ಅಭಿವೃದ್ಧಿ ನೆಪದಲ್ಲಿ ಅವಗಣನೆ

ಅತ್ಯಂತ ಕಡಿದಾದ ಚೆಂಬುಗುಡ್ಡೆ ಕಾಲುದಾರಿ.

Published on:

11 Jul 2026, 12:55 pm

ಅನ್ಸಾರ್ ಇನೋಳಿ ಉಳ್ಳಾಲ

ಉಳ್ಳಾಲ ನಗರಸಭೆಯಿಂದ ಕೇವಲ ಒಂದೂವರೆ ಕಿ.ಮೀ. ಹಾಗೂ ತೊಕ್ಕೊಟ್ಟು ಜಂಕ್ಷನ್‌ನಿಂದ ಕೇವಲ 300 ಮೀಟರ್ ಅಂತರದಲ್ಲಿರುವ ಚೆಂಬುಗುಡ್ಡೆ ಪ್ರದೇಶದ ನಿವಾಸಿಗಳು ಮೂಲಸೌಕರ್ಯಗಳಿಗಾಗಿ ದಶಕಗಳಿಂದ ಪರದಾಡುತ್ತಿದ್ದಾರೆ.

ಅಭಿವೃದ್ಧಿಯ ಹೆಸರಿನಲ್ಲಿ ರಾಜರಸ್ತೆಗಳು ಮಿನುಗುತ್ತಿದ್ದರೂ, ಇಲ್ಲಿನ ಜನರು ಮಾತ್ರ ಇಂದಿಗೂ ಕಡಿದಾದ ಕಾಲುದಾರಿಗಳನ್ನೇ ನಂಬಿ ಬದುಕುವ ದಯನೀಯ ಸ್ಥಿತಿ ಜಿದೆ.

ಮಂಗಳೂರು ವಿಶ್ವವಿದ್ಯಾಲಯ ಮುಖ್ಯರಸ್ತೆಯಲ್ಲಿನ ಕೆರೆಬೈಲ್ ಶ್ರೀ ಕೊರಗಜ್ಜ ಕ್ಷೇತ್ರದ ಸಮೀಪದ ಗುಡ್ಡ ಪ್ರದೇಶದಲ್ಲಿ ಸುಮಾರು 10 ಕುಟುಂಬಗಳು ವಾಸವಾಗಿವೆ. ಇಲ್ಲಿನ ನಿವಾಸಿಗಳಿಗೆ ಮುಖ್ಯರಸ್ತೆಯನ್ನು ಸಂಪರ್ಕಿಸಲು ಹಿಂದಿನಿಂದಲೂ ಕಡಿದಾದ ಮೆಟ್ಟಿಲುಗಳಿರುವ ಕಾಲುದಾರಿಗಳೇ ಆಧಾರ. ಐದು ವರ್ಷಗಳ ಹಿಂದೆ ನಗರಸಭಾ ಸದಸ್ಯರೊಬ್ಬರು ಮೆಟ್ಟಿಲುಗಳಿಗೆ ಕೆಂಪು ಕಲ್ಲುಗಳನ್ನು ಹಾಸಿದ ಬಳಿಕ, ಮಳೆಗಾಲದಲ್ಲಿ ಜಾರುವ ಸಮಸ್ಯೆ ಉಲ್ಬಣಿಸಿ ಜನರು ಹೈರಾಣಾಗಿದ್ದಾರೆ. ಸ್ಥಳೀಯರೇ ಸ್ವತಃ ಶ್ರಮದಾನದ ಮೂಲಕ ಮೆಟ್ಟಿಲು ನಿರ್ಮಿಸಿಕೊಂಡಿದ್ದರೂ, ಮೂಲಸೌಕರ್ಯಗಳ ಕೊರತೆ ಅವರನ್ನು ಕಾಡುತ್ತಲೇ ಇದೆ.

ಚಿಕಿತ್ಸೆಗೂ ಪರದಾಟ

ಈ ಪ್ರದೇಶದಲ್ಲಿ ಯಾರಾದರೂ ಅಸ್ವಸ್ಥರಾದರೆ ಅವರನ್ನು ಮುಖ್ಯರಸ್ತೆಗೆ ಕರೆತರುವುದೇ ದೊಡ್ಡ ಸವಾಲಾಗಿದೆ. ಹಿರಿಯರು ಒಬ್ಬಂಟಿಯಾಗಿ ಸಂಚರಿಸುವುದು ಅಸಾಧ್ಯವಾಗಿದ್ದು, ದಾರಿಯುದ್ದಕ್ಕೂ ವಿದ್ಯುತ್ ದೀಪಗಳಿಲ್ಲದ ಕಾರಣ ರಾತ್ರಿ ವೇಳೆ ಭಯದ ವಾತಾವರಣದಲ್ಲಿ ಓಡಾಡುವಂತಾಗಿದೆ. ಚುನಾವಣೆ ಸಂದರ್ಭದಲ್ಲಿ ಭರವಸೆಗಳ ಸುರಿಮಳೆ ಸುರಿಸುವ ಜನಪ್ರತಿನಿಧಿಗಳು, ಗೆದ್ದ ನಂತರ ಇತ್ತ ಸುಳಿಯುವುದೇ ಇಲ್ಲ ಎಂಬುದು ಸ್ಥಳೀಯರ ಆರೋಪ.

