ಪೇಜಾವರ ಶ್ರೀ ದೆಹಲಿ ಚಾತುರ್ಮಾಸ್ಯ ಅತ್ಯಂತ ಸಕಾಲಿಕ: ಪ್ರಹ್ಲಾದ್‌ ಜೋಶಿ

ಉಡುಪಿ: ಪೇಜಾವರ ಶ್ರೀಗಳು ಮಧ್ವಾಚಾರ್ಯರ ಭಕ್ತಿ ಸಂದೇಶಗಳನ್ನು ಪ್ರಸಾರಗೊಳಿಸಲು ದೇಶದ ರಾಜಧಾನಿ ದೆಹಲಿಯಲ್ಲಿ ಚಾತುಮಾರ್ಸ್ಯ ವ್ರತ ನಡೆಸುತ್ತಿರುವುದು ಅತ್ಯಂತ ಸಕಾಲಿಕವಾಗಿದೆ ಎಂದು ಕೇಂದ್ರ ಶಿಕ್ಷಣ ಸಚಿವ ಪ್ರಹ್ಲಾದ್​ ಜೋಶಿ ತಿಳಿಸಿದ್ದಾರೆ.

ಬುಧವಾರ ನವದೆಹಲಿ ವಸಂತ್​ ಕುಂಜ್​ ಪೇಜಾವರ ಮಠದ ಶಾಖೆ ವೇದವ್ಯಾಸ ಗುರುಕುಲ - ಶ್ರೀ ಕೃಷ್ಣಧಾಮದಲ್ಲಿ ಚಾತುಮಾರ್ಸ್ಯ ವೃತಾಚರಣೆ ಸಭಾಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಕೀರ್ತಿಶೇಷ ಶ್ರೀ ವಿಶ್ವೇಶತೀರ್ಥ ಶ್ರೀಪಾದರು ದೇಶಾದ್ಯಂತ ಸಂಚರಿಸಿ ಧರ್ಮಮಾರ್ಗದಲ್ಲಿ ನಡೆಯಲು ಜನತೆಗೆ ನೀಡಿದ ಪ್ರೇರಣೆ ಪ್ರೋತ್ಸಾಹ ಹಾಗೂ ಹಿಂದು ಸಮಾಜವನ್ನು ಸಂಘಟಿಸುವಲ್ಲಿ ನೀಡಿದ ಮಾರ್ಗದರ್ಶನ ನೀಡಿ ಸಂತಕುಲಕ್ಕೇ ಓರ್ವ ಆದರ್ಶರೆನಿಸಿದ್ದಾರೆ. ಈ ಚಾತುಮಾರ್ಸ್ಯದಿಂದ ಸಮಸ್ತ ದೆಹಲಿಯ ಜನರಿಗೂ ಶ್ರೀಗಳ ದಿವ್ಯಾಶಿರ್ವಾದ ಲಭಿಸುತ್ತಿರುವುದು ಅತ್ಯಂತ ಅಭಿನಂದನೀಯ ಎಂದರು.

