ಉಡುಪಿ: ಬ್ರಹ್ಮಾವರ ತಾಲೂಕಿನ ನಾಗರಮಠ ಗ್ರಾಮದ ಸೀತಾ ನದಿ ಭಾಗದಲ್ಲಿ ಅವೈಜ್ಞಾನಿಕವಾಗಿ ಮರಳುಗಾರಿಕೆ ಮಾಡುತ್ತಿರುವುದರಿಂದ ನೂರಾರು ಎಕರೆ ಕೃಷಿಭೂಮಿ ಹಾಗೂ ಪರಿಸರದಲ್ಲಿರುವವರ ಜನ ಜೀವನಕ್ಕೆ ತೊಂದರೆ ಆಗುತ್ತಿದೆ ಎಂದು ಆರೋಪಿಸಿ ಬಾರ್ಕೂರು ಹೊಸಾಳ ಸಮೀಪದ ನಾಗರಮಠ ಗ್ರಾಮದ ನೂರಾರು ಜನರು ಉಡುಪಿ ಜಿಲ್ಲಾಧಿಕಾರಿ ಕಚೇರಿಗೆ ಶುಕ್ರವಾರ (ಫೆ.6) ಮುತ್ತಿಗೆ ಹಾಕಿದರು.

ಜಿಲ್ಲಾಡಳಿತದಿಂದ ಅನುಮತಿ ನೀಡಲ್ಪಟ್ಟ ಮರಳುಗಾರಿಕೆ ಅಕ್ರಮವಾಗುತ್ತಿದ್ದು, ಪರಿಸರವೂ ಹಾನಿಯಾಗುತ್ತಿದೆ. ಕೂಡಲೇ ಮರಳುಗಾರಿಕೆ ನಿಲ್ಲಿಸಿ ಎಂದು ಆಗ್ರಹಿಸಿ ಪ್ರತಿಭಟಿಸಿದರು. 

ಗ್ರಾಮದ ಚಂದ್ರ ಕಾಂಚನ್​ ಮಾತನಾಡಿ, 2022ರಿಂದ ಜಿಲ್ಲಾಡಳಿತಕ್ಕೆ ಹಾಗೂ ಸಂಬಂಧಿತ ಅಧಿಕಾರಿಗಳಿಗೆ ಮನವಿ ನೀಡುತ್ತಲೇ ಇದ್ದೇವೆ. ಆದರೆ, ಯಾರೂ ಸಹ ಸ್ಪಂದಿಸುತ್ತಿಲ್ಲ. ಅವೈಜ್ಞಾನಿಕ ಮರಳುಗಾರಿಕೆಯಿಂದಾಗಿ ನಮ್ಮ ಭಾಗದ ಕೃಷಿ ಚಟುವಟಿಕೆಗೆ ತುಂಬ ಹಾನಿಯಾಗುತ್ತಿದೆ. ಮರಳು ತೆಗೆಯುವ ಕಾರ್ಯದಿಂದ ನೀರು ಕೊಚ್ಚಿಕೊಂಡು ಗದ್ದೆಗೆ ನುಗ್ಗುತ್ತಿವೆ. ತಡೆಗೋಡೆ ನಿರ್ಮಿಸಿ ಎಂದರೂ ಗಮನ ಹರಿಸುತ್ತಿಲ್ಲ. ನದಿಯಿಂದ ತೆಗೆದ ಮರಳನ್ನು ಸಾಗಿಸಲು ನಮ್ಮ ಹೊಲದ ಮಧ್ಯದಲ್ಲಿಯೇ ಕೆಂಪು ಮಣ್ಣು ಸುರಿದು ಅಕ್ರಮವಾಗಿ ರಸ್ತೆಯನ್ನೂ ಮಾಡಿದ್ದಾರೆ. ಅದರಿಂದಾಗಿ ಮಳೆಗಾಲದಲ್ಲಿ ನೀರು ಇನ್ನೊಂದುಕಡೆ ಸಾಗಲು ತೊಡಕುಂಟಾಗಿದೆ. ಗಣಿ ಮತ್ತು ಭೂವಿಜ್ಞಾನ ಇಲಾಖೆ ಅಧಿಕಾರಿಗಳಿಗೆ ತಿಳಿಸಿದರೆ ಅವರು ನಮಗೇ 'ಆತ್ಮ ವಿಮರ್ಶೆ ಮಾಡಿಕೊಳ್ಳಿ' ಎನ್ನುತ್ತಾರೆ. ಇದೆಂತಹ ಉತ್ತರ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಆಶಾ ಅಮೀನ್​ ಮಾತನಾಡಿ, ಅಧಿಕಾರಿಗಳು ಕಚೇರಿಯಲ್ಲಿ ಕುಳಿತು ಜನರ ಮನವಿ ಸ್ವೀಕರಿಸಿದರೆ ಯಾವುದೇ ಸಮಸ್ಯೆಯೂ ಪರಿಹಾರ ಕಾಣದು. ಜಿಲ್ಲಾಡಳಿತ ಸೀತಾ ನದಿಯಲ್ಲಿ ಮರಳುಗಾರಿಕೆಗೆ ಅನುಮತಿ ನೀಡಿದೆ. ಅಲ್ಲಿ ನಡೆಯುತ್ತಿರುವ ಅವೈಜ್ಞಾನಿಕ ಮರಳುಗಾರಿಕೆಯಿಂದಾಗಿ ನಾಗರಮಠ ಪ್ರದೇಶದಲ್ಲಿ ಸಮಸ್ಯೆ ಉಂಟಾಗಿದೆ. ಈ ಭಾಗದ ನೂರಾರು ಎಕರೆ ಕೃಷಿ ಭೂಮಿ ಮಣ್ಣಿನ ಸವೆತದಿಂದ ಸೀತಾ ನದಿಗೆ ಕೊಚ್ಚಿ ಹೋಗುತ್ತಿದೆ. ಸೀತಾ ನದಿ ಈ ಹಿಂದೆ 60 ಅಡಿಯಷ್ಟು ಅಗಲವಿತ್ತು. ನಿರಂತರ ಮರಳುಗಾರಿಕೆಯಿಂದಾಗಿ ಈಗ 160 ಅಡಿಯಷ್ಟು ಅಗಲವಾಗಿದೆ. ಅಗಲಗೊಂಡ ಪ್ರದೇಶ ವಾಸ್ತವವಾಗಿ ರೈತರ ಕೃಷಿ ಭೂಮಿಯಾಗಿದೆ. ಅಕ್ರಮ ಗಣಿಗಾರಿಕೆಯಿಂದಾಗಿ ನದಿ ಹರಿವು ಬದಲಾಗಿ ಕೃಷಿ ಭೂಮಿ ಇನ್ನಷ್ಟು ನಾಶ ಆಗಲಿದೆ. ಅಧಿಕಾರಿಗಳೇ ಒಮ್ಮೆ ಆತ್ಮವಿಮರ್ಶೆ ಮಾಡಿಕೊಳ್ಳಬೇಕಿದೆ. ಮರಳುಗಾರಿಕೆಗೆ ಅನುಮತಿ ನೀಡಿರುವುದು ಈ ಭಾಬಾಗದ ಜನರ ಮರಣ ಶಾಸನವಾಗಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು. 

ಗ್ರಾಮದ ಗಣೇಶ್​ ಶೆಟ್ಟಿ, ಉಷಾ, ಚಂದ್ರಾ ಅಮೀನ್​ ಮಾತನಾಡಿದರು. ಗ್ರಾಮದ ಹಲವಾರು ಜನರು ಉಪಸ್ಥಿತರಿದ್ದರು. 

"