ಉಡುಪಿ: ಉಡುಪಿಯಲ್ಲಿ ಮೊಟ್ಟ ಮೊದಲ ಬಾರಿಗೆ ಕರ್ನಾಟಕ ಪ್ರವಾಸೋದ್ಯಮ ಇಲಾಖೆಯ ಸಹಕಾರದಿಂದ 'ನಮ್ಮ ಉಡುಪಿ ಉತ್ಸವ' ಎಂಬ ವಿಶಿಷ್ಟ ಪಾರ್ಕ್​ ಆರಂಭಗೊಂಡಿದ್ದು, ವಿವಿಧ ಮನರಂಜನೆ ಹಾಗೂ ಆಹಾರ ಮೇಳಗಳು ಕುಟುಂಬಗಳಿಗೆ ಮುದ ನೀಡುತ್ತಿವೆ. 

ಉಡುಪಿಯ ಕರಾವಳಿ ಜಂಕ್ಷನ್​ ಸಮೀಪ, ಶಾರದಾ ಹೋಟೆಲ್​ ಹಿಂಭಾಗದಲ್ಲಿ ಉತ್ಸವ ನಡೆಯುತ್ತಿದೆ. ದಿನವೂ ಸಾವಿರಾರು ಜನರು ಸಂಭ್ರಗಳ ಕಲರವದಲ್ಲಿ ತಲ್ಲೀನರಾಗುತ್ತಿದ್ದಾರೆ. ಮಕ್ಕಳಿಗಂತೂ ಹೊಸಲೋಕ ಪ್ರವೇಶಿಸಿದ ಅನುಭವವಾಗುತ್ತಿದ್ದು, ಹಿರಿಹಿರಿ ಹಿಗ್ಗುತ್ತಿದ್ದಾರೆ.

ಉಡುಪಿ ಉತ್ಸವದ ಸ್ಥಳಕ್ಕೆ ಆಗಮಿಸುತ್ತಿದ್ದಂತೆಯೇ ಯುರೋಪಿಯನ್​ ಪ್ಯಾಲೇಸ್​ನ ಮಾದರಿ ಮನ ಸೆಳೆಯುತ್ತದೆ. ಟಿಕೆಟ್​ ಪಡೆದು ಅರಮನೆಯ ದ್ವಾರದ ಮೂಲಕ ಒಳ ಸಾಗುತ್ತಿದ್ದಂತೆ ವಿದೇಶದ ಬೀದಿಯೊಳಗೆ ಸಾಗಿದ ಅನುಭವ ಆಗುತ್ತದೆ. ಎರಡೂ ಇಕ್ಕೆಲಗಳಲ್ಲಿ ಅಲ್ಲಲ್ಲಿ ವಿವಿಧ ಬಗೆಯ ಸುಖಾಸೀನ ಅಳವಡಿಸಲಾಗಿದ್ದು, ಕೆಲ ಕಾಲ ಅಲ್ಲಿ ಕುಳಿತು ರಾಜವೈಭವ ಕಣ್ತುಂಬಿಸಿಕೊಳ್ಳಬಹುದು. ಕುದುರೆಯ ಮೇಲೆ ಬರುತ್ತಿರುವ ರಾಜ, ಸೈನಿಕರು, ರಾಜ ದರ್ಬಾರ್​ ಇಲ್ಲಿವೆ.

 ಅರಮನೆ ದಾಟಿ ಮುಂದಕ್ಕೆ ಸಾಗಿದರೆ ನೀರಿನೊಳಗೆ ಮತ್ಸ್ಯಕನ್ಯೆಯರ ಪ್ರದರ್ಶನವಿದೆ. 'ಮರ್ಮೇಡ್​ ಶೋ' ಹೆಸರಿನ ಈ ಪ್ರದರ್ಶನ ಉಡುಪಿಗೆ ಹೊಸ ಪರಿಚಯವಾಗಿದೆ. ಇಂಡೋನೇಶಿಯಾದ ಇಬ್ಬರು ಯುವತಿಯರು ಮೀನಿನಂತೆ ಪೋಷಾಕು ಧರಿಸಿ, ನೀರಿನೊಳಗೆ ಪಲ್ಟಿ ಹೊಡೆಯುತ್ತ, ಕೈಯಲ್ಲೇ ಹೃದಯದ ಚಿನ್ಹೆ ತೋರುತ್ತ ನೋಡುಗರಿಗೆ ಪ್ರೀತಿಯ ಸಂದೇಶ ನೀಡುತ್ತಾರೆ. 

ಯುವ ಸಮುದಾಯಕ್ಕೆ ಖುಷಿ ಹೆಚ್ಚಿಸಲು ಅಮ್ಯೂಸ್​ಮೆಂಟ್​ ಪಾರ್ಕ್​ ಇದೆ. ಜಾಯಿಂಟ್​ ವ್ಹೀಲ್​, ಹೈಪಿಲ್​ ಟವರ್​, ಸುನಾಮಿ ರೈಡ್​, ಕೋಲಂಬಸ್​ ನೌಕೆ, ಡ್ರಾಗನ್​ ಟ್ರೇನ್​, ಮಕ್ಕಳಿಗಾಗಿ ವಿವಿಧ ಆಟಿಕೆಗಳು, ಸ್ಕ್ರೀನ್​ ಲೈಟ್​, ಕಪ್​ ಶುಗರ್​ ಬ್ರೇಕ್​ ಡಾನ್ಸ್​, ಸೋಯನಿಚಾರ್​ ಹೀಗೆ ಅನೇಕ ವೈವಿಧ್ಯತೆಗಳಿವೆ ಎನ್ನುತ್ತಾರೆ ಉತ್ಸವದ ಉಸ್ತುವಾರಿ ಬಷೀರ್​.

ಉಡುಪಿ ಉತ್ಸವದಲ್ಲಿ ನಯಾಗರ ಫಾಲ್ಸ್​ನ ಮಾದರಿ ವಿಶೇಷ ಆಕರ್ಷಣೆಯಾಗಿದೆ. 180 ಅಡಿ ಅಗಲ, 30 ಅಡಿ ಎತ್ತರದ ಈ ಜಲಪಾತ ಸಂಜೆಯ ವೇಳೆ ಚಿತ್ತಾಕಾರದ ಲೈಟಿಂಗ್ಸ್​ನಲ್ಲಿ ಕಂಗೊಳಿಸುತ್ತಿದೆ. ಇದರ ಪಕ್ಕದಲ್ಲಿಯೇ 'ಭಯಾನಕ ಮನೆ' ಇದ್ದು ಭೂತಗಳ ಪ್ರದರ್ಶನವೂ ಇದೆ. ಅನಕೊಂಡ ಹಾವಿನ ತ್ರಿಡಿ ಶೋ ಇನ್ನೊಂದು ವಿಶೇಷತೆ. 150ಕ್ಕೂ ಅಧಿಕ ಸಿಬ್ಬಂದಿ ಇದ್ದು, ಯಶಸ್ವಿಯಾಗಿ ಉಡುಪಿ ಉತ್ಸವ ನಡೆಯುತ್ತಿದೆ ಎನ್ನುತ್ತಾರೆ ಉತ್ಸವದ ಇನ್ನೋರ್ವ ಉಸ್ತುವಾರಿ ಪ್ರಭಾಕರ್​.