ವಾಹನ ಸವಾರರಿಗಿಲ್ಲ ಸಿಎನ್​ಜಿ ಭಾಗ್ಯ

ಪರಿಸರ ಸ್ನೇಹಿ ಮತ್ತು ಆರ್ಥಿಕವಾಗಿ ಲಾಭದಾಯಕ ಎಂಬ ಕಾರಣಕ್ಕೆ ಪೆಟ್ರೋಲ್​, ಡೀಸೆಲ್​ ಬಿಟ್ಟು ಸಿಎನ್​ಜಿ ಮೊರೆ ಹೋದ ವಾಹನ ಸವಾರರಿಗೆ ಈಗ "ಇಂಧನ' ಭಾಗ್ಯವೇ ಇಲ್ಲದಂತಾಗಿದೆ. ಪ್ರಸ್ತುತ ಮದುವೆ, ರಜೆಯ ಮಜಾ ಪಡೆಯಲು ಪ್ರವಾಸಕ್ಕೆ ತೆರಳುವ ಸೀಸನ್​ನಲ್ಲಿ ಸಿಎನ್​ಜಿ ಪೂರೈಕೆಯಲ್ಲಿ ಉಂಟಾಗಿರುವ ತೀವ್ರ ವ್ಯತ್ಯಯದಿಂದ ಆಟೋ ರಿಾ ಹಾಗೂ ಟ್ಯಾಕ್ಸಿ ಚಾಲಕರು ಬೀದಿಗೆ ಬೀಳುವಂತಾಗಿದೆ.

ಅವಿಭಜಿತ ದ.ಕ.& ಉಡುಪಿ ಸೇರಿದಂತೆ ಗ್ರಾಮೀಣ ಭಾಗದಿಂದ ಹಿಡಿದು ನಗರದ ಬಹುತೇಕ ಸಿಎನ್​ಜಿ ಸ್ಟೇಷನ್​ಗಳ ಮುಂದೆ ಕಿಲೋಮೀಟರ್​ಗಟ್ಟಲೆ ಪ್ರತಿ ನಿತ್ಯ ವಾಹನಗಳ ಸಾಲು ಕಂಡು ಬರುತ್ತಿದೆ. ಮುಂಜಾನೆ 4 ಗಂಟೆಗೆ ಸಾಲಿನಲ್ಲಿ ನಿಂತರೂ ಇಂಧನ ಸಿಗುವುದು ಮಧ್ಯಾಹ್ನ ಎನ್ನುವಂತಾಗಿದೆ. ಇದರಿಂದ ಚಾಲಕರ ದುಡಿಮೆಯ ಅಮೂಲ್ಯ ಸಮಯ ರಸ್ತೆಯಲ್ಲೇ ವ್ಯರ್ಥವಾಗುತ್ತಿದೆ.

ದಿನಕ್ಕೆ 600&1000 ರೂ. ದುಡಿಯುತ್ತಿದ್ದ ಆಟೋ ಚಾಲಕರು ಈಗ ಗ್ಯಾಸ್​ಗಾಗಿ 4&5 ಗಂಟೆ ಕಾಯಬೇಕಿದೆ. ಬಾಡಿಗೆಗೆ ಸಮಯವೇ ಇಲ್ಲದಂತಾಗಿದೆ. ಬಹುತೇಕ ಸಮಯ ಸಿಎನ್​ಜಿ ಸ್ಟೆಷನ್​ ಮುಂದೆ ಕಳೆಯುವಂತಾಗಿದೆ. ಇನ್ನು ಟೂರಿಸ್ಟ್​ ವಾಹನಗಳಂತೂ ಸಿಎನ್​ಜಿ ಸಿಗದೆ ಸೀಸನ್​ ಸಮಯದಲ್ಲಿರುವ ಅಲ್ಪ ಬಾಡಿಗೆ ಕೈ ಬಿಟ್ಟು ಸುಮ್ಮನೆ ಕುಳಿತುಕೊಳ್ಳುವ ಸ್ಥಿತಿ ನಿರ್ಮಾಣವಾಗಿದೆ. ದಿನಕ್ಕೆ ಒಂದು ಲೋಡ್​ ಸಿಎನ್​ಜಿ ಬಂದರೆ ಸಾಲು ನಿಂತ ಅರ್ಧದಷ್ಟು ವಾಹನಗಳಿಗೆ ತುಂಬುವಾಗಲೇ ಖಾಲಿಯಾಗುತ್ತದೆ. ಬಾಕಿ ಉಳಿದ ವಾಹನಗಳು ಬಂದ ದಾರಿಗೆ ಸುಂಕವಿಲ್ಲ ಎಂಬಂತೆ ವಾಪಸಾಗುತ್ತಾರೆ. ಹೀಗಾಗಿ ಬ್ಯಾಂಕ್​ನಿಂದ ಸಾಲ ಮಾಡಿ ಖರೀದಿಸಿದ ವಾಹನಗಳ ತಿಂಗಳ ಕಂತು ಕಟ್ಟುವುದು ಹೇಗೆ ಎಂದು ವಾಹನ ಮಾಲೀಕರು ಚಿಂತೆಗೀಡಾಗಿದ್ದಾರೆ.

