ಉಡುಪಿ: ವಿಜ್ಞಾನಕ್ಕೆ ಸಂಬಂಧಿತ ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿಗಳು ಆಗಮಿಸಿರುವುದೇ ಅತ್ಯದ್ಭುತ ಕ್ಷಣ. ವೈಜ್ಞಾನಿಕವಾಗಿ ಭಾರತವೂ ಸಹ ಸಾಧನೆಯ ಮಾರ್ಗದಲ್ಲಿದ್ದು, ಮುಂದಿನ ಭಾರತವರ್ಷವನ್ನು ತಾವುಗಳು ವೈಜ್ಞಾನಿಕವಾಗಿ ಯಾವ ರೀತಿ ಬೆಳೆಸಬೇಕು ಎನ್ನುವುದನ್ನು ಇಂತಹ ಸಮ್ಮೇಳನದಿಂದ ಅರಿತುಕೊಳ್ಳಬೇಕು. ಪ್ರಕೃತಿಯ ಜ್ಞಾನ ತಿಳಿದುಕೊಳ್ಳಬೇಕಿದ್ದು, ವಿಜ್ಞಾನವನ್ನು ಬಿಡಬೇಡಿ ಎಂದು ಬ್ರಹ್ಮೋಸ್​ ಕ್ಷಿಪಣಿ ತಯಾರಿ ಹಿಂದಿನ ವಿಜ್ಞಾನಿ, ಪದ್ಮಶ್ರೀ ಡಾ.ಪ್ರಹ್ಲಾದ ರಾಮ ರಾವ್​ ತಿಳಿಸಿದರು.

ಉಡುಪಿ ಪೂರ್ಣಪ್ರಜ್ಞ ಕಾಲೇಜ್​(ಸ್ವಾಯತ್ತ)ನ ಐಕ್ಯುಎಸಿ ಹಾಗೂ ವಿಜ್ಞಾನ ಸಂಘದ ವತಿಯಿಂದ ಶನಿವಾರ (ಏ.4) ಆಯೋಜಿಸಿದ್ದ ರಾಷ್ಟ್ರೀಯ ವಿಜ್ಞಾನ, ತಂತ್ರಜ್ಞಾನ ಹಾಗೂ ವಿಜ್ಞಾನಿಗಳ ಸಮ್ಮೇಳನದಲ್ಲಿ ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಿ ಮಾತನಾಡಿದರು.

ಸೂರ್ಯನ ಮೇಲ್ಮೆನಲ್ಲಿ 17 ಮಿಲಿಯನ್​ ಡಿಗ್ರಿ ಸೆಂಟ್ರಿಗೇಡ್​ ತಾಪ ಇರುವುದರಿಂದ ಅಲ್ಲಿ ಹೈಡ್ರೋಜನ್​ ಹೀಲಿಯಂ ಆಗಿ ಪರಿವರ್ತನೆ ಆಗುವುದರಿಂದ ಅತ್ಯಧಿಕ ತಾಪ ಉಂಟಾಗುತ್ತದೆ. ಈ ಪ್ರಕ್ರಿಯೆ ಕುತೂಹಲಕಾರಿಯಾಗಿ ಮುಂದುವರಿದಿದ್ದು, ಮಿಲಿಯನ್​ ವರ್ಷಗಳಿಂದ ನಮಗೆ ಬೆಳಕು, ತಾಪ, ಅಲ್ಟ್ರಾ ವೈಲಟ್​ ಬರುತ್ತಿದೆ. ಭೂಮಿಯಲ್ಲಿ ಅಷ್ಟೊಂದು ಪ್ರಮಾಣದ ತಾಪಮಾನ ಸೃಷ್ಟಿಸಲು ಸಾಧ್ಯವಿಲ್ಲ. ಪ್ರಯತ್ನ ನಡೆದಿದ್ದರೂ ಅದು ಅಸಾಧ್ಯ. 1 ಸಾವಿರ ಡಿ.ಸೆ. ಮಾಡಲು ಸಾಧ್ಯವಿದ್ದು, ಆ ಕುರಿತಂತೆ 2012ರಿಂದ ್ರೆಂಚ್​ ವಿಜ್ಞಾನಿಯಿಂದ ಅಮೆರಿಕದಲ್ಲಿ ಪ್ರಯತ್ನ ಸಾಗಿದೆ. ಅದು ಯಶ ಕಾಣಲಿ. ಆದರೆ, ನೀರು ಮತ್ತು ಹೈಡ್ರೋಜನ್​ ನಮ್ಮಲ್ಲಿಯೇ ಇದೆ. ನಮ್ಮ ದೇಶದ ಶಕ್ತಿ ನಮ್ಮಲ್ಲಿಯೇ ಇರಬೇಕು. ಆತ್ಮ ನಿರ್ಭರ ಭಾರತ ನಮ್ಮದಾಗಬೇಕು ಎಂದರು.

