‘ಆಪರೇಶನ್ ಕಾಡುಹಂದಿ’ ಶಾರ್ಪ್‌ಶೂಟರ್‌ಗಳು ಸನ್ನದ್ಧ

ಕಾಡುಹಂದಿಗಳ ಬೇಟೆಯಾಡಲು ವಿಶೇಷ ಅನುಮತಿಯೊಂದಿಗೆ ಜಿಲ್ಲಾದ್ಯಂತ ಕಾರ್ಯಾಚರಿಸುತ್ತಿರುವ ಶಾರ್ಪ್‌ಶೂಟರ್ ತಂಡ ಸದ್ಯ ಎಣ್ಮಕಜೆ ಪಂಚಾಯಿತಿ ವ್ಯಾಪ್ತಿಯಲ್ಲಿ ಸಕ್ರಿಯವಾಗಿದ್ದು, ವಿಪರೀತ ಉಪಟಳ ನೀಡುತ್ತಿದ್ದ ಕಾಡುಹಂದಿಯೊಂದನ್ನು ಭಾನುವಾರ ಹೊಡೆದುಹಾಕಿದೆ.

ತೀವ್ರ ಉಪಟಳ ನೀಡುವ ಕಾಡುಹಂದಿಗಳನ್ನು ಗುಂಡಿಕ್ಕಿ ಕೊಲ್ಲಲು ಎರಡು ವರ್ಷಗಳ ಹಿಂದೆ ಅರಣ್ಯ ಇಲಾಖೆ ಸ್ಥಳೀಯಾಡಳಿತಕ್ಕೆ ವಿಶೇಷ ಅನುಮತಿ ನೀಡಿದ್ದರೂ ಜಿಲ್ಲೆಯಲ್ಲಿ ಕಾರ್ಯಾಚರಣೆ ಜಾರಿಗೊಂಡಿರಲಿಲ್ಲ. ಎಣ್ಮಕಜೆ ಪಂಚಾಯಿತಿಯ ಆಗಿನ ಅಧ್ಯಕ್ಷರಾಗಿದ್ದ, ಹಾಲಿ ಜಿಪಂ ಸದಸ್ಯ ಜೆ.ಎಸ್. ಸೋಮಶೇಖರನ್ ತಮ್ಮ ಪಂಚಾಯಿತಿ ವ್ಯಾಪ್ತಿಯಲ್ಲಿರುವ ಕಾಡುಹಂದಿ ಕಾರ್ಯಾಚರಣೆಗೆ ಚಾಲನೆ ನೀಡಿದ್ದರೂ ಬಳಿಕ ಆ ಯೋಜನೆ ಅನುಷ್ಠಾನಗೊಂಡಿರಲಿಲ್ಲ.

ಎಣ್ಮಕಜೆ ವ್ಯಾಪ್ತಿಯಲ್ಲಿ ಕಾಟುಕುಕ್ಕೆ, ವಾಣಿನಗರ, ಪಡ್ರೆ, ಬಣ್ಪುತ್ತಡ್ಕ, ಪೆಲ್ತಾಜೆ, ಸಾಯ ಪ್ರದೇಶಗಳಲ್ಲಿ ಕಾಡುಹಂದಿಗಳ ಉಪಟಳ ಹೆಚ್ಚಾಗುತ್ತಿದ್ದು, ಈ ಕಾರಣಕ್ಕಾಗಿ ಪಂಚಾಯಿತಿಯ ನೂತನ ಆಡಳಿತ ಮಂಡಳಿ ಮತ್ತೆ ಶಾರ್ಪ್‌ಶೂಟರ್‌ಗಳನ್ನು ಕರೆಸಿಕೊಂಡಿದೆ.