ಕಳೆದ ನಾಲ್ಕೆದು ತಿಂಗಳಿಂದ ನಿರಂತರ ಸಿಎನ್​ಜಿ ಪೂರೈಕೆಯಲ್ಲಿ ವ್ಯತ್ಯಯವಾಗುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಸಿಎನ್​ಜಿ ಕಾರು ಹಾಗೂ ಆಟೋ ರಿಕ್ಷಾಗಳ ಮಾರಾಟ ಶೇ.20ಕ್ಕಿಂತ ಹೆಚ್ಚಾಗಿದೆ. ಆದರೆ ಅದಕ್ಕೆ ತಕ್ಕಂತೆ ಬಂಕ್​ಗಳ ಸಂಖ್ಯೆ ಹೆಚ್ಚಾಗಿಲ್ಲ. ಹೀಗಾಗಿ ಇರುವ ಬೆರಳೆಣಿಕೆಯ ಬಂಕ್​ಗಳ ಮುಂದೆ ವಾಹನಗಳು ಸಾಲುಗಟ್ಟಿ ನಿಲ್ಲುವಂತಾಗಿದೆ. ನಗರ ಹಾಗೂ ಗ್ರಾಮೀಣ ಭಾಗ ಸೇರಿದಂತೆ ಜಿಲ್ಲಾದ್ಯಂತ ಪ್ರತಿ 10 ಕಿ.ಮೀ.ಗೆ ಒಂದರಂತೆ ಸಿಎನ್​ಜಿ ಪಂಪ್​ಗಳು ತೆರೆದುಕೊಳ್ಳಬೇಕಾಗಿದೆ ಎನ್ನುವುದು ಬಹುತೇಕ ಚಾಲಕರ ಬೇಡಿಕೆ.

ಏಪ್ರಿಲ್​ ಹಾಗೂ ಮೇ ತಿಂಗಳಲ್ಲಿ ಶಾಲಾ ಕಾಲೇಜುಗಳಿಗೆ ರಜೆ ಇರುವ ಪರಿಣಾಮ ಹೊರ ಜಿಲ್ಲೆ ಹಾಗೂ ಹೊರ ರಾಜ್ಯದ ಸಾಕಷ್ಟು ಮಂದಿ ಊರಿಗೆ ಬರುವ ಕಾರಣ ವಾಹನಗಳ ಸಂಖ್ಯೆ ಹೆಚ್ಚಾಗಿಯೇ ಇರುತ್ತದೆ. ಹೀಗಾಗಿ ಈ ಸೀಸನ್​ನಲ್ಲಿ ಮದುವೆ, ಧಾರ್ಮಿಕ ಕಾರ್ಯಕ್ರಮಗಳು ಹಾಗೂ ಪ್ರವಾಸಿ ಕೇಂದ್ರವನ್ನು ಸುತ್ತಾಡಲು ಹೋಗುವ ಪ್ರವಾಸಿ ವಾಹನಗಳ ಓಡಾಟ ಹೆಚ್ಚಾಗಿದೆ. ಆದರೆ ಸಿಎನ್​ಜಿ ಪೂರೈಕೆಯಲ್ಲಿ ವ್ಯತ್ಯಯವಾಗುತ್ತಿದ್ದು, ಸ್ಟಾಕ್​ ಬೇಗನೆ ಖಾಲಿಯಾಗುತ್ತಿದೆ. ಬಂಕ್​ಗಳ ಮುಂದೆ ನೋ ಸ್ಟಾಕ್​' ಬೋರ್ಡ್​ಗಳು ಹಾಗೂ ಹಲವು ಕಡೆಗಳಲ್ಲಿ ಸಿಎನ್​ಜಿ ಲಭ್ಯವಿದ್ದರೂ ಪ್ರೆಶರ್​ ಕಡಿಮೆ ಇರುವುದರಿಂದ ಸಿಲಿಂಡರ್​ ಪೂರ್ಣ ಪ್ರಮಾಣದಲ್ಲಿ ತುಂಬುತ್ತಿಲ್ಲ. ಇನ್ನು ಕೆಲವು ಕಡೆ ಲಾರಿಗಳು ಬರುವುದು ತಡವಾಗುತ್ತಿರುವುದರಿಂದ ನೋ ಸ್ಟಾಕ್​' ಬೋರ್ಡ್​ಗಳು ರಾರಾಜಿಸುತ್ತಿವೆ. ಇದು ಚಾಲಕರಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ. ಸೀಸನ್​ ಸಮಯದಲ್ಲೇ ಸಿಎನ್​ಜಿ ಕೈಕೊಟ್ಟರೆ ಬಾಡಿಗೆ ಮಾಡುವುದು ಹೇಗೆ ಎಂದು ವಾಹನ ಮಾಲಿಕರು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.

ನಮಗೆ ಸಕಾಲಕ್ಕೆ ಇಂಧನ ಸಿಗದಿದ್ದರೆ ಸಾಲದ ಕಂತು ಕಟ್ಟುವುದು ಹೇಗೆ? ಸರ್ಕಾರ ಮತ್ತು ಕಂಪನಿಗಳು ಶ್ರೀ ಕ್ರಮ ಕೈಗೊಳ್ಳಬೇಕಾಗಿದೆ. ಪ್ರತಿ ನಿತ್ಯ ಬಾಡಿಗೆ ಸಿಗುವ ಸಮಯದಲ್ಲಿ ಬಂಕ್​ ಮುಂದೆ ನಿಲ್ಲುವ ಸ್ಥಿತಿ ನಿರ್ಮಾಣವಾಗಿದೆ.

| ಯೋಗೀಶ್​, ಆಟೋ ಚಾಲಕ