ಇಸ್ರೋ ಮಾಜಿ ವಿಜ್ಞಾನಿ ಡಾ.ಬಿ.ಆರ್​.ಗುರುಪ್ರಸಾದ್​ ಅವರು ಇಂಡಿಯನ್​ ಸ್ಪೇಸ್​ ಒರ್ಗಾನೈಸೇಷನ್​ (ಇಸ್ರೋ) ಕುರಿತು ಮಾತನಾಡಿ, ಭಾರತದಲ್ಲಿ ವಿವಿಧ ಸ್ಥರಗಳಲ್ಲಿ ಕೋಟ್ಯಂತರ ಸಂಖ್ಯೆಯಲ್ಲಿ ವಿದ್ಯಾಭ್ಯಾಸ ಮಾಡುತ್ತಿರುವ ವಿದ್ಯಾರ್ಥಿಗಳನ್ನು ಹುರುದುಂಬಿಸುವಲ್ಲಿ, ಪ್ರೇರೇಪಿಸುವಲ್ಲಿ ಇಸ್ರೋ ಮಹತ್ವದ ಪಾತ್ರ ವಹಿಸಿದೆ. ಹೀಗಾಗಿಯೇ ಇಸ್ರೋವನ್ನು ವಿಶಿಷ್ಟ ಹಾಗೂ ಅನನ್ಯ ಸಂಸ್ಥೆ ಎಂದು ಬಣ್ಣಿಸಲಾಗುತ್ತದೆ ಎಂದು ತಿಳಿಸಿ, ಶ್ರೀಹರಿಕೋಟಾದಲ್ಲಿ ರಾಕೆಟ್​ ಉಡಾವಣೆ ಮಾಡುವ ರೀತಿ, ವಿಶಿಷ್ಟತೆ ಕುರಿತು ಪ್ರಾತ್ಯಕ್ಷಿಕೆ ಮೂಲಕ ವಿವರಿಸಿದರು. 

ಬೆಂಗಳೂರಿನ ಜೆಎನ್​ಸಿಎಎಸ್​ಆರ್​ನ ಸಂಶೋಧಕ ಡಾ.ವಿನಾಯಕ ಕೆ.ಪತ್ತಾರ್​ ಅವರು ರಾಸಾಯನಿಕಗಳ ವಿವಿಧ ವೈಜ್ಞಾನಿಕ ಕುತೂಹಲ ಹಾಗೂ ಕೋಲ್ಡ್​ ಪ್ಯೂಸನ್​ ಆಗುವ ರೀತಿಯನ್ನು ಪ್ರದರ್ಶಿಸಿದರು. ಅದಮಾರು ಮಠದ ಶಿಕ್ಷಣ ಮಂಡಳಿಯ ಗೌರವ ಕಾರ್ಯದರ್ಶಿ ಡಾ.ಎ.ಪಿ ಭಟ್​, ಕಾರ್ಯದರ್ಶಿ ಡಾ. ಜಿ.ಎಸ್​. ಚಂದ್ರಶೇಖರ್​, ಅಕಾಡೆಮಿ ನಿರ್ದೇಶಕ ಡಾ. ಪಿ.ಎಸ್​. ಐತಾಳ್​ ಉಪಸ್ಥಿತರಿದ್ದರು.

ಅದಮಾರು ಮಠದ ಈಶಪ್ರಿಯ ತೀರ್ಥ ಶ್ರೀಪಾದರು ಸಾಧಕ ವಿಜ್ಞಾನಿಗಳನ್ನು ಹಾಗೂ ಪೂರ್ಣಪ್ರಜ್ಞ ಕಾಲೇಜಿನ ಮಾಜಿ ಪ್ರಾಂಶುಪಾಲ ಪ್ರೊ.ಎನ್​.ಎ.ಮಧ್ಯಸ್ಥ ಅವರನ್ನು ಸನ್ಮಾನಿಸಿದರು. 

