ಉಡುಪಿ: ಆಸ್ಪತ್ರೆಗೆ ಹೆರಿಗೆಗೆಂದು ಬಂದ ಮಹಿಳೆಯರಿಗೆ ಜನಿಸುವ ಕೆಲ ನವಜಾತ ಶಿಶುವಿನಲ್ಲಿ ದೈಹಿಕವಾಗಿ ಅಥವಾ ಆರೋಗ್ಯದಲ್ಲಿ ಸಮಸ್ಯೆಯಿದ್ದರೆ ಜೀವಕ್ಕೆ ಅಪಾಯವಾಗಬಹುದು. ಅಂತಹ ಸಂದಿಗ್ಧ ಸ್ಥಿತಿಯಲ್ಲಿ ಶಿಶುಗಳ ತೀವ್ರನಿಗಾ ಘಟಕವು ಆ ಮಗುವಿಗೆ ಜೀವದಾನ ನೀಡುವ ಕೇಂದ್ರವಾಗಲಿದೆ. ಆರೋಗ್ಯ ಕ್ಷೇತ್ರದಲ್ಲಿಂದು ಸೌಲಭ್ಯ&ಸೇವೆಗಳಲ್ಲೂ ಪೈಪೋಟಿಯಿದ್ದು, ಉಡುಪಿಯ ಲೋಂಬಾರ್ಡ್​ ಆಸ್ಪತ್ರೆಯು ಉತ್ತಮ ವ್ಯವಸ್ಥೆಯೊಂದಿಗೆ ರೋಗಿಗಳಿಗೆ ಆಸರೆಯಾಗಿದೆ ಎಂದು ಸಿಎಸ್​ಐ-ಕೆಎಸ್​ಡಿ ಬಿಷಪ್​ ರೈಟ್​ ರೆ. ಹೇಮಚಂದ್ರ ಕುಮಾರ್​ ತಿಳಿಸಿದರು.

ಉಡುಪಿಯ ಸಿಎಸ್​ಐ ಲೋಂಬಾರ್ಡ್​ ಮೆಮೋರಿಯಲ್​ (ಮಿಷನ್​) ಆಸ್ಪತ್ರೆಯಲ್ಲಿ ನವಜಾತ ಶಿಶುಗಳ ತೀವ್ರ ನಿಗಾ ಘಟಕ, ಅಲ್ಟ್ರಾ ಸೌಂಡ್​ ಹಾಗೂ ಇಕೋ ಕಲರ್​ ಡಾಪ್ಲರ್​ ಘಟಕವನ್ನು ಶನಿವಾರ (ಫೆ.14) ಉದ್ಘಾಟಿಸಿ ಮಾತನಾಡಿದರು.

ಐಎಂಎ ಕರಾವಳಿ-ಉಡುಪಿ ಅಧ್ಯಕ್ಷ ಡಾ. ಅಶೋಕ ಕುಮಾರ್​, ಡಾ. ಗುರುಪ್ರಸಾದ ಶೆಟ್ಟಿ, ಡಾ. ಜನಾರ್ದನ್​ ಪ್ರಭು ಮಾತನಾಡಿ, ಅವಧಿಗೂ ಮೊದಲೇ ಜನಿಸುವ ಶಿಶುಗಳಿಗೆ ಈ ಘಟಕವು ವಿಶೇಷ ಅನುಕೂಲ ಕಲ್ಪಿಸಲಿದೆ. ವಯಸ್ಸಾದವರಿಗೆ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ನೀಡಿದರೆ 5-10 ವರ್ಷ ಬದುಕಬಹುದು. ಆದರೆ, ಸಮಸ್ಯಾತ್ಮಕ ನವಜಾತ ಶಿಶುಗಳಿಗೆ ಇಲ್ಲಿ ಸೂಕ್ತ ಚಿಕಿತ್ಸೆ ದೊರೆತರೆ 75ರಿಂದ 100 ವರ್ಷ ಬದುಕಬಹುದು. ಮೆದುಳಿನ ಬೆಳವಣಿಗೆ ಮಾಡಿಸುವ ಮೂಲಕ ಬುದ್ಧೀಹಿನರಾಗುವುದನ್ನು ತಪ್ಪಸಬಹುದು. 'ಡಾಕ್ಟರ್​ ಹೇಗಾದರೂ ಮಾಡಿ ನಮ್ಮ ಮಗುವನ್ನು ಬದುಕಿಸಿಕೊಡಿ' ಎಂದು ಪಾಲಕರು ಅಳುವಾಗ ನಮಗೇನು ಮಾಡಬೇಕೋ ತೋಚುತ್ತಿರಲಿಲ್ಲ. ಇದೀಗ ಆ ಚಿಂತೆ ನಮಗಿಲ್ಲ. ಆಸ್ಪತ್ರೆಯಲ್ಲಿ ತುರ್ತು ನಿಗಾ ಘಟಕ ವ್ಯವಸ್ಥೆ ಒದಗಿಸಿದ ಆಡಳಿತ ನಿರ್ದೇಶಕ ಡಾ. ಸುಶೀಲ್​ ಜತ್ತನ್ನ ಅವರಿಗೆ ಅಭಿನಂದನೆ ಸಲ್ಲಿಸುತ್ತೇವೆ ಎಂದರು.

ಡಾ. ಮನೋಹರ್​ ಬೋಳೂರು ಉಪಸ್ಥಿತರಿದ್ದರು. ಉಡುಪಿ ವಿಭಾಗದ ಅಧ್ಯಕ್ಷ ರೆ. ಕಿಶೋರ್​ ಕುಮಾರ್​ ಹಾಗೂ ಆಸ್ಪತ್ರೆಯ ಕೋಶಾಧಿಕಾರಿ ರೆ. ಐವನ್​ ಡಿಸೋನ್ಸ್​ ಪ್ರಾರ್ಥಿಸಿದರು. ಆಸ್ಪತ್ರೆಯ ಎಚ್​ಆರ್​ ಮೆನೇಜರ್​ ಲಿಯೋನಾ ಸ್ಟ್ರೆಲಿಟಾ ಸ್ವಾಗತಿಸಿದರು. ಆಸ್ಪತ್ರೆಯ ನರ್ಸಿಂಗ್​ ವಿಭಾಗದ ಉಪನ್ಯಾಸಕಿ ನೋವಿಟಾ ನರೋನ್ಹಾ ವಂದಿಸಿದರು. ಅಸ್ಪತ್ರೆಯ ಸೀನಿಯರ್​ ಅಕೌಂಟೆಂಟ್​ ಸ್ಯಾಂಡ್ರಾ ಜಾಕ್ಲಿನ್​ ಕಾರ್ಯಕ್ರಮ ನಿರೂಪಿಸಿದರು.

"