ಇಲಾಖೆಗಳ ಆಟ

ನಗರಸಭೆಯತ್ತ ಬೊಟ್ಟು ಮಾಡಿದರೆ ಲೋಕೋಪಯೋಗಿ ಇಲಾಖೆಯ ಕಡೆಗೆ ಬೆರಳು ತೋರಿಸುತ್ತಾರೆ, ಪಿಡಬ್ಲುೃಡಿ ಕಚೇರಿಗೆ ಹೋದರೆ ನಗರಸಭೆಯತ್ತ ದೂಡುತ್ತಾರೆ. ಈ ಇಲಾಖೆಗಳ ಜವಾಬ್ದಾರಿಯುತ ನಿರ್ಲಕ್ಷ್ಯದಿಂದಾಗಿ ತಾವು ಸಂಕಷ್ಟಕ್ಕೆ ಸಿಲುಕಿದ್ದೇವೆ ಎಂದು ನಿವಾಸಿಗಳು ಅಸಹಾಯಕತೆ ವ್ಯಕ್ತಪಡಿಸುತ್ತಾರೆ.

ಸ್ಥಳೀಯರ ಆಕ್ರೋಶ

ಮಂಗಳೂರು ವಿವಿ ಸಂಪರ್ಕಿಸುವ ರಾಜರಸ್ತೆ ಚತುಷ್ಪಥಗೊಂಡಾಗ, ಚರಂಡಿ ನಿರ್ಮಿಸುವ ನೆಪದಲ್ಲಿ ಚೆಂಬುಗುಡ್ಡೆ ಸಂಪರ್ಕ ರಸ್ತೆಯ ಮೆಟ್ಟಿಲುಗಳನ್ನು ಒಡೆದು ಹಾಕಲಾಯಿತು. ಕಾಮಗಾರಿ ಮುಗಿದು ವರ್ಷ ಕಳೆದರೂ, ಇಲ್ಲಿಯವರೆಗೆ ಚರಂಡಿಯೂ ನಿರ್ಮಾಣವಾಗಿಲ್ಲ, ಒಡೆದ ಮೆಟ್ಟಿಲುಗಳನ್ನು ಸರಿಪಡಿಸುವ ಕೆಲಸವೂ ಆಗಿಲ್ಲ. ಅಂದು ಅಧಿಕಾರಿಗಳು ತೋರಿದ ಕಾಳಜಿ ಕಾಮಗಾರಿ ಮುಗಿಯುತ್ತಿದ್ದಂತೆ ಮಾಯವಾಗಿದೆ ಎಂದು ನಿವಾಸಿಗಳು ಕಿಡಿಕಾರಿದ್ದಾರೆ.

ಮೇಲ್ಭಾಗದಿಂದ ಹರಿಯುವ ನೀರು ತಡೆಗಟ್ಟಲು ಪೈಪ್ ಬ್ಲಾಕ್ ಆಗಿದ್ದರಿಂದ ಚರಂಡಿ ಕಾಮಗಾರಿಗಾಗಿ ಮೆಟ್ಟಿಲುಗಳನ್ನು ತೆಗೆಯಲಾಗಿತ್ತು. ಆದರೆ ಅಲ್ಲಿನ ವಾಸ್ತವ ಸಮಸ್ಯೆ ಬಗ್ಗೆ ಯಾರೂ ನಮ್ಮ ಗಮನಕ್ಕೆ ತಂದಿಲ್ಲ. ತಕ್ಷಣ ಸ್ಥಳಕ್ಕೆ ಭೇಟಿ ನೀಡಿ ಅಗತ್ಯ ಕ್ರಮ ಕೈಗೊಳ್ಳುತ್ತೇವೆ.

ರಸ್ತೆ ಅಭಿವೃದ್ಧಿ ಹೆಸರಲ್ಲಿ ಕೋಟ್ಯಂತರ ರೂಪಾಯಿ ಸುರಿಯಲಾಗುತ್ತಿದೆ. ಆದರೆ ಒಂದು ಸಣ್ಣ ದಾರಿಯನ್ನು ಸರಿಪಡಿಸಲು ಯಾರೂ ಮುಂದಾಗುತ್ತಿಲ್ಲ. ಮುಖ್ಯರಸ್ತೆ ಅಗೆದ ಬಳಿಕ ಮೆಟ್ಟಿಲು ನಿರ್ಮಿಸದೆ ನಿರ್ಲಕ್ಷ್ಯ ವಹಿಸಿರುವುದು ದುರಂತ.

ನಾವು ಸ್ವಂತ ಖರ್ಚಿನಲ್ಲಿ ಮೆಟ್ಟಿಲು ನಿರ್ಮಿಸಿಕೊಂಡಿದ್ದೆವು, ಅದನ್ನು ಪಿಡಬ್ಲ್ಯುಡಿಯವರು ಅಗೆದು ಬಿಟ್ಟಿದ್ದಾರೆ. ಕಾಯಿಲೆ ಬಿದ್ದರೆ ಮುಖ್ಯರಸ್ತೆಗೆ ಬರಲು ಸಾಧ್ಯವಾಗುತ್ತಿಲ್ಲ, ಇಲಾಖೆಗಳ ಹಾರಿಕೆ ಉತ್ತರದಿಂದ ನಾವು ನರಕಯಾತನೆ ಅನುಭವಿಸುತ್ತಿದ್ದೇವೆ.

Development