ಚಿನ್ಮಯಿ ರಾವ್​ ಹಾಗೂ ನಿಹಾರಿಕಾ ಪ್ರಾರ್ಥಿಸಿದರು. ಪ್ರಾಂಶುಪಾಲ ರಾಮು ಎಲ್​. ಸ್ವಾಗತಿಸಿದರು. ಉಪನ್ಯಾಸಕಿ ಪ್ರತೀಕ್ಷಾ ಪರಿಚಯಿಸಿದರು. ಡಾ. ವಿನಯಕುಮಾರ್​ ಡಿ. ವಂದಿಸಿದರು. ಕಂಪ್ಯೂಟರ್​ ಸೈನ್ಸ್​ ವಿಭಾಗದ ಸ್ನೇಹಲತಾ ಶೆಟ್ಟಿಗಾರ್​ ಕಾರ್ಯಕ್ರಮ ನಿರ್ವಹಿಸಿದರು.

ಅಂತಾರಾಷ್ಟ್ರೀಯ ವಿಜ್ಞಾನ ತಂತ್ರಜ್ಞಾನ ಮತ್ತು ವಿಜ್ಞಾನಿಗಳ ಸಮ್ಮೇಳನವನ್ನು ಪೂರ್ಣಪ್ರಜ್ಞ ಶಿಕ್ಷಣ ಸಂಸ್ಥೆಯ ತರಬೇತಿ ಮತ್ತು ಶೈಕ್ಷಣಿಕ ನಿರ್ದೇಶಕ ಸಿ.ಎಂ. ಮಂಜುನಾಥ್​ ಉದ್ಘಾಟಿಸಿದರು. ಬೆಂಗಳೂರಿನ ಜವಾಹರಲಾಲ್​ ನೆಹರು ಸೆಂಟರ್​ ಫಾರ್​ ಅಡ್ವಾನ್ಸ್​ ಸೈಂಟಿಫಿಕ್​ ರಿಸರ್ಚ್​ ಥಿಯೋರಿಟಿಕಲ್​ ಸೈನ್ಸಸ್​ ಯುನಿಟ್​ ಪ್ರಾಧ್ಯಾಪಕ ಪ್ರೊ.ವಿದ್ಯಾಧಿರಾಜ ಎನ್​.ಎಸ್​., 'ಕ್ವಾಂಟಮ್​ ಫಿಸಿಕ್ಸ್​' ವಿಷಯ ಕುರಿತು ಹಾಗೂ 'ನ್ಯೂಟನ್​ನ ನಿಯಮ' ಕುರಿತು ಪವರ್​ ಪಾಯಿಂಟ್​ ಮೂಲಕ ಉಪನ್ಯಾಸ ನೀಡಿದರು. ಮೋಷನ್​, ಗ್ರ್ಯಾವಿಟೇಷನ್​ ಮತ್ತು ಕ್ಲಾಸಿಕಲ್​ ಇಲೆಕ್ಟ್ರೋಡೈನಾಮಿಕ್ಸ್​ ಈ ಮೂರು ಸಂಗತಿಗಳೇ ಫಿಸಿಕ್ಸ್​ನ ಮೂಲ ಆಧಾರವಾಗಿದೆ ಎನ್ನುವುದನ್ನು ವಿವಿಧ ಪ್ರಾತ್ಯಕ್ಷಿಕೆ ಮೂಲಕ ವಿವರಿಸಿದರು. ಕಾಲೇಜಿನ ಸಸ್ಯಶಾಸ್ತ್ರ ವಿಭಾಗದ ಮುಖ್ಯಸ್ಥೆ ಡಾ. ವಿಜಯಲಕ್ಷ್ಮೀ ಸಿ. ಭಟ್​, ಐಕ್ಯುಎಸಿ ಸಹ ಸಂಚಾಲಕ ಲಕ್ಷ್ಮೀಶ್​ ರಾವ್​ ಉಪಸ್ಥಿತರಿದ್ದರು. ಬಿಸಿಎ ವಿದ್ಯಾರ್ಥಿನಿ ನಯನಾ ಪ್ರಾರ್ಥಿಸಿದರು. ಕರಮಚಂದ ಕಿಶೋರ್​ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಉಪನ್ಯಾಸಕಿ ಅನೂಷಾ ಅತಿಥಿಗಳನ್ನು ಪರಿಚಯಿಸಿದರು.

"