ಕೇರಳದ ಇಪ್ಪತ್ತೊಂದು ರಾಜ್ಯಗಳಲ್ಲಿ ಕಾಡುಹಂದಿಗಳ ಉಪಟಳ ಮಿತಿಮೀರಿದ್ದು, ಈ ಪೈಕಿ ಕಾಸರಗೋಡಿನಲ್ಲೇ ಅತಿ ಹೆಚ್ಚು ಸಂಖ್ಯೆಯಲ್ಲಿ ಕಾಡುಹಂದಿಗಳಿರುವುದು ಪತ್ತೆಯಾಗಿದೆ. ಹತ್ತು ವರ್ಷಗಳಲ್ಲಿ ಕಾಡುಹಂದಿ ದಾಳಿಗೆ ಜಿಲ್ಲಾದ್ಯಂತ 7 ಮಂದಿ ಬಲಿಯಾಗಿದ್ದು, 60 ಮಂದಿ ಗಾಯಗೊಂಡಿದ್ದಾರೆ ಎಂದು ಅರಣ್ಯ ಇಲಾಖೆಯ ಅಂಕಿ ಅಂಶ ಹೇಳುತ್ತದೆ.

ಎಣ್ಮಕಜೆ ಪಂಚಾಯಿತಿಯಲ್ಲಿ ಪರವಾನಗಿ ಹೊಂದಿರುವ 12 ಮಂದಿ ಶಾರ್ಪ್‌ಶೂಟರ್‌ಗಳ ತಂಡ ಕಾರ್ಯಾಚರಣೆಗೆ ಸಿದ್ಧವಾಗಿದೆ. ಬೇಟೆ ಕಾರ್ಯಾಚರಣೆಗೆ ಆಗಮಿಸಿರುವ ಬಂದೂಕುಧಾರಿಗಳು ಅರಣ್ಯ ಇಲಾಖೆಯ ಎಂಪ್ಯಾನಲ್‌ನಲ್ಲಿ ಹೆಸರು ನೋಂದಾಯಿಸಿಕೊಂಡಿದ್ದು, ಇಲಾಖೆಯ ಮಾನದಂಡದಂತೆ ಕಾರ್ಯಾಚರಣೆ ನಡೆಯಲಿದೆ.

ಅರಣ್ಯ ಇಲಾಖೆಯ ಎಂಪ್ಯಾನಲ್‌ನಲ್ಲಿ ನೋಂದಣಿಗೊಂಡ ತಂಡ, ಬಂದೂಕುಧಾರಿಗಳ ಹೆಸರು ಹಾಗೂ ಮೊಬೈಲ್ ಸಂಖ್ಯೆಯನ್ನು ಪಂಚಾಯಿತಿಗಳು ಪ್ರಕಟಿಸಿವೆ. ಕಾಡುಹಂದಿಗಳ ದಾಳಿಯಿಂದ ಬೇಸತ್ತ ಕೃಷಿಕರು ಶಾರ್ಪ್‌ಶೂಟರ್‌ಗಳನ್ನು ಸಂಪರ್ಕಿಸಿದಲ್ಲಿ ಆ ತಂಡ ನಿರ್ದಿಷ್ಟ ಸ್ಥಳಕ್ಕೆ ಆಗಮಿಸಿ ಬೇಟೆಗ ಸಜ್ಜಾಗಲಿದೆ. ಸ್ಫೋಟಕ ಹಾಗೂ ಇತರ ಮಾರಕ ವಸ್ತು ಬಳಸಿ ಹತ್ಯೆಮಾಡುವುದು ಕಾನೂನು ಬಾಹಿರವಾಗಿರುವುದರಿಂದ ಶಾರ್ಪ್‌ಶೂಟರ್‌ಗಳ ತಂಡ ನಾಜೂಕಾಗಿ ಕಾರ್ಯನಿರ್ವಹಿಸಲಿದೆ. ಕೊಲ್ಲಲಾದ ಕಾಡುಹಂದಿಗಳನ್ನು ಅರಣ್ಯ ಇಲಾಖೆ ಮಾನದಂಡದ ಪ್ರಕಾರವೇ ಮಹಜರು ನಡೆಸಿ ಮಣ್ಣು ಮಾಡಲಾಗುತ್ತದೆ.