ಕಳೆದ 18 ತಿಂಗಳಿನಲ್ಲಿ 2 ಕೋಟಿ 18 ಲಕ್ಷ ರೂ. ವಿದ್ಯುತ್ ಬಿಲ್ ನೀರಾವರಿ ಇಲಾಖೆ ಮೆಸ್ಕಾಂ ಕಟ್ಟಬೇಕಾಗಿದ್ದು, ಅದರಲ್ಲಿ ಕೇವಲ 9 ಲಕ್ಷ ರೂ. ಮಾತ್ರ ಇಲಾಖೆ ಪಾವತಿಸಿದೆ. 2 ಕೋಟಿ 9 ಲಕ್ಷ ರೂ. ಬಾಕಿ ಇರಿಸಿದೆ ಎನ್ನಲಾಗಿದೆ. ಬಿರು ಬಿಸಿಲಿನ ಬೇಗೆಯಿಂದ ಕೃಷಿ ಭೂಮಿ ಒಣಗುತ್ತಿದ್ದು, ಬೆಳೆಗಳನ್ನು ಉಳಿಸಿಕೊಳ್ಳಲು ರೈತರು ಹಗಲಿರುಳು ಹೋರಾಡುತ್ತಿದ್ದಾರೆ. ಇಂತಹ ಸಂಕಷ್ಟದ ಸಮಯದಲ್ಲಿ ನೂರಾರು ರೈತ ಕುಟುಂಬಗಳಿಗೆ ಆಸರೆಯಾಗಿದ್ದ ಏತ ನೀರಾವರಿ ಯೋಜನೆಯನ್ನು ಸ್ಥಗಿತಗೊಳಿಸಿರುವುದು ಸರ್ಕಾರದ ರೈತ ವಿರೋಧಿ ನೀತಿಗೆ ಹಿಡಿದ ಕನ್ನಡಿಯಾಗಿದೆ ಎಂಬ ಅಸಮಾಧಾನ ರೈತರಿಂದ ವ್ಯಕ್ತವಾಗುತ್ತಿದೆ. ಕಾರ್ಕಳ ತಾಲೂಕಿನ ಅಜೆಕಾರು, ಹೆರ್ಮುಂಡೆ, ಎಣ್ಣೆಹೊಳೆ, ಹಿರ್ಗಾನ, ಯರ್ಲಪಾಡಿ, ಕುಕ್ಕುಂದೂರು, ಕಾರ್ಕಳ ಕಸಬ ಪ್ರದೇಶದ ರೈತರಿಗೆ ನೀರಾವರಿ ಯೋಜನೆ ನೀರು ಸಹಕಾರಿಯಾಗಿತ್ತು.