ವಿಶ್ವಹಿಂದು ಪರಿಷತ್ತಿನ ಅಂತಾರಾಷ್ಟ್ರೀಯ ಅಧ್ಯಕ್ಷ ಅಲೋಕ್​ ಕುಮಾರ್​ ಅಧ್ಯಕ್ಷತೆ ವಹಿಸಿದ್ದರು. ಸಂಸದ ಕೋಟ ಶ್ರೀನಿವಾಸ ಪೂಜಾರಿ, ಬಿ.ವೈ. ರಾಘವೇಂದ್ರ, ದೆಹಲಿ ಮೇಯರ್​ ಪರ್ವೇಶ್​ ವಾಹಿ, ಮಾಜಿ ಸಂಸದ ರಮೇಶ್​ ಬಿಧೂರಿ ಉಪಸ್ಥಿತರಿದ್ದರು. ಕೇಂದ್ರೀಯ ಸಂಸತ ವಿವಿ ಉಪಕುಲಪತಿ ಡಾ. ಶ್ರೀನಿವಾಸ ವರಖೇಡಿ ಪ್ರಸ್ತಾವನೆಗೈದರು. ವಿಹಿಂಪ ಪ್ರಾಂತ ಸಂಘಟನಾ ಕಾರ್ಯದರ್ಶಿ ಸುಬೋಧ್​ ಚಂದ್ರ ಸ್ವಾಗತಿಸಿದರು. ಹಿರಿಯ ವಿದ್ವಾಂಸ ಡಾ. ವೀರನಾರಾಯಣ ಪಾಂಡುರಂಗಿ, ಬ್ರಹ್ಮೋಸ್​ ನಿರ್ದೇಶಕ ಪ್ರೊ. ಜಯತೀರ್ಥ್​ ಜೋಶಿ , ವೇದವ್ಯಾಸ ಗುರುಕುಲ ನಿರ್ದೇಶಕ ಡಾ.ವಿಠೋಬಾಚಾರ್ಯ ಉಪಸ್ಥಿತರಿದ್ದರು . ಸಮಿತಿ ಕಾರ್ಯದರ್ಶಿ ವಾಸುದೇವ ಭಟ್​ ಪೆರಂಪಳ್ಳಿ , ಅಶ್ವಿನ್​ ಕಕ್ರಣ್ಣಾಯ, ಕೃಷ್ಣಮೂರ್ತಿ ಭಟ್​ , ಮಹಾನಿಧಿ ಆಚಾರ್ಯ ಸಹಕರಿಸಿದರು.

ಈ ಸಂದರ್ಭದಲ್ಲಿ ಹಿರಿಯ ವಿದ್ವಾಂಸ ತಿರುಮಲ ಕುಲಕರ್ಣಿ ಆಚಾರ್ಯರು ಅನುವಾದಿಸಿದ ಆಚಾರ್ಯ ಮಧ್ವರ ಜೀವನ ಚರಿತ್ರೆಯ ಹಿಂದಿ ಅವತರಣಿಕೆಯನ್ನು ಪ್ರಹ್ಲಾದ್​ ಜೋಶಿ ಬಿಡುಗಡೆಗೊಳಿಸಿದರು. ಮಠದ ನವೀಕರಣ ಕಾಮಗಾರಿ ನಿರ್ವಹಿಸಿದ ಇಂಜಿನಿಯರ್​ ಸಂತೋಷ್​ ಬೆಂಗಳೂರು , ರಿಶಿರಾಜ್​ ದೆಹಲಿ ಅವರನ್ನು ಶ್ರೀಗಳು ಸನ್ಮಾನಿಸಿದರು. ಸಭಾಕಾರ್ಯಕ್ರಮಕ್ಕೂ ಮುನ್ನ ಶ್ರೀಗಳನ್ನು ಸಾಲಂಕೃತ ವಾಹನದಲ್ಲಿ ಕುಳ್ಳಿರಿಸಿ ಭವ್ಯ ಶೋಭಾಯಾತ್ರೆಯ ಮೂಲಕ ಮಂದಿರಕ್ಕೆ ಬರಮಾಡಿಕೊಳ್ಳಲಾಯಿತು.

"

ರಾಮರಾಜ್ಯ ನಿಮಾರ್ಣದೆಡೆಗಿನ ಕಲ್ಪನೆ ಸಾಕಾರಕ್ಕಾಗಿ ಪ್ರತಿಯೊಬ್ಬರೂ ಸಮಾಜಮುಖಿಯಾಗಿ ಸಕ್ರಿಯರಾಗಬೇಕು. ಚಾತುಮಾರ್ಸ್ಯದ ಅವಧಿಯಲ್ಲಿ ದೆಹಲಿಯಲ್ಲಿ ಮಠದ ಕಾರ್ಯಚಟುವಟಿಕೆ ವಿಸ್ತಾರಗೊಳಿಸುವ ಪ್ರಯತ್ನ ನಡೆಸಲಾಗುವುದು.

— ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದರು, ಪೇಜಾವರ ಮಠ.