ಕೃಷ್ಣನೂರಲ್ಲಿ 'ನಳ' ಶಾಪ ವಿಮೋಚನೆ

ಉಡುಪಿ: ಶೀರೂರು ಮಠದ ವೇದವರ್ಧನ ತೀರ್ಥ ಶ್ರೀಪಾದರ ಪ್ರಥಮ ಪರ್ಯಾಯದ ನಿಮಿತ್ತ  ರಾಜಾಂಗಣದಲ್ಲಿ ನಿರಂತರ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಯಕ್ಷಗಾನ ಕಲಾರಂಗ ಉಡುಪಿ ಸಂಯೋಜನೆಯಲ್ಲಿ ಶುಕ್ರವಾರ ರಾತ್ರಿ (ಜ.23) ವಿವಿಧ ಖ್ಯಾತ ಅತಿಥಿ ಕಲಾವಿದರ ಕೂಡುವಿಕೆಯಲ್ಲಿ 'ನಳ-ದಮಯಂತಿ' ಯಕ್ಷಗಾನ ಪ್ರದರ್ಶನ ನಡೆಯಿತು.

ದಮಯಂತಿ ಸ್ವಯಂವರದಲ್ಲಿ ಆಕೆಯು ದೇವತೆಗಳನ್ನೆಲ್ಲ ತಿರಸ್ಕರಿ, ನಿಷಧ ದೇಶದ ಚಕ್ರವರ್ತಿ ನಳ ಮಹಾರಾಜನನ್ನು ವರಿಸುತ್ತಾಳೆ. ಅದರಿಂದ ಕುಪಿತರಾದ ದೇವತೆಗಳು ನಳನ ನಾಶಕ್ಕೆ ಹಠ ಸಾಧನೆಗೆ ಮುಂದಾಗುತ್ತಾರೆ. ಕಾಕತಾಳೀಯ ಎಂಬಂತೆ ಶನಿಯ ಪ್ರಭಾವದಿಂದಾಗಿ ಹಾಗೂ ಆತನ ಉಪಸ್ಥಿತಿಯಲ್ಲಿ ನಳ ಮಹಾರಾಜ ಹಾಗೂ ಆತನ ಸಹೋದರ ಪುಷ್ಕರನೊಂದಿಗೇ ಪಗಡೆಯಾಟವೆಂಬ ಜೂಜು ಆಡಿಸುತ್ತಾರೆ. ಅದರಲ್ಲಿ ನಳ ಮಹಾರಾಜ ಸರ್ವ ಸಂಪತ್ತು, ಸೇನೆ ಹಾಗೂ ರಾಜ್ಯವನ್ನೇ ಕಳೆದುಕೊಳ್ಳುವಂತೆ ಮಾಡುತ್ತಾರೆ.

ಸರ್ವಸ್ವವನ್ನೂ ಕಳೆದುಕೊಂಡ ನಳನು ಕಾಡಿನಲ್ಲಿ ಅಲೆಯುವಾಗ ಕಾರ್ಕೋಟಕ ಸರ್ಪ ಕಚ್ಚಿದ್ದರಿಂದ ವಿಷದ ಪ್ರಭಾವದಿಂದ ದೇಹ ಕುಬ್ಜವಾಗಿ, ವಿಕಾರ ರೂಪ ಹೊಂದಿ ಪರಿಚಯ ಸಿಗದಂತಾಗುತ್ತಾನೆ. ಶನಿ ಪ್ರಭಾವದಿಂದ ಬಗೆಬಗೆಯ ಸಮಸ್ಯೆ, ಯಮ ಯಾತನೆ ಅನುಭವಿಸುತ್ತಾನೆ. ಮಿತ್ರ ಋತುಪರ್ಣನ ರಾಜ್ಯದಲ್ಲಿ ಆಸರೆ ಪಡೆದು ಧರ್ಮ- ಸತ್ಯ ಹಾಗೂ ಭಗವಂತನ ಸ್ಮರಣೆಯಿಂದ ಸರ್ವ ಪಾಪ, ಸಮಸ್ಯೆ, ಶಾಪದಿಂದ ವಿಮೋಚನೆ ಹೊಂದುತ್ತಾನೆ. 

