ಉಡುಪಿ

ಕಡಲ್ಕೊರೆತಕ್ಕಿಲ್ಲ ಶಾಶ್ವತ ತಡೆ

ಉಪ್ಪಳ ಶಾರದಾನಗರ ಕಡಪ್ಪುರದಲ್ಲಿ ಕಡಲು ಕೊರೆತಕ್ಕೆ ಮನೆ, ತೆಂಗಿನ ಮರಗಳು ಸಮುದ್ರ ಪಾಲಾಗಿರುವುದು.
ಉಪ್ಪಳ ಶಾರದಾನಗರ ಕಡಪ್ಪುರದಲ್ಲಿ ಕಡಲು ಕೊರೆತಕ್ಕೆ ಮನೆ, ತೆಂಗಿನ ಮರಗಳು ಸಮುದ್ರ ಪಾಲಾಗಿರುವುದು.
ಇಂದಿರಾ ಎನ್ ಕೆ
Published on: 

ಪುರುಷೋತ್ತಮ ಪೆರ್ಲ ಕಾಸರಗೋಡು

ಮಂಜೇಶ್ವರ ಕಣ್ವತೀರ್ಥದಿಂದ ಇಡಯಿಲಕ್ಕಾಡ್‌ವರೆಗಿನ 70 ಕಿ.ಮೀ.ಗೂ ಅಧಿಕ ಕರಾವಳಿ ಪ್ರದೇಶ ಹೊಂದಿರುವ ಕಾಸರಗೋಡು ಜಿಲ್ಲೆಯಲ್ಲಿ ಕಡಲ್ಕೊರೆತ ತೀವ್ರಗೊಂಡಿದ್ದು ಸಮುದ್ರತೀರದ ವಾಸಿಗಳಲ್ಲಿ ಭೀತಿ ಮೂಡಿಸಿದೆ.
ಹಲವು ದಶಕಗಳಿಂದ ಜಿಲ್ಲೆಯ ಕರಾವಳಿ ತೀರದ ಜನತೆ ಎದುರಿಸುತ್ತಿರುವ ಕಡಲ್ಕೊರೆತ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳಲು ಜನಪ್ರತಿನಿಧಿಗಳಿಗೆ ಇದುವರೆಗೆ ಸಾಧ್ಯವಾಗಿಲ್ಲ. ಪ್ರತಿ ವರ್ಷ ಸಮುದ್ರ ಕೊರೆತ ಪ್ರದೇಶಗಳಿಗೆ ಭೇಟಿ ನೀಡುವ ಅಧಿಕಾರಿಗಳು, ಜನಪ್ರತಿನಿಧಿಗಳು ಭರವಸೆ ನೀಡಿ ತೆರಳುತ್ತಾರೆಯೇ ವಿನಾ ಸಮಸ್ಯೆಗೆ ಪರಿಹಾರ ಕಂಡುಕೊಂಡಿಲ್ಲ. ಇದರಿಂದ ನೂರಾರು ಮನೆಗಳು, ತೆಂಗಿನಮರ ಸೇರಿದಂತೆ ಕೃಷಿ ಪ್ರದೇಶ ಪ್ರತಿವರ್ಷ ಕಡಲ ಗರ್ಭವನ್ನು ಸೇರುತ್ತಿದೆ.
ಉಪ್ಪಳ ಶಾರದಾನಗರ, ಪೆರಿಂಗಡಿ, ಮೂಸೋಡಿ, ಕೊಯಿಪ್ಪಾಡಿ, ಮೊಗ್ರಾಲ್, ಶಿರಿಯ, ಪೆರುವಾಡ್, ಚೇರಂಗೈ ಕಡಪ್ಪುರ, ಚೌಕಿ ಕಾವುಗೋಳಿ, ಉದುಮ ಜನ್ಮ ಕಡಪ್ಪುರ, ತ್ರಿಕ್ಕನ್ನಾಡ್, ಉದುಮ, ಪಳ್ಳಿಕೆರೆ ಸೇರಿದಂತೆ ವಿವಿಧ ಪ್ರದೇಶದ ಜನತೆ ಹಲವು ದಶಕಗಳಿಂದ ಸಮಸ್ಯೆ ಅನುಭವಿಸುತ್ತಿದ್ದಾರೆ.

