ಉಡುಪಿ: ಅನಾರೋಗ್ಯಕ್ಕೊಳಗಾದ ಮಕ್ಕಳು ಮತ್ತು ಅವರ ಕುಟುಂಬಕ್ಕೆ ಕಷ್ಟದ ಸಮಯದಲ್ಲಿ ಸಹಕರಿಸುವುದು ನಮ್ಮ ಸಂಸ್ಥೆಯ ಸಂಸ್ಥಾಪಕ ಡಾ. ಟಿಎಂಎ ಪೈ ಅವರ ಮೌಲ್ಯ ಮತ್ತು ದೃಷ್ಟಿಕೋನವಾಗಿತ್ತು. ಆರೋಗ್ಯ ಸೇವೆಯು ವೈದ್ಯಕೀಯ ಚಿಕಿತ್ಸೆಯನ್ನೂ ಮೀರಿದ್ದು ಎನ್ನುವುದನ್ನು ನಾವು ಯಾವಾಗಲೂ ನಂಬಿದ್ದೇವೆ. ಆ ಉದ್ದೇಶದಿಂದಲೇ ಮೂಳೆ ಮಜ್ಜೆಯ ಕಸಿ ಚಿಕಿತ್ಸೆಗೆ ಒಳಗಾಗುವ ಮಕ್ಕಳಿಗೆ ಸುರಕ್ಷತೆ ಮತ್ತು ಕಾಳಜಿ ತೋರುವ ಕೇಂದ್ರ ತೆರೆಯಲು ಕೆಎಂಸಿಯಲ್ಲಿ ಸ್ಥಳಾವಕಾಶ ಒದಗಿಸಲಾಗಿದೆ ಎಂದು ಮಣಿಪಾಲ ಅಕಾಡೆಮಿ ಆಫ್​ ಹೈಯರ್​ ಎಜುಕೇಶನ್​ನ ಸಹಕುಲಾಧಿಪತಿ ಡಾ. ಎಚ್​.ಎಸ್​. ಬಲ್ಲಾಳ್​ ತಿಳಿಸಿದರು.

ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯಲ್ಲಿ ಮೂಳೆ ಮಜ್ಜೆಯ ಕಸಿ ಮಾಡಿಸಿಕೊಳ್ಳುವ ಮಕ್ಕಳಿಗೆ ಮೀಸಲಾಗಿ ಆಕ್ಸೆಸ್​ ಲೈಫ್​, ಮಾಹೆ ಮತ್ತು ಚೆಲ್ಲಾರಾಮ್​ ಫೌಂಡೇಷನ್​ ಸಹಭಾಗಿತ್ವದಲ್ಲಿ ಆರಂಭಿಸಲಾದ 'ಹೋಮ್​ ಅವೇ ಫ್ರಮ್​ ಹೋಮ್​' ಸೌಲಭ್ಯದ ಕರ್ನಾಟಕದ ಮೊದಲ ಕೇಂದ್ರವನ್ನು ಶನಿವಾರ (ಮೇ 23) ಉದ್ಘಾಟಿಸಿ ಮಾತನಾಡಿದರು.