ಸತ್ಯ, ನಿಷ್ಠೆ, ಪ್ರಾಮಾಣಿಕತನದಿಂದ ಭಗವಂತನ ಕೃಪೆ ಸಾಧ್ಯ ಎಂಬ ಸಂದೇಶವನ್ನು ಯಕ್ಷಗಾನದ ಮೂಲಕ ಕೃಷ್ಣನ ಸನ್ನಿಧಿಯಲ್ಲಿ ಕಲಾವಿದರು ಬಿತ್ತರಿಸಿದರು.

ಹಿಮ್ಮೇಳದಲ್ಲಿ ಜನ್ಸಾಲೆ ರಾಘವೇಂದ್ರ ಆಚಾರ್ಯ, ಹಿಲ್ಲೂರು ರಾಮಕೃಷ್ಣ ಹೆಗಡೆ, ಪರಮೇಶ್ವರ ಭಂಡಾರಿ ಕರ್ಕಿ, ಶಶಾಂಕ ಆಚಾರ್ಯ, ಶಿವಾನಂದ ಕೋಟ, ಮುಮ್ಮೇಳದಲ್ಲಿ ಬಳ್ಕೂರು ಕೃಷ್ಣ ಯಾಜಿ (ಋತುಪರ್ಣ), ಕೊಂಡದಕುಳಿ ರಾಮಚಂದ್ರ ಹೆಗಡೆ (ನಳ ಮಹಾರಾಜ), ಅಶೋಕ್ ಭಟ್ ಸಿದ್ಧಾಪುರ (ಶನಿ), ಚಪ್ಪರಮನೆ ಶ್ರೀಧರ ಹೆಗಡೆ (ಹಾಸ್ಯ) ಮೂರೂರು ಸುಬ್ರಹ್ಮಣ್ಯ ಹೆಗಡೆ (ದಮಯಂತಿ), ಮುಗ್ವಾ ಗಣೇಶ್ ನಾಯ್ಕ, ವಿನಯ್ ಬೇರೊಳ್ಳಿ, ನಿರಂಜನ ಜಾಗ್ನಳ್ಳಿ, ದೀಪಕ್ ಕುಂಕಿ ಉತ್ತಮವಾಗಿ ಪಾತ್ರ ನಿರ್ವಹಿಸಿದರು.

ಶೀರೂರು ಮಠದ ಹೊರೆಕಾಣಿಕೆ ಸಮಿತಿಯ ಸಂಚಾಲಕ ಸುಪ್ರಸಾದ ಶೆಟ್ಟಿ ಬೈಕಾಡಿ, ಕಲಾರಂಗದ ನಾರಾಯಣ ಹೆಗಡೆ ಎಲ್ಲ ಕಲಾವಿದರನ್ನು ಶ್ರೀಕೃಷ್ಣ ಮಠದ ಪರವಾಗಿ ಸ್ವಾಗತಿಸಿ, ಪ್ರೇಕ್ಷಕರಿಗೆ ಪರಿಚಯಿಸಿದರು. ಪ್ರದರ್ಶನದ ಬಳಿಕ ಎಲ್ಲ ಕಲಾವಿದರಿಗೆ  ಪರ್ಯಾಯ ಶೀರೂರು ಮಠದ ವೇದವರ್ಧನ ತೀರ್ಥ ಶ್ರೀಪಾದರು ಅನುಗ್ರಹ ಮಂತ್ರಾಕ್ಷತೆ, ಕೃಷ್ಣನ ಮೂರ್ತಿ ನೀಡಿ ಆಶೀರ್ವದಿಸಿದರು.