ಶಾಶ್ವತ ಪರಿಹಾರಕ್ಕೆ ಆಗ್ರಹ

ಕೋಸ್ಟಲ್ ರೆಗ್ಯುಲೇಶನ್ ಜೋನ್(ಸಿಆರ್‌ಜೆಡ್) ಕಾಯ್ದೆಯನ್ವಯ ಗ್ರಾಮೀಣ ಪ್ರದೇಶದಲ್ಲಿ ಸಮುದ್ರ ದಡದಿಂದ ನಿಗದಿತ ದೂರದಲ್ಲಿ ನಿರ್ಮಾಣ ಕಾರ್ಯ ನಡೆಸಬಹುದಾಗಿದ್ದರೂ, ಇದ್ಯಾವುದೂ ಪಾಲನೆಯಾಗುತ್ತಿಲ್ಲ. ಕೆಲವೊಂದು ಪ್ರದೇಶಗಳಿಗೆ 50 ಮೀ. ನಿಂದ 500 ಮೀ. ಅಂತರದಲ್ಲಿ ಮಾತ್ರ ನಿರ್ಮಾಣ ಕಾರ್ಯ ಕೈಗೊಳ್ಳಬಹುದೆಂಬ ನಿಬಂಧನೆಯಿದ್ದು, ಜಿಲ್ಲೆಯ ಬಹುತೇಕ ಕಡೆ ನಿಬಂಧನೆಗಳ ಸ್ಪಷ್ಟ ಉಲಂಘನೆಯಾಗುತ್ತಿದ್ದರೂ ಯಾರೂ ಚಕಾರವೆತ್ತುತ್ತಿಲ್ಲ. ಸಮುದ್ರ ಕೊರೆತ ತಡೆಗೆ ನಿರ್ಮಿಸಲಾಗುವ ಕಗ್ಗಲ್ಲು, ಮರಳುಚೀಲಗಳ ತಡೆಗೋಡೆಗಳಳು ರಕ್ಕಸ ಗಾತ್ರದ ಅಲೆಗಳ ಹೊಡೆತಕ್ಕೆ ಸಿಲುಕಿ ಸಮುದ್ರ ಪಾಲಾಗುತ್ತಿದ್ದು ಪ್ರಯತ್ನವೆಲ್ಲ ನೀರಲ್ಲಿ ಹೋಮ ಮಾಡಿದಂತಾಗುತ್ತಿದೆ. ಆದ್ದರಿಂದ ಟೆಟ್ರಾಪಾಡ್ ಅಳವಡಿಸುವ ಮೂಲಕ ಶಾಶ್ವತ ಪರಿಹಾರ ಕಂಡುಕೊಳ್ಳುವಂತೆ ಸ್ಥಳೀಯರು ಒತ್ತಾಯಿಸಿದ್ದಾರೆ.

ಭರವಸೆಗಿಲ್ಲ ಕೊರತೆ

ಕರಾವಳಿ ಪ್ರದೇಶದ ಜನತೆ ದಶಕಗಳಿಂದ ಎದುರಿಸುತ್ತಿರುವ ಕಡಲ್ಕೊರೆತ ಸಮಸ್ಯೆಗೆ ಶಾಶ್ವತ ಪರಿಹಾರಕ್ಕಾಗಿ ಮೊರೆಯಿಡುತ್ತಿದ್ದರೂ, ಸರ್ಕಾರ ಆಲಿಸುವ ಸ್ಥಿತಿಯಲ್ಲಿಲ್ಲ. ಜಿಲ್ಲೆಯ ಸಂಸದ, ಶಾಸಕರನ್ನೊಳಗೊಂಡ ತಂಡ ಮಳೆಗಾಲದಲ್ಲಿ ಕಡಲ್ಕೊರೆತ ಪ್ರದೇಶಕ್ಕೆ ಭೇಟಿ ನೀಡುವುದು ಬಿಟ್ಟರೆ, ಶಾಶ್ವತ ತಡೆಗೋಡೆ ನಿರ್ಮಾಣಕ್ಕೆ ಪ್ರಾಮಾಣಿಕ ಪ್ರಯತ್ನ ನಡೆಸುತ್ತಿಲ್ಲ ಎಂಬ ಆರೋಪ ದೀರ್ಘಕಾಲದಿಂದ ಕೇಳಿಬರುತ್ತಿದೆ. ಚೌಕಿ ಕಾವುಗೋಳಿಯಲ್ಲಿ ಕಡಲ್ಕೊರೆತದಿಂದ ಈ ಬಾರಿ ಕೇಂದ್ರ ತೋಟಗಾರಿಕಾ ಬೆಳೆಗಳ ಸಂಶೋಧನಾ ಕೇಂದ್ರದ ತೋಟಗಳಿಗೂ ಭೀತಿ ಎದುರಾಗಿದೆ. ಈಗಾಗಲೇ ಆವರಣಗೋಡೆ ಹಾಗೂ ರಸ್ತೆ ಸಮುದ್ರಪಾಲಾಗಿದೆ.

ಕಡಲ್ಕೊರೆತದಿಂದಾಗಿ ಏಳು ಕೊಠಡಿಗಳ ಮನೆ ಸಮುದ್ರಪಾಲಾಗಿದ್ದು, ನಮ್ಮ ಕುಟುಂಬ ಬೀದಿಪಾಲಾಗಿದೆ. ಶಾಶ್ವತ ತಡೆಗೋಡೆ ನಿರ್ಮಿಸಿದ್ದರೆ ನಮ್ಮ ಮನೆ ಉಳಿಯುತ್ತಿತ್ತು. ಕಡಲ್ಕೊರೆತ ತಡೆಗಟ್ಟಲು ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳು ಪ್ರತಿ ವರ್ಷ ಭರವಸೆ ನೀಡುತ್ತಿದ್ದು, ಈವರೆಗೂ ಈಡೇರಿಲ್ಲ.

— ಪ್ರಸೀದಾ, ಉಪ್ಪಳ ಶಾರದಾನಗರ, ಮನೆ ಕಳೆದುಕೊಂಡ ಸಂತ್ರಸ್ತೆ

ಕಡಲ್ಕೊರೆತದ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳಲು ಸಮಗ್ರ ಅಧ್ಯಯನ ನಡೆಸಲಾಗುವುದು ಮತ್ತು ಸೂಕ್ತ ಕ್ರಮ ಕೈಗೊಳ್ಳಲಾಗುವುದು. ಪ್ರಕ್ಷುಬ್ಧ ಸಮುದ್ರದಂಥ ಪರಿಸ್ಥಿತಿ ಸೇರಿದಂತೆ ಯಾವುದೇ ವಿಪತ್ತು ಎದುರಿಸಲು ಜಿಲ್ಲಾಡಳಿತ ಸನ್ನದ್ಧವಾಗಿದೆ.

— ಅರ್ಜುನ್ ಪಾಂಡಿಯನ್, ಜಿಲ್ಲಾಧಿಕಾರಿ

ಕಾಸರಗೋಡು
permanent
sea erosion
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net