಚಾತುಮಾರ್ಸ್ಯದ ಅಂಗವಾಗಿ ವಿಶ್ವ ಹಿಂದು ಪರಿಷತ್​ ಮತ್ತು ಸೇವಾ ಭಾರತಿ ಸಹಯೋಗದಲ್ಲಿ ಹಮ್ಮಿಕೊಂಡ ಸೇವಾ ಬಸ್ತಿ ಭೇಟಿ ಅಭಿಯಾನ ಅಂಗವಾಗಿ ಕಾರ್ಯಕ್ರಮ ನಡೆಯಿತು.

ಆರಂಭದಲ್ಲಿ 5 ಮನೆಗಳಿಗೆ ತೆರಳಿ ಅಯೋಧ್ಯಾ ರಾಮ ಮತ್ತು ಉಡುಪಿ ಕೃಷ್ಣನ ಫೋಟೋ ಕೊಟ್ಟು ರಾಮದೀಪವನ್ನು ಬೆಳಗಿ , ಜನ್ಮಾಷ್ಟಮೀ ಪ್ರಸಾದ ವಿತರಿಸಿ ರಾಮತಾರಕ ಮಂತ್ರ ಉಪದೇಶಿಸಿದರು.

ಬಡಾವಣೆಯಲ್ಲಿನ ನೀರು ವಿದ್ಯುತ್​ , ಶಾಲೆ ಆಸ್ಪತ್ರೆ, ರಸ್ತೆ, ಒಳಚರಂಡಿ ವ್ಯವಸ್ಥೆ ಇತ್ಯಾದಿ ಮೂಲಭೂತ ಸೌಕರ್ಯಗಳ ಬಗ್ಗೆ ಕೇಳಿ ಮಾಹಿತಿ ಪಡೆದರು. ಬಳಿಕ ಸನಾತನ ಧರ್ಮದ ಪಾಲನೆ , ನಿತ್ಯ ದೇವರ ನಾಮಸ್ಮರಣೆ , ಕರ್ತವ್ಯ ಹಾಗೂ ರಾಷ್ಟ್ರ ನಿ‌ಷ್ಠೆ ಇತ್ಯಾದಿಗಳನ್ನು ಚಾಚೂ ತಪ್ಪದೇ ಪಾಲಿಸುವಂತೆ ತಿಳಿಸಿದರು. ಪ್ರತಿ ಮನೆ, ಕೇರಿ, ಬಡಾವಣೆಯ ಸ್ವಚ್ಛತೆಯ ಪಾಲನೆ ಹಾಗೂ ಮಕ್ಕಳಿಗೆ ಉತ್ತಮ ಶಿಕ್ಷಣ , ಸಂಸ್ಕಾರ ನೀಡಬೇಕು, ಆರೋಗ್ಯದ ಬಗ್ಗೆ ಕಾಳಜಿವಹಿಸುವಂತೆ ಸೂಚಿಸಿದರು. ನಂತರ ಬಡಾವಣೆಯ ಮಂದಿರದ ಆವರಣದಲ್ಲಿ ಸೇರಿದ್ದ 500ಕ್ಕೂ ಅಧಿಕ ಜನರಿಗೆ ರಾಮಮಂತ್ರೋಪದೇಶ, ಧರ್ಮಸಂದೇಶ ನೀಡಿದರು.

8 ಶತಮಾನಗಳ ಪರಂಪರೆಯ ಸ್ಬಾಮೀಜಿಯೊಬ್ಬರು ನಮ್ಮ ಮನೆ , ಕೇರಿಗೆ ಬಾಗಿಲಿಗೆ ಬರುವುದನ್ನೂ ನಾವು ಯಾರೂ ಯೋಚಿಸಿರಲಿಲ್ಲ . ಇವತ್ತಿನ ದಿನ ನಮಗೆಲ್ಲ ಪಾವನ ಅನುಭವವನ್ನು ತಂದಿದೆ. ಗುರುಗಳ ಆಶೀರ್ವಾದ ನಮ್ಮೆಲ್ಲರ ಮೇಲೆ ಸದಾ ಇರಬೇಕು ಎಂದು ಸಮಾಜದ ಮುಂದಾಳುಗಳು ಆಶಿಸಿದರು.

ವಿಹಿಂಪ ಪರಿಷತ್ತಿನ ಪ್ರಾಂತ ಸಂಘಟನಾ ಕಾರ್ಯದರ್ಶಿ ಸುಬೋಧ್​ ಜಿ., ಲಕ್ಷ್ಮಣ್​ ಜಿ., ಅಭಿಷೇಕ್​ ಮೊದಲಾದವರಿದ್ದರು.