ಉಡುಪಿ: ಇಂದ್ರಾಳಿಯಲ್ಲಿರುವ ಉಡುಪಿ ರೈಲು ನಿಲ್ದಾಣದಲ್ಲಿ ಪ್ರಯಾಣಿಕರೊಂದಿಗೆ ಪಾರ್ಕಿಗ್​ ಸಿಬ್ಬಂದಿ ಅನುಚಿತವಾಗಿ ವರ್ತಿಸಿದ್ದ ಪ್ರಕರಣಕ್ಕೆ ಸಂಬಂಧಿಸಿ ಎರಡು ಬಾರಿ ದೂರು ಸಲ್ಲಿಸಿದ ಬಳಿಕ ಕೊಂಕಣ ರೈಲ್ವೆ ಅಧಿಕಾರಿಗಳು ಎಚ್ಚೆತ್ತುಕೊಂಡಿದ್ದಾರೆ. ರೈಲ್ವೆ ಸಂರಕ್ಷಣಾ ಪಡೆ (ಆರ್​ಪಿಎಫ್​) ಪೊಲೀಸರ ಮುಂದಾಳತ್ವದಲ್ಲಿ ರೈಲು ನಿಲ್ದಾಣದ ಪಾರ್ಕಿಂಗ್​ ಸಿಬ್ಬಂದಿ ಕ್ಷಮೆಯಾಚಿಸಿದ ಘಟನೆ ನಡೆದಿದೆ.

ಆ.12ರಂದು ಮುಂಬಯಿಯಿಂದ ಉಡುಪಿಗೆ ಆಗಮಿಸಿದ್ದ ಪ್ರಯಾಣಿಕರೊಬ್ಬರು ರೈಲು ನಿಲ್ದಾಣದ ನಿರ್ಗಮನ ಪ್ರದೇಶದಲ್ಲಿ ವಾಹನಗಳ ಸಂಚಾರಕ್ಕೆ ಅಡ್ಡಿಯಾಗಿದ್ದ ಹಿನ್ನೆಲೆಯಲ್ಲಿ ಪಾರ್ಕಿಂಗ್​ ಸಿಬ್ಬಂದಿಗೆ ಸರಿಯಾಗಿ ವಾಹನ ನಿಲ್ಲಿಸುವಂತೆ ಮನವಿ ಮಾಡಿದ್ದರು.

ಈ ವೇಳೆ ಪಾರ್ಕಿಂಗ್​ ಸಿಬ್ಬಂದಿ ಅನುಚಿತ ಹಾಗೂ ಅವಮಾನಕರ ರೀತಿಯಲ್ಲಿ ವರ್ತಿಸಿದ್ದನು. ಇದರಿಂದ ನೊಂದ ಆ ಪ್ರಯಾಣಿಕ ಘಟನೆಗೆ ಸಂಬಂಧಿಸಿ ರೈಲ್ವೆಯ "ರೇಲ್​ ಮದದ್​' ವ್ಯವಸ್ಥೆಯ ಮೂಲಕ ದೂರು ದಾಖಲಿಸಿದ್ದರು.

ಒಮ್ಮೆ ದೂರು ನೀಡಿದಾಗ ಸಮರ್ಪಕವಾಗಿ ಪರಿಹಾರವಾಗಿಲ್ಲ ಎಂಬ ಕಾರಣಕ್ಕೆ ಮತ್ತೊಮ್ಮೆ ದೂರು ಸಲ್ಲಿಸಲಾಗಿತ್ತು. ಎರಡು ಬಾರಿ ದೂರು ನೀಡಿದ ಬಳಿಕ ವಿಷಯವು ಆರ್​ಪಿಎಫ್​ ಪೊಲೀಸರ ಗಮನಕ್ಕೆ ಬಂದಿದೆ. ಅವರ ಮಧ್ಯಸ್ಥಿಕೆಯಲ್ಲಿ ಪಾರ್ಕಿಂಗ್​ ಸಿಬ್ಬಂದಿ ಆ ಪ್ರಯಾಣಿಕರ ಬಳಿ ಕ್ಷಮೆಯಾಚಿಸಿದ್ದಾರೆ ಎಂದು ತಿಳಿದುಬಂದಿದೆ.

ಸಿಬ್ಬಂದಿಯ ಅನುಚಿತ ವರ್ತನೆ ವಿರುದ್ಧ ದೂರು ದಾಖಲಿಸಿದ ಪ್ರಯಾಣಿಕರ ವೈಯಕ್ತಿಕ ಮೊಬೈಲ್​ ಸಂಖ್ಯೆಯನ್ನು ದೂರು ದಾಖಲಾಗಿದ್ದ ಪಾರ್ಕಿಗ್​ ಸಿಬ್ಬಂದಿಗೆ ನೀಡಲಾಗಿದೆ. ಆತ ಪ್ರಯಾಣಿಕರಿಗೆ ಕರೆ ಮಾಡಿ, 'ದೂರು ಯಾಕೆ ನೀಡಿದ್ದೀರಿ?' ಎಂದು ಗಲಾಟೆ ಮಾಡಿದ್ದಾನೆ. 'ರೇಲ್​ ಮದದ್​'ಗೆ ದೂರು ಸಲ್ಲಿಸುವಾಗ ನೀಡಿದ ತನ್ನ ಮೊಬೈಲ್​ ಸಂಖ್ಯೆಯನ್ನು ಪಾರ್ಕಿಂಗ್​ ಸಿಬ್ಬಂದಿಗೆ ನೀಡಿರುವುದು ಪ್ರಯಾಣಿಕರ ವೈಯಕ್ತಿಕ ಮಾಹಿತಿಯ ಗೌಪ್ಯತೆ ಮತ್ತು ದೂರು ನಿರ್ವಹಣೆಯ ಪಾರದರ್ಶಕತೆಯ ಉಲ್ಲಂನೆಯಾಗಿದೆ. ಈ ಹಿನ್ನೆಲೆಯಲ್ಲಿ ಪ್ರಕರಣವನ್ನು ಮತ್ತಷ್ಟು ಗಂಭೀರವಾಗಿ ಪರಿಗಣಿಸಿ, ದೂರುದಾರರ ಮೊಬೈಲ್​ ಸಂಖ್ಯೆ ಪಾರ್ಕಿಂಗ್​ ಸಿಬ್ಬಂದಿಗೆ ಹೇಗೆ ತಲುಪಿತು ಎಂಬುದರ ಕುರಿತು ತನಿಖೆ ನಡೆಸುವಂತೆ ರೈಲ್ವೆ ಇಲಾಖೆಗೆ ಪ್ರಯಾಣಿಕ ಮನವಿ ಮಾಡಿದ್ದಾರೆ. ಈ ಕುರಿತು ಸ್ಥಳಿಯ ಶಾಸಕರು, ಸಂಸದರು, ರೈಲ್ವೆ ಸಚಿವರು ಹಾಗೂ ಕೊಂಕಣ ರೈಲ್ವೆಯ ವ್ಯವಸ್ಥಾಪಕ ನಿರ್ದೇಶಕರಿಗೂ ದೂರು ಸಲ್ಲಿಸಲಾಗಿದೆ.